കോവിഡ് പേടിയില്‍ ആരും ഏറ്റെടുക്കാതെ തെരുവില്‍ ഒറ്റപ്പെട്ട കുഞ്ഞിനെ നെഞ്ചോട് ചേര്‍ത്ത് സുരക്ഷിത കേന്ദ്രത്തിലെത്തിച്ച തഹസില്‍ദാര്‍ ബാലസുബ്രഹ്മണ്യത്തിന്റെ കരുതല്‍ ഇപ്പോള്‍ സമൂഹ മാധ്യമങ്ങളില്‍ വൈറലാകുന്നു
കോവിഡ് മഹാമാരിയെ ചെറുക്കാന്‍ സാമൂഹിക അകലം സൂക്ഷിക്കുക എന്നതാണ് ആരോഗ്യ പ്രവര്‍ത്തകര്‍ നിര്‍ദേശിക്കുന്നത്. എന്നാല്‍ സാമൂഹിക അകലത്തോടൊപ്പം മാനസികമായി കൂടി സമൂഹത്തില്‍ നിന്നും പലരും അകന്നു പോകുന്ന കാഴ്ചകളാണ് ഇപ്പോള്‍ നമുക്കു ചുറ്റും കാണുന്നത്. എന്നാല്‍ സാമൂഹികമായ ഉത്തരവാദിത്തം മറക്കാത്തവര്‍ അല്പം ആശ്വാസം പകരുന്നുണ്ട്.നന്മകള്‍ ഈ കോവിഡ് കാലത്തും വറ്റിപോയിട്ടില്ല എന്നതിന്റെ അവശേഷിപ്പുകളാണ് അത്തരം കാഴ്ചകള്‍.
തിരുവനന്ത പുരം നഗരവും കഴിഞ്ഞ ദിവസം അങ്ങനെ ഒരു കാഴ്ചയ്ക്കു സാക്ഷ്യം വഹിച്ചു.
കോവിഡ് പേടിയില്‍ ആരും ഏറ്റെടുക്കാതെ തെരുവില്‍ ഒറ്റപ്പെട്ട കുഞ്ഞിനെ നെഞ്ചോട് ചേര്‍ത്ത് സുരക്ഷിത കേന്ദ്രത്തിലെത്തിച്ച തഹസില്‍ദാര്‍ ബാലസുബ്രഹ്മണ്യത്തിന്റെ കരുതല്‍ ഇപ്പോള്‍ സമൂഹ മാധ്യമങ്ങളില്‍ വൈറലാകുകയാണ് . കഴിഞ്ഞ ബുധനാഴ്ച മുംബൈയില്‍ നിന്ന് നേത്രാവതി ട്രെയിനില്‍ എത്തിയ കുഞ്ഞിനാണ് തഹസില്‍ദാര്‍ സ്‌നേഹത്തിന്റെ തണലൊരുക്കിയത് . നാടോടി സ്ത്രീയും കുഞ്ഞും റെയില്‍വേ സ്റ്റേഷനിലെത്തിയപ്പോള്‍ സമയം വൈകുന്നേരം ഏഴര. ഒന്‍പതുമണി കഴിഞ്ഞും ഇരുവരും സ്റ്റേഷനു മുന്നിലെ നിരത്തിലിരിക്കുന്നത് ശ്രദ്ധയില്‍പ്പെട്ടതോടെ അധികൃതര്‍ വിവരങ്ങള്‍ തിരക്കി.
ഹിന്ദി ഭാഷയില്‍ പരസ്പര വിരുദ്ധമായ മറുപടികളാണ് സ്ത്രീയില്‍ നിന്നു ലഭിച്ചത്. കൂടെയുള്ളത് മകളാണെന്നും പറഞ്ഞു. കോവിഡ് പരിശോധനയ്ക്കായി ജനറല്‍ ആശുപത്രിയിലേക്ക് സ്ത്രീയെ മാറ്റിയപ്പോള്‍ കുഞ്ഞ് ഒറ്റപ്പെട്ടുപോവുകയായിരുന്നു. ശിശുക്ഷേമ സമിതിയില്‍ അറിയിച്ചെങ്കിലും ആളെത്താന്‍ വൈകിയതോടെയാണ് തഹസില്‍ദാര്‍ ഇടപെട്ടത്. അദ്ദേഹം കുഞ്ഞിനെ നെഞ്ചോടു ചേര്‍ത്തുപിടിച്ച് വാഹനത്തില്‍ ശിശുക്ഷേമ സമിതിയില്‍ എത്തിച്ചു. സമൂഹ മാധ്യമങ്ങളില്‍ വാര്‍ത്ത പ്രചരിച്ചതോടെ കലക്ടര്‍ അടക്കമുള്ളവര്‍ ബാലസുബ്രമണ്യത്തിന് അഭിനന്ദനവുമായി എത്തി. നാഷനല്‍ ഹൈവേ വിഭാഗത്തില്‍ തഹസില്‍ദാറാണ് പന്തളം സ്വദേശിയായ ബാലസുബ്രമണ്യം.
ബെംഗളൂരുവില്‍ നിന്ന് എത്തി 14 ദിവസം ക്വാറന്റീന്‍ പൂര്‍ത്തിയാക്കിയിട്ടും സ്വന്തം വീട്ടിലോ ഭര്‍തൃവീട്ടിലോ സ്വീകരിക്കാതെ വന്നഅമ്മയുടെയും മക്കളുടെയും അവസ്ഥയും കഴിഞ്ഞ ദിവസം വാര്‍ത്തയായിരുന്നു . രണ്ടു കുഞ്ഞുങ്ങളുമായി ആ അമ്മ അഭയം തേടി അലഞ്ഞത് എട്ട് മണിക്കൂറാണ് . മനുഷ്യന്റെ സ്വാര്‍ത്ഥതയ്ക്കു മുന്നില്‍ സ്വന്തബന്ധങ്ങള്‍ പോലും ഒന്നുമല്ല എന്ന് തിരിച്ചറിയപ്പെടുന്ന ചില നിമിഷങ്ങള്‍.ചേര്‍ത്തുപിടിക്കേണ്ടവര്‍ പോലും ആട്ടിയകറ്റുമ്പോഴുണ്ടാകുന്ന വേദന. ഇതൊന്നും മനസിലാക്കാന്‍ മാത്രം ഇനിയും മനസ് വളരാത്ത മലയാളികളുണ്ട് നമുക്കിടയില്‍ ഇപ്പോഴും. ഈ സഹാഹചര്യത്തിലാണ് തിരുവനന്തപുരം തഹസീല്‍ദാര്‍ ബാലസുബ്രമണ്യം കയ്യടി നേടുന്നത്
https://www.facebook.com/Malayalivartha
