സര്‍ക്കാരിനെതിരെ യാക്കോബായ സഭ; കോവിഡ് കാലത്തും പോലീസിനെ ഉപയോഗിച്ച് സര്‍ക്കാര്‍ പള്ളികള്‍ പിടിച്ചെടുക്കുന്നുവെന്ന് ആരോപണം; ഓര്‍ത്തഡോക്‌സ്-യാക്കോബായ സഭകളുടെ യോജിപ്പ് സംബന്ധിച്ച ചര്‍ച്ചകള്‍ അടഞ്ഞ അധ്യായമെന്നും ജോസഫ് മാര്‍ ഗ്രിഗോറിയോസ് മെത്രാപ്പൊലീത്ത
ഓര്‍ത്തഡോക്‌സ്-യാക്കോബായ സഭ തര്‍ക്കതിനിടെ സര്‍ക്കാര്‍ തങ്ങളുടെ പള്ളികള്‍ കോവിഡ് കാലത്തും സര്‍ക്കാര്‍ പോലീസിനെ ഉപയോഗിച്ച് പിടിച്ചെടുക്കാന്‍ ശ്രമിക്കുന്നുവെന്ന ആരോപണവുമായി യാക്കോബായ സഭ രംഗത്ത്. കോവിഡ് കാലമാണന്നതുപോലും പരിഗണിക്കാതെ പളളികള്‍ പിടിച്ചെടുക്കുന്ന നിലപാട് അവസാനിപ്പിക്കണം. മുള്ളരിങ്ങാട് പളളി ഓര്‍ത്തഡോക്‌സ് വിഭാഗത്തിന് കൈമാറാന്‍ ഇടുക്കി ജില്ലാ ഭരണകൂടം അതിരുവിട്ട കടന്നുകയറ്റം നടത്തിയെന്നും യാക്കോബായ സഭാ മെത്രാപ്പൊലീത്തന്‍ ട്രസ്റ്റി ജോസഫ് മാര്‍ ഗ്രിഗോറിയോസ് മെത്രാപ്പൊലീത്ത.
ഓര്‍ത്തഡോക്‌സ്-യാക്കോബായ സഭകളുടെ യോജിപ്പ് സംബന്ധിച്ച ചര്‍ച്ചകള്‍ അടഞ്ഞ അധ്യായണ്. കോവിഡ് കാലത്ത് പളളികള്‍ പിടിച്ചെടുക്കാന്‍ സര്‍ക്കാര്‍ പോലീസിനെ നിയോഗിക്കരുത്. സഭകളുടെ യോജിപ്പ് സംബന്ധിച്ച ഐക്യചര്‍ച്ചകള്‍ക്ക് ഇനി പ്രസക്തിയില്ലന്ന് യാക്കോബായ സഭയിലെ വിശ്വാസികളും മെത്രൊപ്പൊലീത്തമാരുമെല്ലാം ചിന്തിക്കുന്നതായി അദ്ദേഹം പറഞ്ഞു. വിശ്വാസപരമായ കാരണങ്ങളാല്‍ത്തന്നെ ഇനി ഇക്കാര്യത്തില്‍ ചര്‍ച്ചയില്ലന്ന് തുറന്നുപറയേണ്ടി വരുന്നതായി അദേഹം വ്യക്തമാക്കി. സെമിത്തേരികള്‍ ഉപയോഗിക്കുന്ന കാര്യത്തില്‍ സര്‍ക്കാര്‍ ഇച്ഛാശക്തിയോടെ തീരുമാനമെടുത്തു. സര്‍ക്കാര്‍ കോടതിയില്‍ കാര്യങ്ങള്‍ അവതരിപ്പിക്കുന്നുവങ്കിലും കോടതികള്‍ നിര്‍ബന്ധ ബുദ്ധിയിലാണ്. കോടതിവിധിയുടെ പശ്ചാത്തലത്തിലാണങ്കില്‍ക്കൂടി, ഇടുക്കി മുളളരിങ്ങാട് പളളി ഓര്‍ത്തഡോക്‌സ് വിഭാഗത്തിന് കൈമാറാന്‍ ഇടുക്കി ജില്ലാ ഭരണകൂടത്തിന്റെ ഭാഗത്തുനിന്ന് അതിരുവിട്ട കടന്നുകയറ്റം ഉണ്ടായെന്നും മെത്രാപ്പൊലീത്തന്‍ ട്രസ്റ്റി ആരോപിച്ചു.
അതെസമയം യാക്കോബായ സഭയുടെ കൈവശമുള്ള എല്ലാ പള്ളികളുടേയും അവകാശം തങ്ങള്‍ക്കാണെന്ന് ഓര്‍ത്തഡോക്‌സ് സഭ പറയുന്നത്. അവകാശം സ്ഥാപിച്ച് കിട്ടാനായി സുപ്രീം കോടതിയില്‍ ഓര്‍ത്തഡോക്‌സ് സഭ ഇടക്കാല ഹര്‍ജി നല്‍കുകയും ചെയ്തിരുന്നു. മുമ്പ് സുപ്രീംകോടതി വിധി പറഞ്ഞ് കേസില്‍ ഉള്‍പ്പെടാത്ത പള്ളികളുടെ പട്ടിക തയ്യാറാക്കിയാണ് പുതിയ ഹര്‍ജി സമര്‍പ്പിച്ചിരിക്കുന്നത്. ഒരു വശത്ത് സമാധാന നീക്കത്തിനുള്ള ശ്രമങ്ങള്‍ പുരോഗമിക്കവെയാണ് ഓര്‍ത്തഡോക്‌സ് സഭാ അധ്യക്ഷന്‍മാരുടെ പുതിയ നീക്കം. യാക്കോബായ സഭയേയും തര്‍ക്ക പരിഹാരത്തിന് ശ്രമം നടത്തുന്ന സര്‍ക്കാരിനേയും ഒരു പോലെ വെട്ടിലാക്കുന്നതാണ് ഓര്‍ത്തഡോക്‌സ് സഭയുടെ നടപടി. കേസുണ്ടായിരുന്ന 1064 പള്ളികളുടെ അവകാശം ഓര്‍ത്തഡോക്‌സ് സഭയ്ക്ക് നല്‍കുന്നതായിരുന്നു 2017ലെ സുപ്രീം കോടതി വിധി. ഓര്‍ത്തഡോക്‌സ് സഭയുടെ 1934ലെ ഭരണ ഘടന അംഗീകരിക്കുകയും ഭൗതിക സ്വത്തവകാശം ഓര്‍ത്തഡോക്‌സ് സഭയ്ക്കാണെന്നുമായിരുന്നു സുപ്രീം കോടതി വിധി. ഇതോടെ സംസ്ഥാനത്ത്, പ്രത്യേകിച്ച് മധ്യ തിരുവിതാംകൂറില്‍ തര്‍ക്കം നിലനിന്നിരുന്ന 1064 പള്ളികളുടെ ഉടമസ്ഥത ഓര്‍ത്തഡോക്‌സ് വിഭാഗത്തിനായി. വിധി വന്നതിന് ശേഷവും തര്‍ക്കം പരിഹരിക്കപ്പെട്ടില്ല. ഇപ്പോഴും വിവിധ പള്ളികളില്‍ തര്‍ക്കവും സംഘര്‍ഷവും തുടരുകയാണ്.
https://www.facebook.com/Malayalivartha
