ആലുവ കൊവിഡ് ക്ലോസ്ഡ് ക്ലസ്റ്ററിൽ ഒരു കോവിഡ് മരണം കൂടി റിപ്പോർട്ട് ചെയ്തു. ഇന്ന് രാവിലെ മരിച്ച തൃക്കാക്കര കരുണാലയം അന്തേവാസിയായ ആനി ആന്റണിക്കാണ് കൊവിഡ് സ്ഥിരീകരിച്ചത്. കൊവിഡ് തീവ്രവ്യാപന ആശങ്കയുടെ പശ്ചാത്തലത്തിൽ ആലുവ നഗരസഭയിലും സമീപത്തെ ഏഴ് പഞ്ചായത്തുകളിലും ഏർപ്പെടുത്തിയ കർഫ്യൂ തുടരുകയാണ്.

ആലുവ ക്ലസ്റ്ററിലാണ് ഏറ്റവുമധികം രോഗബാധ. ആലുവ ക്ലസ്റ്ററിൽ 45 പേർക്കാണ് ഇന്നലെ മാത്രം രോഗം സ്ഥിരീകരിച്ചത്. ആലുവ കൊവിഡ് ക്ലോസ്ഡ് ക്ലസ്റ്ററായ തൃക്കാക്കര നഗരസഭയിൽ മാത്രം 55 പേർക്കാണ് ഇതുവരെ രോഗം സ്ഥിരീകരിച്ചത്.

ഇതിൽ 34 പേർ കരുണാലയത്തിലെ അന്തേവാസികളാണ്. ഇവർ കൊവിഡ് ബാധിച്ച് മരിച്ച സിസ്റ്റർ ക്ലയറിന്റെ സമ്പർക്ക പട്ടികയിലുള്ളവരാണ്.

അനാഥരായ പ്രായമായ നിരവധി അന്തേവാസികളാണ് കരുണാലയത്തിലുള്ളത്. ഇതേ കോണ്‍വെന്‍റില്‍ ക‍ഴിഞ്ഞ ദിവസം 10 കന്യാസ്ത്രികള്‍ അടക്കം 30 വയോജനങ്ങള്‍ക്ക് കൊവിഡ് സ്ഥിരീകരിച്ചിരുന്നു. 21 വയസ്സ് മുതല്‍ 98 വയസ്സ് വരെയുള്ളവര്‍ താമസിക്കുന്നയിടമാണ് തൃക്കാക്കര കരുണാലയം കോണ്‍വെന്‍റ്.

ഇവിടെയുളളവരില്‍ ഭൂരിഭാഗവും 70 വയസ്സിന് മുകളിലുളളവരാണ്. മറ്റ് രോഗങ്ങള്‍ പിടിപ്പെട്ടവരും കിടപ്പുരോഗികളും ധാരാളമുണ്ട്. അതുകൊണ്ട് തന്നെ ഇവിടെ കൊവിഡ് വ്യാപനം ഉണ്ടായത് സ്ഥിതി ഗുരുതരമാക്കിയിട്ടുണ്ട് നിലവിൽ കൊവിഡ് പ്രാഥമിക ചികിത്സ കേന്ദ്രമാണ് ഇവിടം.