കരിയാത്തുംപാറ മീന്‍മുട്ടി വനമേഖലയില്‍ ഇന്നലെ വീണ്ടും മലയിടിച്ചില്‍. ഇന്നലെ വനമേഖലയിലെ ശക്തമായ മഴയില്‍ വൈകിട്ട് 4-ന് രണ്ടു തവണയാണ് മലയിടിച്ചില്‍ സംഭവിച്ചത്. കഴിഞ്ഞ ചൊവ്വാഴ്ച പുലര്‍ച്ചെ മലയിടിഞ്ഞപ്പോള്‍ ഒലിച്ചെത്തിയ ഭീമന്‍ പാറയും പാറക്കൂട്ടങ്ങളും മണ്ണും കുത്തിയൊഴുകി. കരിയാത്തുംപാറ പുഴയില്‍ ജലപ്രവാഹം വര്‍ധിച്ചു. കഴിഞ്ഞ മലയിടിച്ചിലില്‍ ഒഴുകിയ തോട്ടിലൂടെയാണു ഇന്നലെയും പാറകളും മണ്ണും ഒഴുകിയത്.

ഈ മേഖലയിലെ 4 കുടുംബങ്ങളെ മുന്‍കരുതലിന്റെ ഭാഗമായി റവന്യു വകുപ്പ് അധികൃതര്‍ ബന്ധു വീടുകളിലേക്ക് മാറ്റിപ്പാര്‍പ്പിച്ചു മഴ ശക്തമാകുമ്പോള്‍ കരിയാത്തുംപാറ മേഖലയിലെ ജനങ്ങള്‍ ആശങ്കയിലാണ്. പൊട്ടിയ ഒരു പാറ കൂടി ഈ മേഖലയില്‍ ഉണ്ട്. കൂടാതെ വലിയ പാറ വീണ്ടും പൊട്ടി വീഴാന്‍ സാധ്യതയുള്ളതായി നാട്ടുകാര്‍ പറയുന്നു.

വനത്തിലെ പാറകള്‍ കനത്ത മഴയില്‍ പൊട്ടുന്നത് നാട്ടുകാര്‍ക്ക് ഭീഷണി ആയതിനാല്‍ ജനപ്രതിനിധികളുടെ ആവശ്യപ്രകാരം വിദഗ്ധ സംഘം എത്തി. കഴിഞ്ഞ ചൊവ്വാഴ്ച മലയിടിച്ചില്‍ സംഭവിച്ച കരിയാത്തുംപാറ മീന്‍മുട്ടി വനമേഖല പ്രദേശത്ത് ജിയോളജി,റവന്യു,മണ്ണ് പരിവേഷണ വകുപ്പ്,സിഡബ്ല്യുആര്‍ഡിഎം ഉദ്യോഗസ്ഥ സംഘമാണ് ഇന്നലെ പരിശോധന നടത്തിയത്. മഴ ശക്തമായാല്‍ പാറക്കെട്ടുകള്‍ വീണ്ടും പൊട്ടാനും,മലയിടിച്ചിലിനും സാധ്യതയുണ്ടെന്ന് സംഘം വിലയിരുത്തി.

ഇന്ന് വിശദമായ റിപ്പോര്‍ട്ട് സംഘം കലക്ടര്‍ക്ക് കൈമാറുമെന്ന് അറിയിച്ചു. ജിയോളജിസ്റ്റ് പി.എന്‍.ബിജുമോന്‍,സിഡബ്ല്യുആര്‍ഡിഎം സയന്റിസ്റ്റ് ഡോ.അരുണ്‍, ജില്ലാ മണ്ണ് പര്യവേഷണ ഓഫിസര്‍ ടി.പി.ആയിഷ,കൊയിലാണ്ടി തഹസില്‍ദാര്‍ കെ.ഗോകുല്‍ദാസ്,ഡപ്യൂട്ടി തഹസില്‍ദാര്‍ ഡി.രഞ്ജിത്ത്, തുടങ്ങിയവരാണ് സന്ദര്‍ശിച്ചത്.