ഇന്നത്തെ ദിവസം നെഞ്ചിടിപ്പിന്റേതാണ്. സര്‍ക്കാര്‍ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കര്‍ എന്‍ഐഎയ്ക്ക് മുന്നില്‍ ഹാജരാകുകയാണ്. പൂജപ്പുര വീട്ടില്‍ നിന്നും രാവിലെ 4.30ന് ശിവശങ്കര്‍ എറണാകുളത്തേയ്ക്ക് പുറപ്പെട്ടു. തിങ്കളാഴ്ച എന്‍.ഐ.എ.യുടെ കൊച്ചി ഓഫീസില്‍ രാവിലെ ഹാജരാകണമെന്നാണ് ശിവശങ്കറിനോട് നിര്‍ദേശിച്ചിട്ടുള്ളത്. ശിവശങ്കറിനെ ചോദ്യം ചെയ്യാനായി വിപുലമായ സംവിധാനങ്ങളാണ് കൊച്ചി എന്‍ഐഎ ആസ്ഥാനത്ത് ഒരുക്കിയിരിക്കുന്നത്.

എന്‍.ഐ.എ.യുടെ പ്രത്യേകസംഘം കൊച്ചിയിലെത്തിയിട്ടുണ്ട്. എന്‍.ഐ.എ. കൊച്ചി യൂണിറ്റിനൊപ്പം ഡല്‍ഹി, ഹൈദരാബാദ് എന്നിവിടങ്ങളില്‍നിന്നെത്തിയ ഉദ്യോഗസ്ഥരും അടങ്ങിയ പ്രത്യേക സംഘമാകും ശിവശങ്കറിനെ ചോദ്യംചെയ്യുക. 56 ചോദ്യങ്ങള്‍ അന്വേഷണസംഘം തയ്യാറാക്കിയിട്ടുണ്ടെന്നാണ് അറിയുന്നത്.

എന്‍.ഐ.എ.യുടെ കൊച്ചി ഓഫീസില്‍ പ്രത്യേകം തയ്യാറാക്കിയ മുറിയിലാകും ചോദ്യംചെയ്യല്‍. ഇത് വീഡിയോയില്‍ പകര്‍ത്തും. ചില ഫോണ്‍കോളുടെയും ദൃശ്യങ്ങളുടെയും വിവരങ്ങള്‍ സഹിതമാകും ചോദ്യംചെയ്യല്‍.

കേസിലെ പ്രതികളായ സ്വപ്നയെയും സരിത്തിനെയും അറിയാമെന്നും സൗഹൃദം മാത്രമാണ് ഇവരോടുണ്ടായിരുന്നതെന്നുമാണ് ശിവശങ്കര്‍ നേരത്തേ തിരുവനന്തപുരത്തുനടന്ന ചോദ്യംചെയ്യലില്‍ എന്‍.ഐ.എ.യോട് പറഞ്ഞിരുന്നത്. ശിവശങ്കര്‍ എന്‍.ഐ.എ.യ്ക്കും കസ്റ്റംസിനും നല്‍കിയ മൊഴികളില്‍ വൈരുധ്യമുള്ളതായി സൂചനയുണ്ട്. ഇക്കാര്യത്തിലും വിശദീകരണം തേടും.

യു.എ.ഇ. കോണ്‍സുലേറ്റ് ജനറലിന്റെ ഗണ്‍മാനായിരുന്ന ജയഘോഷിനെ പ്രതിപ്പട്ടികയില്‍ ചേര്‍ക്കാനും നീക്കമുണ്ട്. സ്വപ്നയെയും സന്ദീപിനെയും സരിത്തിനെയും പല ഘട്ടങ്ങളിലും ജയഘോഷ് സഹായിച്ചിട്ടുണ്ടെന്നാണ് എന്‍.ഐ.എ. കണ്ടെത്തിയിരിക്കുന്നത്. ജയഘോഷിനെ കൊച്ചിയിലേക്ക് വിളിച്ചുവരുത്തി ചോദ്യംചെയ്തശേഷം പ്രതിപ്പട്ടികയില്‍ ഉള്‍പ്പെടുത്തുമെന്നാണ് അറിയുന്നത്.

അതേസമയം ശിവശങ്കറിനെ കാത്തിരിക്കുന്നതു രാഷ്ട്രീയ കേരളത്തെ പിടിച്ചുലയ്ക്കാവുന്ന ചോദ്യങ്ങളുമുണ്ടെന്നാണ് അറിയുന്നത്. നയതന്ത്ര ബാഗേജിലെ സ്വര്‍ണക്കടത്ത് പ്രതികളുമായുള്ള ബന്ധത്തിനു പുറമേ സ്പ്രിന്‍ക്ലര്‍ ഡേറ്റ ചോര്‍ച്ച, െ്രെപസ് വാട്ടര്‍ഹൗസ് കൂപ്പേഴ്‌സ് (പിഡബ്ല്യുസി) കരാറുകള്‍ തുടങ്ങിയവയും എന്‍ഐഎ ചോദ്യാവലിയില്‍ ഉള്‍പ്പെടുത്തും.

ഇവയ്ക്കുള്ള മറുപടികള്‍ സ്വര്‍ണത്തിനപ്പുറത്തേക്കുള്ള അന്വേഷണത്തിനു വഴിതുറക്കുമോ എന്നാണ് എന്‍ഐഎ പരിശോധിക്കുന്നത്. കേസിലെ സൂത്രധാരന്‍ കെ.ടി.റമീസ് 2019ല്‍ 6 തോക്ക് കടത്തിയ കേസ് പുനരന്വേഷിക്കാനുള്ള നടപടികളും എന്‍ഐഎ ആരംഭിച്ചു.

സ്വര്‍ണക്കടത്തു കേസില്‍ തിരുവനന്തപുരത്തെത്തി ശിവശങ്കറിനെ കസ്റ്റംസ് 9 മണിക്കൂറും എന്‍ഐഎ 5 മണിക്കൂറും ചോദ്യം ചെയ്തിരുന്നു. തുടര്‍ന്നാണ് ഇന്നു കൊച്ചി ഓഫിസിലെത്താന്‍ നിര്‍ദേശിച്ചത്. യുഎപിഎ കേസില്‍ മുതിര്‍ന്ന ഐഎഎസ് ഉദ്യോഗസ്ഥനെ എന്‍ഐഎ ഓഫിസിലേക്കു വിളിച്ചു വരുത്തി ചോദ്യം ചെയ്യുന്നത് ആദ്യമാണ്.

സംസ്ഥാന സര്‍ക്കാരിനു വേണ്ടി ശിവശങ്കര്‍ ചെയ്ത ജോലികള്‍, സ്വര്‍ണക്കടത്തു കേസിലെ പ്രതികളുമായി വ്യക്തിപരമായ അടുപ്പമുണ്ടാക്കാന്‍ വഴിയൊരുക്കിയ സാഹചര്യം, പ്രതികളായ പി.എസ്.സരിത്ത്, സ്വപ്ന സുരേഷ്, സന്ദീപ് നായര്‍ എന്നിവര്‍ക്കു നല്‍കിയ സഹായങ്ങള്‍, വിദേശത്തും സ്വദേശത്തും ഇവര്‍ വഴി പരിചയപ്പെട്ട ആളുകള്‍, ശിവശങ്കര്‍ നടത്തിയ വിദേശയാത്രകളുമായി ഇവര്‍ക്കുള്ള ബന്ധം എന്നിവ സംബന്ധിച്ച വിശദമായ ചോദ്യാവലിയാണ് തയാറാക്കിയത്. സ്വര്‍ണക്കടത്തു കേസിലെ ദേശവിരുദ്ധ ശക്തികളുടെ ഇടപെടലാണ് എന്‍ഐഎ അന്വേഷിക്കുന്നത്.

ചോദ്യംചെയ്യലിനൊടുവില്‍ ശിവശങ്കര്‍ പ്രതിചേര്‍ക്കപ്പെട്ടാല്‍ സര്‍ക്കാരിന്റെ രാജിക്കുള്ള മുറവിളി ശക്തമാകും. യുഡിഎഫും ബിജെപിയും കൂടുതല്‍ പ്രക്ഷോഭങ്ങളിലേക്കിറങ്ങും. സ്വപ്നയുടെ മൊഴി ശിവശങ്കറിന് ആശ്വാസമാകുമെങ്കിലും സരിത്തിന്റെ മൊഴി ശിവശങ്കറിനെ കുടുക്കാന്‍ പോന്നതാണ്. അത് എന്താകുമെന്ന് ഇന്നറിയാം.