എത്ര പ്രതാപത്തോടെ കഴിഞ്ഞിരുന്ന ഒരു ഐഎഎസ് ഓഫീസറിന്റെ ഇന്നത്തെ അവസ്ഥയോര്‍ക്കുമ്പോള്‍ എല്ലാവര്‍ക്കും കഷ്ടമാണ് തോന്നുന്നത്. കേവലം സ്വപ്നയൊരുക്കിയ ഊരാക്കുടുക്കില്‍ ഇങ്ങനെ ചെന്നുപെടുമെന്ന് ഒരു സര്‍ക്കാര്‍ സെക്രട്ടറി സ്വപ്‌നേപി വിചാരിച്ചില്ല. ഒരു പക്ഷെ എന്‍ഐഎ വന്നില്ലായിരുന്നെങ്കില്‍ എം. ശിവശങ്കറിനെ ചോദ്യം പോലും ചെയ്യില്ലായിരുന്നു. കസ്റ്റംസ് നടത്തിയ 9 മണിക്കൂര്‍ മാരത്തോണ്‍ ചോദ്യം ചെയ്യലിന് ശേഷം എന്‍ഐഎ 5 മണിക്കൂറാണ് ശിവശങ്കറിനെ ചോദ്യം ചെയ്തത്. 5 മണിക്കൂറിനുള്ളില്‍ 6 പ്രധാന ചോദ്യമാണ് ചോദിച്ചത്.

1 സര്‍ക്കാര്‍ സംവിധാനങ്ങള്‍ സ്വര്‍ണക്കടത്തിനായി ദുരുപയോഗം ചെയ്‌തോ?
2 സ്വപ്നയ്ക്ക് സെക്രട്ടേറിയറ്റിനടുത്ത് ഫ്‌ലാറ്റെടുത്ത് നല്‍കിയത് എന്തിന്?
3 ശിവശങ്കറിന്റെ ഫ്‌ലാറ്റില്‍ പ്രതികള്‍ ഒത്തുചേര്‍ന്നത് അറിവോടെയാണോ?
4 സര്‍വീസ് അപ്പാര്‍ട്ട്‌മെന്റില്‍ സ്വര്‍ണം ഒളിപ്പിക്കാനോ ഒളിത്താവളമൊരുക്കാനോ ശ്രമിച്ചോ?
5 ഐടി ഇന്‍ഫ്രാസ്ട്രക്ചറില്‍ യോഗ്യതയില്ലാത്ത സ്വപ്നയ്ക്ക് ജോലിക്ക് ശുപാര്‍ശ ചെയ്തത് എന്തിന്?
6)സ്വര്‍ണമടങ്ങിയ കാര്‍ഗോയെത്തിയ ജൂണ്‍ 24 ,26 തീയതികളില്‍ പ്രതികള്‍ക്കൊപ്പം ഒത്തുകൂടിയോ?

എല്ലാ ചോദ്യവും അവസാനിച്ചത് സ്വപ്നയിലാണ്. അതിനാല്‍ തന്നെ ശിവശങ്കറിന് വ്യക്തമായ ഉത്തരം നല്‍കാനുമായില്ല. ശിവശങ്കറെന്ന സീനിയര്‍ ഐഎഎസ് ഉദ്യോഗസ്ഥന്റെ ഈ അവസ്ഥ കണ്ട് പലരും തലയില്‍ കൈവച്ച് പോയി. സ്വര്‍ണക്കടത്തിലെ പ്രതികളുടെ ചോദ്യം ചെയ്യലില്‍ കേന്ദ്രീകരിച്ചിരുന്ന അന്വേഷണം ശിവശങ്കറിലൂടെ സര്‍ക്കാരിലേക്ക് എത്തുമെന്നായതോടെ അന്വേഷണം പുതിയ വഴിത്തിരിവിലേക്കു കടന്നിരിക്കുകയാണ്

പേരൂര്‍ക്കടയില്‍ എന്‍.ഐ.എയുടെ ക്യാമ്പ് ഓഫീസ് ആയ പൊലീസ് ക്ലബിലേക്ക് ശിവശങ്കറിനെ വിളിച്ചുവരുത്തിയായിരുന്നു ചോദ്യം ചെയ്യല്‍. വൈകിട്ട് നാലിനു തുടങ്ങിയ ചോദ്യം ചെയ്യല്‍ രാത്രി 8.55 നാണ് അവസാനിച്ചത്. ശിവശങ്കറെ ചോദ്യം ചെയ്യലിന് വിളിച്ചുവരുത്തിയതോടെ അറസ്റ്റ് ഉണ്ടാകുമെന്ന് അഭ്യൂഹം പരന്നിരുന്നു. രാത്രി ഒന്‍പതു മണിയോടെ പൊലീസ് ക്ലബില്‍ നിന്ന് ഇറങ്ങിയ ശിവശങ്കര്‍ സഹോദരന്റെ മാരുതി ആള്‍ട്ടോ കാറില്‍ പൂജപ്പൂരയിലെ വീട്ടിലേക്കു മടങ്ങി. സംസ്ഥാനത്ത് ഒരു ഐ.എ.എസ് ഉദ്യോഗസ്ഥനെ എന്‍.ഐ.എ ചോദ്യംചെയ്യുന്നത് ആദ്യമാണ്.
പ്രാഥമിക ചോദ്യം ചെയ്യലാണ് നടന്നതെന്നും, എന്‍.ഐ.എയും കസ്റ്റംസും അദ്ദേഹത്തെ വീണ്ടും ചോദ്യം ചെയ്യുമെന്നുമാണ് സൂചന. അതേസമയം, എന്‍.ഐ.എ ആവശ്യപ്പെട്ട , സെക്രട്ടേറിയറ്റിലെ സിസി ടിവി ദൃശ്യങ്ങള്‍ നല്‍കാന്‍ ഇന്നലെ വൈകിട്ട് ചീഫ് സെക്രട്ടറി വിശ്വാസ് മേത്ത ഉത്തരവിട്ടു. ഭീകരബന്ധം സംശയിക്കപ്പെടുന്ന കേസിന്റെ അന്വേഷണം സര്‍ക്കാര്‍ അസ്ഥാനത്തേക്ക് നീണ്ടതോടെ പ്രതിപക്ഷ കക്ഷികളും ബി.ജെ.പിയും രാഷ്ട്രീയ ആക്രമണത്തിന് മൂര്‍ച്ച കൂട്ടുമെന്നുറപ്പാണ്

നേരത്തെ, ശിവശങ്കര്‍ കസ്റ്റംസിനു നല്‍കിയ മൊഴികള്‍ ശേഖരിച്ച്, ഡിജിറ്റല്‍ തെളിവുകളുമായുള്ള വൈരുദ്ധ്യം കണ്ടെത്തിയ ശേഷമായിരുന്നു ചോദ്യംചെയ്യല്‍. മുന്‍കൂട്ടി തയ്യാറാക്കിയ ചോദ്യങ്ങളേറെയും വിദേശ യാത്രകളെക്കുറിച്ചും കൂടിക്കാഴ്ചകളെക്കുറിച്ചുമായിരുന്നു. വിദേശയാത്രകളില്‍ പ്രതികളില്‍ ചിലര്‍ അനുഗമിച്ചിരുന്നോ എന്നും, സ്വര്‍ണക്കടത്തിന് പണം മുടക്കിയവരുമായി വിദേശത്ത് ബന്ധപ്പെട്ടിരുന്നോയെന്നും ചോദിച്ചറിഞ്ഞതായാണ് വിവരം. സ്വര്‍ണം എത്തിയ ജൂണില്‍ ശിവശങ്കറിന്റെ വിദേശത്തേക്കുള്ള സംശയകരമായ ആറ് വിളികള്‍ അന്വേഷണത്തില്‍ എന്‍.ഐ.എ കണ്ടെത്തിയിരുന്നു.

അതേസമയം എന്‍.ഐ.എ സൈബര്‍ ഫോറന്‍സിക് വിഭാഗം സെക്രട്ടേറിയറ്റില്‍ പരിശോധിച്ചേക്കും. സ്വപ്നയും സരിത്തും സെക്രട്ടേറിയറ്റില്‍ പതിവായി എത്താറുണ്ടായിരുന്നെന്ന് മനസ്സിലാക്കിയാണ് തെളിവിനായി സെക്രട്ടേറിയറ്റിലെ സിസിടിവി ദൃശ്യങ്ങള്‍ക്കായി എന്‍.ഐ.എ ചീഫ്‌സെക്രട്ടറിക്ക് കത്ത് നല്‍കിയത്. എല്ലാത്തിനും കാരണം ശിവശങ്കറുമായുള്ള സ്വപ്നയുടെ ബന്ധമാണ്. സ്വപ്ന ശരിക്കും ശങ്കറിനെ മുതലെടുത്തോ എന്നാണ് ഇനി അറിയേണ്ടത്. അത് വരും ദിവസങ്ങളില്‍ അറിയാവുന്നതാണ്.