അവയവദാനം നടത്തിയ അനുജിത്തിന്റെ ഭാര്യയ്ക്ക് ജോലി നല്‍കണമെന്നും ധനസഹായം പ്രഖ്യാപിക്കണമെന്നും ആവശ്യപ്പെട്ട് രമേശ് ചെന്നിത്തല മുഖ്യമന്ത്രി പിണറായി വിജയന് കത്തയച്ചു. ബൈക്ക് അപകടത്തില്‍ പരുക്കേറ്റു മസ്തിഷ്‌ക മരണം സംഭവിച്ച കൊട്ടാരക്കര, കുളക്കട ഉത്രാടം വീട്ടില്‍ അനുജിത്തിന്റെ അവയവദാന വാര്‍ത്തകളുടെ പശ്ചാത്തലത്തിലാണ് ഈ കത്ത്.

അനുജിത്തിന്റെ വിധവ പ്രിന്‍സിയുമായി താന്‍ ഫോണില്‍ സംസാരിച്ചിരുന്നുവെന്നും തികച്ചും മാതൃകാപരമായ പ്രവര്‍ത്തിയാണ് ഈ കുടുംബത്തിന്റെ ഭാഗത്ത് നിന്നും ഉണ്ടായിട്ടുള്ളതെന്നും ചെന്നിത്തല പറഞ്ഞു. ഗുരുതരാവസ്ഥയിലുള്ള 8 രോഗികള്‍ക്കാണ് ഇതിലൂടെ ജീവിതത്തിലേക്ക് തിരിച്ചുവരാനായത്.

സൂപ്പര്‍മാര്‍ക്കറ്റിലെ ജീവനക്കാരനായിരുന്ന അനുജിത്തിന്റെ തുച്ഛമായ വരുമാനത്തെ ആശ്രയിച്ചാണ് ഈ കുടുംബം കഴിഞ്ഞിരുന്നത്. വീട് നിര്‍മിച്ചതുമായി ബന്ധപ്പെട്ട് 10 ലക്ഷം രൂപയുടെ സാമ്പത്തിക ബാധ്യതയും ഇവര്‍ക്കുണ്ട്. ഈ കുടുംബത്തിന്റെ അവസ്ഥ ഇപ്പോള്‍ അതിദയനീയമാണ്. അനുജിത്തിന്റെ ഭാര്യ പ്രിന്‍സിയും 3 വയസ്സുള്ള മകന്‍ എഡ്വിനും അനുജിത്തിന്റെ മരണത്തോടെ കടുത്ത പ്രതിസന്ധി നേരിടുകയാണ്. മകന്റെ വിദ്യാഭ്യാസം ഉള്‍പ്പെടെയുള്ള കാര്യങ്ങളിലും നിരവധി വെല്ലുവിളികളെ തരണം ചെയ്യേണ്ടിവരും.

ഈ കുടുംബത്തിന്റെ അതിദയനീയ സാഹചര്യവും, സാമ്പത്തിക ബുദ്ധിമുട്ടുകളും പരിഗണിച്ച് പ്രിന്‍സി അനുജിത്തിന് സര്‍ക്കാര്‍ സര്‍വീസില്‍ അനുയോജ്യമായ ഒരു ജോലി നല്‍കണമെന്നും, ഈ കുടുംബത്തിന്റെ വായ്പാ ബാധ്യത പരിഹരിക്കുന്നതിനുള്ള പ്രത്യേക ധനസഹായമായി 10 ലക്ഷം രൂപ അനുവദിക്കണമെന്നും രമേശ് ചെന്നിത്തല അഭ്യര്‍ഥിച്ചു.