കഴിഞ്ഞ ദിവസമാണ് കേരളവും കര്‍ണാടകയും ഐഎസിന്റെയും അല്‍ഖ്വയ്ദയുടെയും ഹബ് ആയി മാറുകയാണ് എന്നുള്ള റിപ്പോര്‍ട്ട് ഐക്യ രാഷ്ട്ര സംഘടന പുറത്തുവിട്ടത്. എന്നാല്‍ ഈ റിപ്പോര്‍ട്ട് ഒരു വര്‍ഷം മുമ്പുതന്നെ കേന്ദ്ര ഇന്റലിജന്‍സ് പുറത്തുവിട്ടതാണ് ഇതിന്മേലുള്ള നിരീക്ഷണങ്ങളും ഇപ്പോള്‍ നടന്നു വരികയാണ് ഇതിന്റെ അടിസ്ഥാനത്തില്‍
കേരളത്തില്‍നിന്ന് നൂറ്റിയിരുപതോളം പേര്‍ ഐ.എസില്‍ ചേരുകയോ ചേരാന്‍ ശ്രമിക്കുകയോ ചെയ്യുന്നതായാണ് അന്വേഷണ ഏജന്‍സികള്‍ വിലയിരുത്തിയത്. അതെല്ലാം ശരിവെക്കുന്നതാണ് ഐക്യരാഷ്ട്രസഭയുടെ റിപ്പോര്‍ട്ട് കഴിഞ്ഞ ദിവസം പുറത്തുവന്ന റിപ്പോര്‍ട്ടും.

2018-ല്‍ ഐ.എസിന് സിറിയയിലും ഇറാഖിലും തിരിച്ചടി നേരിടുമ്പോഴും കേരളത്തില്‍നിന്ന് 10 പേര്‍ അവിടേക്ക് പോയി. 2016 മേയ്-ജൂലായ് കാലയളവിലാണ് കേരളത്തില്‍നിന്ന് 21 പേരെ കാണാതായത്. ആറു സ്ത്രീകളും മൂന്നു കുട്ടികളും ഇക്കൂട്ടത്തിലുണ്ടായിരുന്നു. ഇവരില്‍ 17 പേരും കാസര്‍കോട് സ്വദേശികളായിരുന്നു. ഇവരെല്ലാം ഇസ്ലാമിക് സ്റ്റേറ്റില്‍ ചേരാന്‍ വിദേശത്തേക്കു പോയതാണെന്ന് പിന്നീട് എന്‍.ഐ.എ. (ദേശീയ അന്വേഷണ ഏജന്‍സി) കണ്ടെത്തി.

കാസര്‍കോടുനിന്ന് പോയവരെല്ലാം അഫ്ഗാനിസ്താനിലാണ് എത്തിച്ചേര്‍ന്നത്. ഐ.എസിന്റെ കാസര്‍കോട് ഘടകം കേരളത്തില്‍ പ്രവര്‍ത്തിക്കുന്നുണ്ടെന്ന് എന്‍.ഐ.എ. കണ്ടെത്തി. കൂടാതെ ഒമര്‍ അല്‍ ഹിന്ദി ഘടകം, കണ്ണൂര്‍ ഘടകം എന്നിങ്ങനെ രണ്ടു വിഭാഗങ്ങളും സജീവമാണെന്നു മനസ്സിലാക്കി. കണ്ണൂര്‍ ഘടകത്തില്‍ ചിലര്‍ സിറിയയില്‍ പോകാന്‍ ശ്രമിച്ചെന്നും വ്യക്തമായി. ഐ.എസില്‍ ചേരാന്‍ പോയവരില്‍ പലരും ഇക്കാലത്തിനിടെ കൊല്ലപ്പെട്ടിരിക്കാം എന്നാണു കരുതുന്നത്. മലപ്പുറത്തുനിന്നുള്ള എന്‍ജിനിയറിങ് വിദ്യാര്‍ഥിയായ മുഹമ്മദ് മുഹ്‌സിന്റെ കുടുംബത്തിന് മകന്‍ മരിച്ചതായി 2019 ഓഗസ്റ്റില്‍ സന്ദേശം ലഭിച്ചു. അഫ്ഗാനിസ്താനില്‍ അമേരിക്ക നടത്തിയ ഡ്രോണ്‍ ആക്രമണത്തില്‍ മുഹ്‌സിന്‍ കൊല്ലപ്പെട്ടു എന്നായിരുന്നു സന്ദേശം.

കഴിഞ്ഞവര്‍ഷം അവസാനം അഫ്ഗാനിസ്താനിലെ നംഗര്‍ഹാര്‍ പ്രവിശ്യയില്‍ 600 ഭീകരര്‍ കീഴടങ്ങിയകൂട്ടത്തില്‍ മലയാളികളുമുണ്ടെന്ന് റിപ്പോര്‍ട്ടുണ്ടായിരുന്നു. 2016-ല്‍ അഫ്ഗാനിസ്താനില്‍ പോയ സംഘത്തിലെ അംഗമായ ഫാത്തിമയെന്ന നിമിഷയും ആയിഷയെന്ന സോണിയ സെബാസ്റ്റ്യനും കേരളത്തിലേക്ക് തിരിച്ചുവരാന്‍ ആഗ്രഹിക്കുന്നെന്ന് പറയുന്ന വീഡിയോ ഇക്കൊല്ലം മാര്‍ച്ചില്‍ പ്രചരിച്ചു. എന്നാല്‍, പിന്നീട് ഇവരെക്കുറിച്ചോ ഈ വീഡിയോയുടെ വാസ്തവത്തെക്കുറിച്ചോ വിവരമുണ്ടായില്ല.