സ്വര്‍ണക്കടത്തുമായി ബന്ധപ്പെട്ട് യു എ ഇ കോണ്‍സല്‍ ജനറലിന്റെ മുന്‍ ഗണ്‍മാനായ എസ്.ആര്‍.ജയഘോഷിനെ കസ്റ്റംസ് കൊച്ചിയിലെത്തിച്ച് ചോദ്യം ചെയ്യും. നേരത്തേയും ഇയാളെ ചോദ്യം ചെയ്തിരുന്നു. മൊഴികളില്‍ പൊരുത്തക്കേട് വ്യക്തമായതോടെയാണ് വീണ്ടും ചോദ്യം ചെയ്യുന്നത്.
സ്വര്‍ണം അടങ്ങിയ ബാഗ് കസ്റ്റംസ് പിടിച്ചുവച്ചതിനുശേഷം ഇയാള്‍ നിരന്തരം സ്വപ്നയെയും സന്ദീപിനെയും വിളിച്ചിരുന്നതായി വ്യക്തമായിരുന്നു. ഇതെന്തിനാണെന്ന് ഇയാള്‍ വ്യക്തമാക്കിയിട്ടില്ല എന്നാണറിയുന്നത്. ജയഘോഷിന്റെ നിയമനമുള്‍പ്പടെയുളള കാര്യങ്ങള്‍ അന്വേഷണത്തിന്റെ പരിധിയാലെന്നാണ് കസ്റ്റംസ് പറയുന്നത്.

നേരത്തേ ആത്മഹത്യാശ്രമത്തെത്തുടര്‍ന്ന് ആശുപത്രിയിലായ ഇയാളില്‍ നിന്ന് ഐ ബി ഉള്‍പ്പടെ ഉളളവര്‍ മൊഴികള്‍ രേഖപ്പെടുത്തിയിരുന്നു. ജയഘോഷ് ഇപ്പോള്‍ സസ്‌പെന്‍ഷനിലാണ്. ജയഘോഷിന്റെ നിയമനം ചട്ടവിരുദ്ധമാണെന്ന് ആരോപിച്ച് പ്രതിപക്ഷം രംഗത്തെത്തിയിട്ടുണ്ട്. ജയഘോഷിന്റെ നിയമനത്തിന് പിന്നില്‍ പ്രവര്‍ത്തിച്ചവര്‍ക്കെതിരെ നടപടിയെടുക്കമെന്നാണ് പ്രതിപക്ഷം ആവശ്യപ്പെടുന്നത്.