ബംഗാള്‍ ഉള്‍ക്കടലില്‍ ഓഗസ്റ്റ് മാസത്തിന്റെ തുടക്കത്തില്‍ ന്യൂനമര്‍ദ്ദം രൂപപ്പെടുമെന്ന് കേന്ദ്ര കാലാവസ്ഥാ വകുപ്പ്..കേരളത്തിന് നിര്‍ണ്ണായകമാകുന്ന ദിനങ്ങള്‍
ബംഗാള്‍ ഉള്‍ക്കടലില്‍ ഓഗസ്റ്റ് മാസത്തിന്റെ തുടക്കത്തില്‍ ന്യൂനമര്‍ദ്ദം രൂപപ്പെടുമെന്ന് കേന്ദ്ര കാലാവസ്ഥാ വകുപ്പ് പ്രവചിച്ചു. ന്യൂനമര്‍ദ്ദം അതിതീവ്രമാകുന്നതോടെ സംസ്ഥാനത്ത് മഴ ശക്തമാകുമെന്നും കാലാവസ്ഥാ വകുപ്പ് മുന്നറിയിപ്പ് നല്‍കി. കഴിഞ്ഞ രണ്ട് വര്‍ഷങ്ങളിലും കേരളത്തില്‍ മഴ ശക്തി പ്രാപിച്ചതും പ്രളയം ഉണ്ടായതും ഈ സമയങ്ങളില്‍ തന്നെയാണ്.. അതിനാല്‍, സംസ്ഥാനത്ത് ഇത്തവണ പ്രളയസാധ്യത തള്ളിക്കളയാനാവില്ല
ഓഗസ്റ്റ് 5, 6 തീയതികളില്‍ ന്യൂനമര്‍ദ്ദം രൂപപ്പെടുമെന്നാണ് കാലാവസ്ഥാ വകുപ്പ് പ്രവചിക്കുന്നത്. ഇത് അതിതീവ്ര ന്യൂനമര്‍ദ്ദമായി മാറുന്നതോടെ ഓഗസ്റ്റിന്റെ രണ്ടാമത്തെ ആഴ്ചയില്‍ കേരളത്തില്‍ കനത്ത മഴ പെയ്യുമെന്നാണ് കാലാവസ്ഥാ വകുപ്പിന്റെ വിലയിരുത്തല്‍.
2018, 2019 വര്‍ഷങ്ങളില്‍ പ്രളയം ഉണ്ടായത് ഓഗസ്റ്റ് 8 മുതലുള്ള ദിവസങ്ങളില്‍ ലഭിച്ച അതിതീവ്രമഴ കാരണമാണ്. ജൂണ്‍, ജൂലായ് മാസങ്ങളില്‍ മഴ കുറവ് ലഭിക്കുകയും ഓഗസ്റ്റില്‍ കുറച്ചുദിവസം കനത്ത മഴ ലഭിക്കുകയും ചെയ്ത പ്രവണതയാണ് കഴിഞ്ഞ രണ്ട് വര്‍ഷങ്ങളിലുമുണ്ടായത്. ഈ വര്‍ഷവും ഇതേ കാലാവസ്ഥയാണ് അനുഭവപ്പെട്ടത്.
ആഗോളതാപനത്തിന്റെ ഫലമായി മണ്‍സൂണ്‍ പ്രവാഹത്തിലുണ്ടാകുന്ന മാറ്റങ്ങള്‍കാരണം കാലവര്‍ഷത്തെ സംബന്ധിച്ച കൃത്യമായ പ്രവചനങ്ങള്‍ പോലും അസാധ്യമാക്കുന്നതായി സെന്റര്‍ ഫോര്‍ എര്‍ത്ത് റിസര്‍ച്ച് ആന്‍ഡ് എന്‍വയോണ്‍മെന്റ് മാനേജ്‌മെന്റിലെ കാലാവസ്ഥാ വിദഗ്ധനായ ഡോ. വേണു ജി നായര്‍ പറഞ്ഞു. 48 മണിക്കൂറിലേക്ക് പ്രവചിക്കുന്നതു പോലും തെറ്റി പോകുന്നെന്ന് അദ്ദേഹം അഭിപ്രായപ്പെട്ടു
https://www.facebook.com/Malayalivartha
