ഡിപ്ലോമാറ്റിക് ബാഗേജിൽ സ്വർണം കടത്തിയ കേസിൽ നിർണായകമായ വിവരങ്ങൾ പുറത്തേക്ക് വരുമ്പോൾ വെറുമൊരു സുഹൃത്തെന്ന് പറഞ്ഞൊഴിയുകയായിരുന്നു മുഖ്യമന്ത്രിയുടെ മുൻ ഐ.ടി സെക്രട്ടറി ശിവശങ്കർ. എന്നാൽ എന്ത് ജോലി ഏല്‍പ്പിച്ചാലും അവയെല്ലാം മിടുക്കോടെ ചെയ്യുന്ന ആളായിരുന്നു സ്വപ്‌നയെന്ന് എന്‍ഐഎ ചോദ്യം ചെയ്യലില്‍ ശിവശങ്കര്‍ പറഞ്ഞതായി റിപ്പോർട്ട്. സ്വപ്ന സുരേഷിന്റെ കാര്യശേഷി ബോധ്യമായതോടെയാണു ചില ദൗത്യങ്ങള്‍ ഏല്‍പിച്ചത് എന്നും അദ്ദേഹം പറയുകയുണ്ടായി. എന്നാൽ സ്വപ്നയ്ക്കു സ്വര്‍ണക്കടത്തുമായി ബന്ധമുണ്ടെന്ന് അറിവില്ലായിരുന്നു. വേണമെങ്കില്‍ പവര്‍ ബ്രോക്കര്‍ എന്നു സംശയിക്കാമായിരുന്നു എന്നും, സംശയകരമായി മറ്റൊന്നും ഉണ്ടായിരുന്നില്ലെന്നാണു ശിവശങ്കറിന്റെ മൊഴി.

അതേസമയം സ്വർണ്ണക്കടത്തിൽ യുഎഇ കോൺസുലേറ്റ് ഉദ്യോ​ഗസ്ഥർക്കും പങ്കുണ്ടെന്നത് സംബന്ധിച്ച് സ്വപ്ന സുരേഷ് കസ്റ്റംസിന് മൊഴി നൽകിയാതായി റിപ്പോർട്ട്. സ്വർണ്ണം കടത്തിയത് കോൺസുൽ ജനറലിന്റെയും അറ്റാഷയുടെയും സഹായത്തോടെയാണ് എന്ന് സ്വപ്ന പറയുകയുണ്ടായി. എന്നാൽ മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം ശിവശങ്കറിന് സ്വർണ്ണക്കടത്തിൽ പങ്കില്ല. ശിവശങ്കറുമായി തനിക്ക് സൗഹൃദം മാത്രമാണുള്ളതെന്നും സ്വപ്ന മൊഴി നൽകിയതായി റിപ്പോർട്ട്.

ഒപ്പം കോൺസുൽ ജനറലിന്റെ സഹായത്തോടെയാണ് കടത്ത് തുടങ്ങിയത്. കൊവിഡ് തുടങ്ങിയപ്പോൾ കോൺസുൽ ജനറൽ നാട്ടിലേക്ക് മടങ്ങിയതായും പറയുകയുണ്ടായി. ഇതേതുടർന്ന് അറ്റാഷെയെ കടത്തിൽ പങ്കാളിയാക്കി. ഓരോ തവണ സ്വർണ്ണം കടത്തുമ്പോഴും കോൺസുൽ ജനറലിനും അറ്റാഷെയ്ക്കും 1500 ഡോളർ പ്രതിഫലം നൽകിയിരുന്നു. 2019 ജൂലൈ മുതൽ ജൂൺ 30 വരെ 18 തവണ സ്വർണം കടത്തിയതായും സ്വപ്ന മൊഴി നൽകിയതായും റിപ്പോർട്ട് ഉണ്ട്.

അതോടൊപ്പം തന്നെ സ്വർണം കടത്തിയ കേസുമായി ബന്ധപ്പെട്ട് തിങ്കളാഴ്ച കൊച്ചി എൻഐഎ ഓഫീസിൽ ചോദ്യം ചെയ്യലിന് എത്താനിരിക്കെ മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം ശിവശങ്കർ മുൻകൂർ ജാമ്യത്തിനായി ശ്രമിക്കുന്നതായി സൂചനയുണ്ട്. പ്രതികളായ സ്വപ്ന സുരേഷും സരിത്തുമായി തനിക്ക് വ്യക്തിപരമായ സൗഹൃദം മാത്രമാണുള്ളതെന്ന് എം ശിവശങ്കറും ഒപ്പം സ്വപ്നയും എൻഐഎയോട് ആവർത്തിച്ച് പറഞ്ഞതിനാൽ തന്നെ കൂടുതൽ സാധുത തേടുകയാണ് ശിവശങ്കർ.തിരുവനന്തപുരം പേരൂർക്കടയിലെ പൊലീസ് ക്ലബ്ബിൽ വച്ച് നടത്തിയ ചോദ്യം ചെയ്യലിലായിരുന്നു ശിവശങ്കറിന്‍റെ മൊഴി രേഖപ്പെടുത്തിയത്. എന്നാൽ ഈ സാഹചര്യത്തിലാണ് കേസിൽ മുൻകൂർ ജാമ്യഹർജി നൽകാനുള്ള നീക്കം എം ശിവശങ്കർ തുടങ്ങിയിരിക്കുന്നത്. ഇതേതുടർന്ന് കൊച്ചിയിലെ ഒരു മുതിർന്ന അഭിഭാഷകനുമായി മുൻകൂർ ജാമ്യവുമായി ബന്ധപ്പെട്ട കാര്യങ്ങൾ ശിവശങ്കർ സംസാരിച്ചെന്നാണ് സൂചന.