സ്വര്‍ണക്കടത്ത് കേസിലെ പ്രതിയും ഐടി വകുപ്പ് ഉദ്യോഗസ്ഥയുമായിരുന്ന.സ്വപ്നക്കായി മറ്റൊരു കേസില്‍ പൊലീസ് അട്ടിമറി നീക്കം നടത്തിയതിന്റെ തെളിവുകള്‍ പുറത്ത്. എയര്‍ ഇന്ത്യ ഉദ്യോഗസ്ഥനെതിരായ കേസിലാണ് അട്ടിമറി നടത്തിയത്. എയര്‍ ഇന്ത്യ ഉദ്യോഗസ്ഥനെതിരെ വ്യാജ രേഖയുണ്ടാക്കിയ കേസില്‍ തെളിവില്ലെന്ന് കോടതിയില്‍ റിപ്പോര്‍ട്ട് നല്‍കി. എന്നാല്‍ ക്രൈംബ്രാഞ്ചിന്റെ പുനരന്വേഷണത്തില്‍ സ്വപ്നക്കെതിരെ തെളിവ് കണ്ടെത്തി

എയര്‍ ഇന്ത്യ ജീവനക്കാരനായ സിബുവിനെ വ്യാജ ലൈംഗിക ആരോപണം ഉന്നയിച്ച് കുടുക്കാന്‍ ശ്രമിച്ച കേസിലാണ് പോലീസ് സ്വപ്നയെ സംരക്ഷിച്ചത്. എയര്‍ഇന്ത്യ വൈസ് പ്രസിഡന്റായിരുന്ന ബിനോയ് ജേക്കബിനെതിരെയായിരുന്നു പരാതി നല്‍കിയത്. ഈ കേസില്‍ സ്വപ്നക്കെതിരേയും ആരോപണമുണ്ടായിരുന്നു.

എന്നാല്‍ സ്വപ്നയുടെ മൊഴി 2017ല്‍ രേഖപ്പെടുത്തിയതിന് പിന്നാലെ കേസ് അട്ടിമറിക്കപ്പെടുകയായിരുന്നു. ആദ്യം വലിയതുറ പോലീസും പിന്നീട് ജില്ലാ ക്രൈംബ്രാഞ്ചുമാണ് കേസ് അന്വേഷിച്ചത്. എന്നാല്‍ സ്വപ്നയുടെ പേര് എഫ്‌ഐആറില്‍ ഉള്‍പ്പെടുത്തിയിരുന്നില്ല.

കേസ് അവസാനിപ്പിക്കുന്നതായി ചൂണ്ടിക്കാണിച്ച് അന്നത്തെ ജില്ലാ ക്രൈംബ്രാഞ്ച് അസിസ്റ്റന്റ് കമ്മീഷണര്‍ കോടതിയില്‍ റിപ്പോര്‍ട്ട് നല്‍കിയിരുന്നു. ഇത് ചോദ്യം ചെയ്ത് പരാതിക്കാരന്‍ ഹൈക്കോടതിയെ സമീപിച്ചപ്പോഴാണ് കേസില്‍ ക്രൈംബ്രാഞ്ച് അന്വേഷണം വേണമെന്ന് നിര്‍ദേശിച്ചത്. പിന്നീടുള്ള അന്വേഷണത്തില്‍ സ്വപ്നക്കെതിരേ ക്രൈംബ്രാഞ്ച് തെളിവും കണ്ടെത്തി..

തലസ്ഥാനത്തെ പലയിടങ്ങളിലെ ഫ്‌ലാറ്റുകളിലുള്‍പ്പെടെ മാറി മാറി താമസിച്ച സ്വപ്നക്കും കേസില്‍ പിടിയിലായ സരിത്തിനും കോടികളുടെ ആസ്തിയുണ്ടെന്നാണ് കസ്റ്റംസിന്റെ പ്രാഥമിക വിലയിരുത്തല്‍. ഓരോ സ്വര്‍ണക്കടത്തിനും 15 മുതല്‍ 25 ലക്ഷം വരെയാണ് കിട്ടിയിരുന്നത്. ഇതിന്റെ കൂടുതല്‍ വിവരങ്ങള്‍ ശേഖരിക്കുന്നതിന് സ്വപ്നയുടെ ഫ്‌ലാറ്റിലും കസ്റ്റംസ് പരിശോധന നടത്തി.

സ്വപ്നയെ കേസില്‍ പ്രതി ചേര്‍ക്കാന്‍ തീരുമാനിച്ചതായി ക്രൈംബ്രാഞ്ച് കഴിഞ്ഞ ദിവസം തന്നെ വ്യക്തമാക്കിയിരുന്നു. ഇതോടെ ആദ്യം പോലീസും പിന്നീട് ജില്ലാ ക്രൈംബ്രാഞ്ചും നടത്തിയ അന്വേഷണം സ്വപ്നയെ സംരക്ഷിച്ച് കൊണ്ടാണെന്ന് തെളിയുകയാണ്.

2016ല്‍ സാറ്റ്‌സുമായി ബന്ധപ്പെട്ട് നടക്കുന്ന ചില തെറ്റായ കാര്യങ്ങള്‍ എയര്‍ ഇന്ത്യയിലെ യൂനിയന്‍ നേതാവ് ഉന്നയിച്ചപ്പോഴാണ് അദ്ദേഹത്തിനെതിരെ 16 വനിതാ ജീവനക്കാരെക്കൊണ്ട് പരാതി കൊടുപ്പിച്ചത് . ക്രൈംബ്രാഞ്ച് അന്വേഷണത്തില്‍ വ്യാജരേഖ ചമക്കല്‍, ആള്‍മാറാട്ടം തുടങ്ങിയ കുറ്റങ്ങള്‍ ചുമത്തി കുറ്റപത്രം സമര്‍പ്പിക്കാനിരിക്കുകയാണ് ഇപ്പോള്‍
പിന്നീട് യു.എ.ഇ കോണ്‍സുലേറ്റിലെ ഓഫിസ് സെക്രട്ടറിയായാണ് സ്വപ്ന മടങ്ങിയെത്തിയത്. കോണ്‍സുലേറ്റില്‍നിന്ന് പുറത്തായി മാസങ്ങള്‍ക്കുള്ളില്‍ ഐ.ടി വകുപ്പിന് കീഴില്‍ ഓപറേഷന്‍സ് മേധാവിയായി. അതിനിടയിലും മറ്റ് സ്ഥാപനങ്ങളുമായി ബന്ധപ്പെട്ടിരുന്നു. വിമാനത്താവളത്തിലെ പല ഉന്നതരുമായും ഫോണില്‍ ബന്ധപ്പെട്ട വിവരങ്ങളും സ്വര്‍ണക്കടത്തിന് സഹായം അഭ്യര്‍ഥിച്ച് അയച്ച വാട്‌സ്ആപ് സന്ദേശങ്ങളും കസ്റ്റംസ് കണ്ടെത്തിയിട്ടുണ്ട്. സ്വപ്നയുടെ സമ്പത്തിനെക്കുറിച്ച് കേന്ദ്ര ഏജന്‍സികളും അന്വേഷണം തുടങ്ങിയിട്ടുണ്ട്.