സ്വര്‍ണക്കടത്ത് കേസില്‍ യു.എ.ഇ കോണ്‍സുലേറ്റിലെ ഉന്നതരായ അറബികളെ പ്രതിക്കൂട്ടിലാക്കി പ്രതികളായ സ്വപ്ന സുരേഷ് ഉള്‍പ്പെടെയുള്ളവര്‍ മൊഴി നല്‍കിയത് നയതന്ത്ര പരിരക്ഷ മറയാക്കി രക്ഷപ്പെടാന്‍. അറബികളായ കോണ്‍സുലേറ്റ് ജനറലിനേയും അറ്റാഷെയേയും ചോദ്യം ചെയ്യുക അത്ര എളുപ്പമല്ല. അവരെ ചോദ്യം ചെയ്യാന്‍ കേന്ദ്ര സര്‍ക്കാരിന്റേയും എന്തിന് യുഎഇ സര്‍ക്കാരിന്റേയും അനുമതി വേണം. സ്വന്തം പൗരന്‍മാരെ ചോദ്യം ചെയ്യാനായി യുഎഇ അത്ര പെട്ടന്ന് വിട്ടുകൊടുക്കില്ല എന്ന് മനസിലാക്കിയാണ് പ്രതികളുടെ ഈ നീക്കമെന്നാണ് പറയുന്നത്. അതേസമയം തങ്ങളെ സംശയത്തിന്റെ നിഴലില്‍ നിര്‍ത്തുന്നതില്‍ അറബികള്‍ക്ക് വലിയ ദേഷ്യമുണ്ട്. തങ്ങളുടെ സത്യസന്ധത തെളിയിക്കേണ്ടത് അവരുടെ കൂടി ഉത്തരവാദിത്വമാണ്. അങ്ങനെ വന്നാല്‍ സത്യം മറനീക്കി പുറത്താക്കാന്‍ യുഎഇ മുന്നോട്ട് വരിക തന്നെ ചെയ്യും. ഇപ്പോള്‍ തന്നെ യു.എ.ഇയില്‍ ആഭ്യന്തര അന്വേഷണം നടക്കുന്നുണ്ട്.

മുഖ്യപ്രതി സ്വപ്ന സുരേഷും സന്ദീപ് നായരും കസ്റ്റംസിന് നല്‍കിയ മൊഴികളിലാണ് സ്വര്‍ണക്കടത്തിന് യു.എ.ഇ കോണ്‍സല്‍ ജനറലിന്റെയും അറ്റാഷെയുടെയും സഹായം ലഭിച്ചിരുന്നതായി വെളിപ്പെടുത്തിയത്.

വളരെ ബുദ്ധിപൂര്‍വമാണ് പ്രതികല്‍ ഈ പേര് പറഞ്ഞതെന്നാണ് അറിയുന്നത്. യു.എ.ഇ കോണ്‍സുലേറ്റ് ഉന്നതരുടെ പേരു പറഞ്ഞാല്‍ ഇരുരാജ്യവും തമ്മിലെ നയതന്ത്ര ബന്ധത്തെ ബാധിക്കും. ഇത് അന്വേഷണം മുന്നോട്ടുപോകുന്നതിനും പ്രതിബന്ധങ്ങള്‍ സൃഷ്ടിക്കും. അതു മുന്നില്‍ കണ്ടാണോ ശ്രമം എന്നാണ് സംശയം. അറസ്റ്റിലായപ്പോള്‍തന്നെ അറ്റാഷെക്കെതിരെ നടപടി എടുക്കാത്തതിനെ സന്ദീപ് ചോദ്യം ചെയ്തിരുന്നു. കസ്റ്റംസിന് മുന്നിലും സന്ദീപ് അത് ആവര്‍ത്തിച്ചു. സ്വപ്നയും സമാന മൊഴിയാണ് നല്‍കിയത്. അതേസമയം ശിവശങ്കറിന് കേസില്‍ ഒരുപങ്കുമില്ലെന്ന് സ്വപ്ന ശനിയാഴ്ചയും ആവര്‍ത്തിച്ചു. ശിവശങ്കറുമായി അടുത്ത സൗഹൃദമുണ്ട്. എന്നാലിത് സ്വര്‍ണക്കടത്തിന് ഉപയോഗപ്പെടുത്തിയിട്ടില്ലെന്നും സ്വപ്ന പറഞ്ഞു.

വെള്ളിയാഴ്ചയാണ് സ്വപ്നയെ എന്‍.ഐ.എ ഓഫിസിലെത്തി കസ്റ്റംസ് ചോദ്യം ചെയ്തത്. എന്‍.ഐ.എയുടെ ചോദ്യം ചെയ്യലില്‍ പറഞ്ഞ കാര്യങ്ങളാണ് കസ്റ്റംസിന് മുന്നിലും ഇവര്‍ ആവര്‍ത്തിച്ചത്. അതേസമയം, കോണ്‍സല്‍ ജനറല്‍, അറ്റാഷെ എന്നിവരുടെ സഹായം സ്വര്‍ണക്കടത്തിന് ലഭിച്ചതായി സ്വപ്‌ന വ്യക്തമാക്കിയിട്ടുണ്ട്.

ഓരോ തവണ സ്വര്‍ണം കടത്തുമ്പോഴും ഇവര്‍ക്ക് 1,500 ഡോളര്‍ വീതം നല്‍കിയിരുന്നു. 2019 ജൂലൈ മുതലാണ് സ്വര്‍ണക്കടത്ത് ആരംഭിച്ചത്. റമീസ്, സരിത്ത്, സന്ദീപ് എന്നിവരായിരുന്നു കള്ളക്കടത്തിന് പദ്ധതിയിട്ടത്. ഗള്‍ഫില്‍വെച്ചാണ് ഇവരെ പരിചയപ്പെട്ടത്. നയതന്ത്ര ചാനലിലൂടെയുള്ള കള്ളക്കടത്തായതിനാല്‍ കോണ്‍സല്‍ ജനറലിന്റെ സഹായം തേടിയാണ് അന്ന് കോണ്‍സല്‍ ജനറലിന്റെ എക്‌സിക്യൂട്ടിവ് സെക്രട്ടറിയായിരുന്ന തന്നെ ഇവര്‍ സമീപിച്ചത്. തുടര്‍ന്ന് അദ്ദേഹത്തെ കള്ളക്കടത്തില്‍ പങ്കാളിയാക്കി.

2019 ജൂലൈ മുതല്‍ ഈ വര്‍ഷം ജൂണ്‍ 30 വരെ 18 തവണ സ്വര്‍ണം കടത്തി. കോവിഡ് വ്യാപിച്ചതോടെ കോണ്‍സല്‍ ജനറല്‍ നാട്ടില്‍ പോയി. ഇതോടെ അവിടത്തെ ചുമതല അറ്റാഷെ ഏറ്റെടുത്തു. അദ്ദേഹത്തെയും സ്വര്‍ണക്കടത്തിന്റെ ഭാഗമാക്കിയെന്നും സ്വപ്‌ന മൊഴി നല്‍കി.

വിമാനത്താവളം വഴി സ്വര്‍ണം കടത്താന്‍ പ്രതികള്‍ 11 ഇടങ്ങളില്‍ ഒത്തുകൂടി പദ്ധതി തയാറാക്കിയെന്നാണ് എന്‍.ഐ.എ. കോടതിയില്‍ നല്‍കിയ റിപ്പോര്‍ട്ടില്‍ വെളിപ്പെടുത്തിയത്. പ്രതികള്‍ ഒത്തുകൂടിയതിന്റെ ദൃശ്യങ്ങള്‍ ലഭിച്ചതായും ഇത് പരിശോധിച്ചുവരുകയാണെന്നും റിപ്പോര്‍ട്ടില്‍ വ്യക്തമാക്കി. 11 ഇടങ്ങളില്‍ നടന്ന ഗൂഢാലോചനയില്‍ രണ്ടിടത്ത് എം. ശിവശങ്കറിന്റെ സാന്നിധ്യം എന്‍.ഐ.എ സംശയിക്കുന്നുണ്ട്. അതില്‍ വ്യക്തത വരുത്തുന്നതിന് വേണ്ടി കൂടിയാണ് അദ്ദേഹത്തെ വീണ്ടും ചോദ്യം ചെയ്യുന്നത്. ശിവശങ്കര്‍ താമസിച്ചിരുന്ന ഹെതര്‍ ഫ്‌ളാറ്റ്, സമീപത്തുള്ള നക്ഷത്ര ഹോട്ടല്‍, അമ്പലംമുക്കിലെ സ്വപ്നയുടെ ഫ്‌ളാറ്റ് എന്നിവിടങ്ങളിലുള്‍പ്പെടെ ഗൂഢാലോചന നടന്നു. സൗഹൃദ കൂട്ടായ്മ എന്ന പേരിലായിരുന്നു ഇവ പലതും. പക്ഷെ ഏത് തരത്തിലുള്ള സൗഹൃദ കൂട്ടായ്മയെന്ന് വരും ദിവസങ്ങളില്‍ പകല്‍ പോലെ വ്യക്തമാകും.