സര്‍ക്കാര്‍ മുന്‍ സെക്രട്ടറി എം. ശിവശങ്കറിനെ നാളെ കൊച്ചിയില്‍ ചോദ്യം ചെയ്യുമ്പോള്‍ ഒരു പാളീച്ചയും ഉണ്ടാകാതിരിക്കാന്‍ എന്‍ഐഎയുടെ മുന്നൊരുക്കങ്ങള്‍. അതീവ ഗൗരവമേറിയ കേസായതിനാല്‍ കേസ് അട്ടിമറിക്കപ്പെടാതിരിക്കാനായി രാജ്യ സുരക്ഷാ ഉപദേഷ്ടാവ് അജിത് ഡോവല്‍ നിരന്തരം നിരീക്ഷണം നടത്തി വരികയാണ്. കേസിലെ ചെറിയ പാളീച്ച പോലും ഉണ്ടാകാതിരിക്കാന്‍ എന്‍ഐഎയ്ക്ക് പൂര്‍ണ സ്വാതന്ത്ര്യമാണ് കേന്ദ്ര സര്‍ക്കാര്‍ നല്‍കിയിരിക്കുന്നത്. രാജ്യ സുരക്ഷയെ ബാധിക്കുന്ന കേസില്‍ ഭികര ബന്ധം ഉണ്ടോയെന്ന് ഇനിയുള്ള ദിവസങ്ങളിലെ ചോദ്യം ചെയ്യലുകള്‍ നിര്‍ണായകമാകും.

ശക്തനായ ഒരു ഐഎഎസ് ഉദ്യോഗസ്ഥനെയാണ് ചോദ്യം ചെയ്യുന്നതിനാല്‍ വലിയ മുന്നൊരുക്കങ്ങളാണ് എന്‍ഐഎ നടത്തിയിരിക്കുന്നത്. കൊച്ചി യൂണിറ്റില്‍ ഒരുക്കിയ പ്രത്യേക മുറിയിലായിരിക്കും ചോദ്യം ചെയ്യുക. ന്യൂഡല്‍ഹി, ഹൈദരാബാദ് എന്‍ഐഎ യൂണിറ്റുകളിലെ വിദഗ്ധരായ ഉദ്യോഗസ്ഥരും ഇതിനായി ഇന്നു കൊച്ചിയിലെത്തും. സ്വര്‍ണം പിടികൂടിയ കസ്റ്റംസ് ഉദ്യോഗസ്ഥരുടെ സാന്നിധ്യവും ഉറപ്പാക്കിയിട്ടുണ്ട്.

കേസില്‍ കസ്റ്റംസ്, എന്‍ഐഎ സംഘങ്ങളും രഹസ്യാന്വേഷണ വിഭാഗങ്ങളും കണ്ടെത്തിയ വിവരങ്ങളും അറസ്റ്റിലായ പ്രതികളുടെ മൊഴികളും പഠിച്ച ശേഷം തയാറാക്കിയ ചോദ്യാവലിയാണു ശിവശങ്കറിനെ കാത്തിരിക്കുന്നത്.

കസ്റ്റംസ് അന്വേഷിക്കുന്ന സ്വര്‍ണക്കടത്തു കേസില്‍ അദ്ദേഹം പ്രതിയാകുമോ അതോ എന്‍ഐഎ അന്വേഷിക്കുന്ന ഭീകരപ്രവര്‍ത്തന കേസില്‍ മുഖ്യസാക്ഷിയാകുമോ എന്നറിയാന്‍ ചോദ്യം ചെയ്യല്‍ പൂര്‍ത്തിയാകണം. സ്വര്‍ണക്കടത്തിനും ഭീകര പ്രവര്‍ത്തനത്തിനും ബോധപൂര്‍വം സഹായിക്കുമെന്നു കരുതുന്നില്ലെന്നും പിന്നെ എന്തുകൊണ്ട് ഇതു സംഭവിച്ചുവെന്നു ശിവശങ്കര്‍ തന്നെ വ്യക്തമാക്കണമെന്നും മുതിര്‍ന്ന എന്‍ഐഎ ഉദ്യോഗസ്ഥന്‍ തിരുവനന്തപുരത്തെ ചോദ്യംചെയ്യലില്‍ പറഞ്ഞു. ഇതോടെ വികാരാധീനനായ ശിവശങ്കറിന് ആലോചിച്ചു മറുപടി നല്‍കാന്‍ അന്വേഷണ സംഘം കൂടുതല്‍ സമയം അനുവദിക്കുകയായിരുന്നു.

അതേസമയം ശിവശങ്കറെ കാത്തിരിക്കുന്നത് കടുപ്പമേറിയ ചോദ്യങ്ങളാണ്. കസ്റ്റംസിന് നല്‍കിയ മൊഴിയിലും കഴിഞ്ഞദിവസം എന്‍ഐഎക്ക് നല്‍കിയ മറുപടികളിലും കാര്യമായ വൈരുധ്യമുള്ളതിനാല്‍ ഉത്തരങ്ങള്‍ ഏറെ നിര്‍ണായകമാകും. ശിവശങ്കര്‍ സ്വര്‍ണക്കടത്തു സംഘത്തിനു താവളമൊരുക്കി നല്‍കിയെന്ന നിലപാടിലാണ് അന്വേഷണസംഘം. അവിടെ വച്ച് സംഘം സ്വര്‍ണക്കൈമാറ്റം നടത്തിയതിന് ഉള്‍പ്പെടെ തെളിവുകളുണ്ട്. കഴിഞ്ഞദിവസത്തെ ചോദ്യം ചെയ്യലില്‍ ഒരു മുതിര്‍ന്ന ഉദ്യോഗസ്ഥനെന്ന നിലയ്ക്കുള്ള മറുപടികളാണു ശിവശങ്കര്‍ നല്‍കിയതെങ്കില്‍ തിങ്കളാഴ്ച അതല്ല തങ്ങള്‍ക്കു വേണ്ടതെന്ന സൂചനയാണ് അന്വേഷണസംഘം നല്‍കുന്നത്.

അതേസമയം എന്‍.ഐ.എയുടെ അടുത്ത നീക്കത്തില്‍ ഉറ്റുനോക്കുകയാണ് രാഷ്ട്രീയകേരളം. അറസ്റ്റ് ചെയ്താലും വിട്ടയച്ചാലും അത് നിര്‍ണായക രാഷ്ട്രീയവഴിത്തിരിവാകും. വിട്ടയച്ചാല്‍ സി.പി.എമ്മിനും സംസ്ഥാനസര്‍ക്കാരിനും താല്‍ക്കാലികാശ്വാസമാവും. അറസ്റ്റുണ്ടായാല്‍ യു.ഡി.എഫും ബി.ജെ.പിയും സര്‍ക്കാരിന് നേരെയുള്ള ആക്രമണം തീവ്രമാക്കും. തദ്ദേശതിരഞ്ഞെടുപ്പിലേക്ക് നീങ്ങുന്ന കേരളരാഷ്ട്രീയത്തെ കലുഷിതമാക്കുന്ന വിഷയമാണ് ശിവശങ്കര്‍വിവാദം.

കേസന്വേഷണത്തിന്റെ ഭാഗമായി ശിവശങ്കറിന് എന്ത് സംഭവിച്ചാലും അത് അദ്ദേഹത്തിന്റെ വ്യക്തിപരമായ വിഷയം മാത്രമാണെന്നും പാര്‍ട്ടിക്കോ സര്‍ക്കാരിനോ ഒന്നുമില്ലെന്നും കഴിഞ്ഞ ദിവസം സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ അഭിപ്രായപ്പെട്ടിരുന്നു. എങ്കിലും മുഖ്യമന്ത്രിയുടെ സെക്രട്ടറിയായിരുന്ന വ്യക്തി ഇത്തരം കേസില്‍ ഉള്‍പ്പെട്ടത് വലിയ ചര്‍ച്ചയാകും. അതിനാല്‍ തന്നെ നാളത്തെ ദിവസം ശിവശങ്കറിനുള്ളതാണ്.