ചൈന ലോകത്തിനുണ്ടാക്കിയ ടെന്‍ഷന്‍ ചെറുതല്ല. ചൈനയിലെ വുഹാനില്‍ നിന്നാണ് കൊറോണ വൈറസ് ലോകമെങ്ങും പടര്‍ന്ന് പിടിച്ചത്. ചൈനയാകട്ടെ കൊറോണയില്‍ നിന്നും മുക്തരായി. ലോകത്തെ മറ്റ് രാഷ്ട്രങ്ങള്‍ ഇപ്പോഴും കൊറോണ കാരണം ബുദ്ധിമുട്ടുകയാണ്. ചൈനയ്ക്ക് ഈ വൈറസിനെ മറ്റ് സ്ഥലങ്ങളിലേക്ക് പകരാതെ പിടിച്ച് നിര്‍ത്താമായിരുന്നു. മാത്രമല്ല ഈ ദുരിതത്തിനിടയില്‍ ചൈന അയല്‍ രാജ്യങ്ങളെ പ്രകോപിപ്പിക്കുകയുമാണ്. എന്തിന് ഇന്ത്യയുടെ അതര്‍ത്തിയില്‍ പോലും അവര്‍ സംഘര്‍ഷം സൃഷ്ടിച്ചു. നിരവധി ജവാന്‍മാരുടെ വീരമൃത്യുവിലും അത് കലാശിച്ചു. ഇതിനൊക്കെ പ്രതികാരം ചെയ്യാനായി ഇന്ത്യ കാത്തിരിക്കുകയാണ്. ചൈനയുടെ വ്യവസായത്തിന്റെ അടിത്തറയിളക്കി ചൈനീസ് ആപ്പുകള്‍ നിരോധിച്ചു. ഇതോടെ ചൈനീസ് കമ്പനികള്‍ ചൈനയ്ക്ക് നേരെ തിരിഞ്ഞിരിക്കുകയാണ്.

കൊറോണ വൈറസ് ചൈനയുടെ സൃഷ്ടിയാണെന്നാണ് അമേരിക്ക അന്നും ഇന്നും പറയുന്നത്. ആയിരക്കണക്കിന് അമേരിക്കക്കാരുടെ മരണത്തിന് ഉത്തരവാദി ചെനയെന്ന വ്യാപക പ്രചാരമാണ് നടക്കുന്നത്. ഇത് തുറന്ന് കാട്ടി ലോകാരോഗ്യ സംഘടനയിലെ സാമ്പത്തിക സഹായം പോലും അമേരിക്ക ഉപേക്ഷിച്ചു. മാത്രമല്ല ഇപ്പോള്‍ ചൈനക്കെതിരെ തീവ്രനിലപാടുമായി അമേരിക്ക രംഗത്തെത്തിയിരിക്കുകയാണ്. ചൈനയ്ക്ക് യാതൊരു വിധത്തിലുള്ള നയതന്ത്ര പരിരക്ഷയും നല്‍കില്ലെന്ന് വ്യക്തമാക്കിയതിന് പിന്നാലെ ഹൂസ്റ്റണിലെ ചൈനീസ് കോണ്‍സുലേറ്റ് ബലമായി അടച്ചുപൂട്ടി.

ചൈനീസ് കോണ്‍സുലേറ്റ് അടച്ചു പൂട്ടാന്‍ 72 മണിക്കൂറാണ് അമേരിക്ക സമയം അനുവദിച്ചത്. എന്നാല്‍, ഇതിന് ശേഷവും പ്രവര്‍ത്തനം തുടര്‍ന്ന കോണ്‍സുലേറ്റിലേക്ക് അമേരിക്കന്‍ പോലീസെത്തുകയും തുടര്‍ന്ന് നയതന്ത്ര പ്രതിനിധികളെയടക്കം ബലമായി പുറത്താക്കിയ ശേഷം ഓഫീസ് പൂട്ടിക്കുകയായിരുന്നു.

ചൈനീസ് ഹാക്കര്‍മാര്‍ കോവിഡ് വാക്‌സിന്‍ ഗവേഷണ വിവരങ്ങള്‍ ചോര്‍ത്തുന്നുവെന്ന യുഎസ് ജസ്റ്റിസ് വകുപ്പിന്റെ മുന്നറിയിപ്പിനെ തുടര്‍ന്നാണു അമേരിക്കയുടെ കടുത്ത നടപടി. വാഷിങ്ടനിലെ എംബസിക്കു പുറമെ അമേരിക്കയില്‍ അഞ്ച് ചൈനീസ് കോണ്‍സുലേറ്റുകളാണുള്ളത്. അതിലൊന്നാണ് ടെക്‌സസിലെ ഹൂസ്റ്റണിലുള്ളത്.

ഹൂസ്റ്റണിലുള്ള ചൈനീസ് കോണ്‍സുലേറ്റ് അടച്ചു പൂട്ടണമെന്ന് ചൈനയോട് ദിവസങ്ങള്‍ക്ക് മുന്‍പാണ് അമേരിക്ക ആവശ്യപ്പെട്ടത്. കോവിഡ് രോഗബാധയുടെ പശ്ചാത്തലത്തില്‍ വഷളായ അമേരിക്ക ചൈന ബന്ധത്തില്‍ കൂടുതല്‍ വിള്ളല്‍ വീഴ്ത്തുന്നതായിരുന്നു യുഎസിന്റെ അപ്രതീക്ഷിത നീക്കം. അതേസമയം തങ്ങളുടെ രാജ്യത്തെ അമേരിക്കന്‍ കോണ്‍സുലേറ്റ് അടച്ചു പൂട്ടണമെന്ന് ആവശ്യപ്പെട്ട് ചൈനയും രംഗത്തെത്തി.

പടിഞ്ഞാറന്‍ നഗരമായ ചെങ്ഡുവിലെ കോണ്‍സുലേറ്റ് അടച്ചുപൂട്ടാന്‍ ചൈന വെള്ളിയാഴ്ചയാണ് അമേരിക്കയോട് ഉത്തരവിട്ടത്. ഇരു രാജ്യങ്ങളും തമ്മിലുള്ള ബന്ധം അനുദിനം വഷളാകുന്ന സാഹചര്യത്തില്‍ ചൈനയുടെ ഈ പ്രതികാരം കാര്യങ്ങള്‍ കൂടുതല്‍ പ്രതിസന്ധിയിലേക്ക് എത്തിക്കും.

ടെക്‌സസിലെ മെഡിക്കലടക്കമുള്ള ഗവേഷണ വിവരങ്ങള്‍ മോഷ്ടിക്കാന്‍ ചൈനീസ് ഏജന്റുമാര്‍ ശ്രമിക്കുന്നതായി വാഷിങ്ന്‍ ആരോപിച്ചിരുന്നു. ഇതിന് പിന്നാലെയാണ് ഹൂസ്റ്റണിലെ കോണ്‍സുലേറ്റ് അടച്ചുപൂട്ടിയത്.

അമേരിക്കയുടെ തെറ്റായ തീരുമാനം ഉടനടി പിന്‍വലിക്കാനും ഉഭയകക്ഷി ബന്ധം വീണ്ടും സൗഹാര്‍ദ്ദ പരമാക്കുന്നതിനും നടപടികള്‍ സ്വീകരിക്കണമെന്നാണ് ചൈന നിരന്തരം വ്യക്തമാക്കിയത്. എന്നാല്‍ ചൈനയുമായി ഒരു ബന്ധവും വേണ്ടെന്ന നിലപാടില്‍ ട്രംപ് ഉറച്ച് നിന്നതോടെയാണ് കോണ്‍സുലേറ്റ് അടച്ചുപൂട്ടിയത്. എന്തായാലും ചൈനയുടെ അടുത്ത നീക്കം നിര്‍ണായകമാണ്.