ആ വിളിയെത്തിയതിങ്ങനെ... പരിമിതമായ ജീവിത സാഹചര്യത്തില്‍ നിന്നും ഉന്നത വിജയം നേടിയ മൂവാറ്റുപുഴ സ്വദേശിയെത്തേടി പ്രധാനമന്ത്രിയുടെ വിളിയെത്തി; പ്ലസ് ടു പരീക്ഷയില്‍ ഇന്ത്യയില്‍ കൊമേഴ്‌സ് വിഭാഗത്തില്‍ ഏറ്റവും കൂടുതല്‍ മാര്‍ക്ക് നേടിയ വിനായക് ഒറ്റ ദിവസം കൊണ്ട് താരമായി
ഡല്‍ഹിയിലേക്ക് വരാന്‍ ആഗ്രഹമുണ്ടോ? ചോദിക്കുന്നത് വേറാരുമല്ല ഇന്ത്യന്‍ പ്രധാനമന്ത്രി നരേന്ദ്രമോദി. അപ്രതീക്ഷിതമായ ആ വിളി മൂവാറ്റുപുഴ മടക്കത്താനം മാലില്‍വീട്ടില്‍ വിനായകിന്റെ ജീവിതം മാറ്റിമറിച്ചിരിക്കുകയാണ്. നമ്മള്‍ മലയാളികളാരും ഇങ്ങനെയൊരു വിനായക് ഉണ്ടെന്നും ഉന്നത വിജയം നേടിയെന്നും അറിഞ്ഞില്ല. പക്ഷെ ഈ വിജയമറിഞ്ഞ് മോദി നേരിട്ട് വിനായകിനെ ഫോണ്‍ വിളിക്കുകയായിരുന്നു. ആഹ്ലാദവും അമ്പരപ്പും കൊണ്ട് ഒരു നിമിഷം വാക്കുകള്‍ കിട്ടാതെ വിനായക് വട്ടം ചുറ്റി.
പരിമിതമായ ജീവിതസാഹചര്യത്തോട് തോറ്റുകൊടുക്കാത്ത വിനായകിനെ കുറിച്ച് ഇന്നലെ മന്‍ കീ ബാത്തില്‍ മോദി സൂചിപ്പിച്ചിരുന്നു. സി.ബി.എസ്.ഇ പ്ലസ് ടു പരീക്ഷയില്‍ ഇന്ത്യയില്‍ കൊമേഴ്‌സ് വിഭാഗത്തില്‍ ഏറ്റവും കൂടുതല്‍ മാര്‍ക്ക് നേടിയ എസ്.സി വിഭാഗം വിദ്യാര്‍ത്ഥിയാണ് വിനായക് എം. മാലില്‍. 500ല്‍ 493 മാര്‍ക്ക്. അക്കൗണ്ടന്‍സി, ബിസിനസ് സ്റ്റഡീസ്, ഇന്‍ഫമാറ്റിക്‌സ് സ്റ്റാറ്റിസ്റ്റിക്‌സ് എന്നീ വിഷയങ്ങളില്‍ നൂറില്‍ നൂറും. ഇത് മലയാളികളാരും വാഴ്ത്തിയില്ലെങ്കിലും അത് പ്രധാനമന്ത്രി തിരിച്ചറിയുകയായിരുന്നു. അങ്ങനെയാണ് വിവരങ്ങള്‍ അന്വേഷിച്ച് വിളിയെത്തിയത്.
കൂലിപ്പണിക്കാരനാണ് വിനായകിന്റെ അച്ഛന്‍ മനോജ്. അമ്മ തങ്ക വീട്ടമ്മയും. നേര്യമംഗലം നവോദയയിലായിരുന്നു ആറാം ക്‌ളാസ് മുതല്‍ പഠനം. ഡല്‍ഹി യൂണിവേഴ്‌സിറ്റിയില്‍ ബി കോം പഠനം പൂര്‍ത്തിയാക്കി സിവില്‍ സര്‍വീസ് സ്വന്തമാക്കണമെന്നാണ് മനസില്‍. പക്ഷെ ആ മോഹം മോഹമായിരിക്കാനേ വിനായകിന് കഴിയുമായിരുന്നുള്ളൂ. ജീവിത ദാരിദ്ര്യത്തിനുള്ളില്‍ ഡല്‍ഹിയിലെ പഠനം പോയിട്ട് ഡല്‍ഹി പോലും സ്വപ്നം മാത്രമായിരുന്നു. മാര്‍ക്കുള്ളതിനാല്‍ ഇന്ത്യയില്‍ എവിടെ വേണമോ അഡ്മിഷന്‍ കിട്ടുമെങ്കിലും ചുമ്മാതെ പഠിപ്പിക്കില്ലല്ലോ. ഫീസും ഹോസ്റ്റല്‍ ഫീസുമൊക്കെയായിട്ട് നല്ല തുക വേണം. അതെല്ലാം സ്വപ്നമായി അവശേഷിക്കെയാണ് പ്രധാനമന്ത്രി നരേന്ദ്ര മോദിയുടെ ഫോണെത്തുന്നത്.
അഭിനന്ദിച്ചു കൊണ്ടാണ് മോദിയുടെ ഫോണെത്തുന്നത്. പരിഭ്രമത്തോടെയാണ് ഫോണെടുത്തതെങ്കിലും മോദിയുടെ ലളിതമായ ചോദ്യങ്ങള്‍ക്ക് മുമ്പില്‍ ഒട്ടും സങ്കോചമില്ലാതെയാണ് വിനായക് മറുപടി നല്‍കിയത്. അത് മോദിയെപ്പോലും സന്തോഷിപ്പിച്ചു. ഇംഗ്ലീഷിലാണ് മോദി ചോദിച്ചത്.
ആ ഫോണ്‍ വിളിയുടെ മലയാള പരിഭാഷ ഇങ്ങനേയാണ്
മോദി: ഹലോ
വിനായക്: ഹലോ സര്‍, നമസ്‌കാരം.
മോദി: അഭിനന്ദനങ്ങള്‍
വിനായക്: താങ്ക് യൂ സര്‍
മോദി: എങ്ങനെയുണ്ട് സന്തോഷം
വിനായക്: വലിയ ആവേശത്തിലാണ് സര്‍
മോദി: സ്‌പോര്‍ട്‌സില്‍ വല്ലതുമുണ്ടോ.
വിനായക്: ബാഡ്മിന്റന്‍
മോദി: എത്ര സംസ്ഥാനങ്ങള്‍ സന്ദര്‍ശിച്ചിട്ടുണ്ട്?
വിനായക് : കേരളവും തമിഴ്‌നാടും മാത്രം
മോദി: ഡല്‍ഹി സന്ദര്‍ശിക്കാന്‍ ആഗ്രഹമുണ്ടോ?
വിനായക്: ഉണ്ട് സര്‍. ഉപരിപഠനത്തിന് ഡല്‍ഹി യൂണിവേഴ്‌സിറ്റിയില്‍ അപേക്ഷിക്കുകയാണ്.
മോദി: വാഹ്, അപ്പോള്‍ ഡല്‍ഹിയിലേക്ക് വരുകയാണ്
വിനായക് : അതേ സര്‍
മോദി: മറ്റു വിദ്യാര്‍ത്ഥികള്‍ക്കായി എന്തെങ്കിലും സന്ദേശം നല്‍കാനുണ്ടോ?
വിനായക് : കഠിനാദ്ധ്വാനവും സമയത്തെ പ്രയോജനപ്പെടുത്തലും
മോദി: കൃത്യമായ ടൈം മാനേജ്‌മെന്റ്
വിനായക്: അതേ സര്‍
മോദി: സോഷ്യല്‍ മീഡിയയില്‍ ആക്ടീവാണോ?
വിനായക് : അല്ല, സ്‌കൂളില്‍ അനുമതിയില്ല
മോദി: അതുകൊണ്ട് നിങ്ങള്‍ ഭാഗ്യവാനാണ്
വിനായക്: അതേ സര്‍
മോദിജി : വിനായക്, വീണ്ടും അഭിനന്ദനം. എല്ലാ ആശംസകളും
വിനായക്: നന്ദി സര്‍.
മോദിയുടെ ഫോണെത്തിയതോടെ ഇന്ത്യയുടെ പല ഭാഗത്ത് നിന്നും അഭിനന്ദന പ്രവാഹം ഈ കൊച്ച് വീട്ടിലേക്ക് വരികയാണ്. തങ്ങളുടെ സന്തോഷത്തില്‍ പങ്ക് ചേരാന്‍ പ്രധാനമന്ത്രി സമയം കണ്ടെത്തിയതിന്റെ ആവേശത്തിലാണ് വീട്ടുകാര്‍.
" frameborder="0" allow="autoplay; encrypted-media" allowfullscreen>
https://www.facebook.com/Malayalivartha
