എല്ലാം വിധിയല്ലാതെന്ത്... കരിപ്പൂര്‍ വിമാനാപകടത്തിന് ശേഷം മലയാളികളുടെ ചങ്ക് പറിച്ചതായിരുന്നു പൈലറ്റ് ക്യാപ്റ്റന്‍ ദീപക് സാത്തേയുടേത് എന്ന് പറഞ്ഞ് സോഷ്യല്‍ മീഡിയയില്‍ കത്തിക്കയറിയ ഗാനം; നാവിക സേനയുടെ മുന്‍ കമാന്‍ഡര്‍ ഇന്‍ ചീഫ് വൈസ് അഡ്മിറല്‍ ഗിരീഷ് ലൂത്രയാണ് ആ ഗാനം എന്നറിഞ്ഞിട്ടും ആരാധന കൂടുന്നു
കഴിഞ്ഞ ദിവസങ്ങളില്‍ മലയാളികളുടെ ചങ്ക് പറിച്ച ഗാനമാണ് പൈലറ്റ് ക്യാപ്റ്റന്‍ ദീപക് സാത്തേയുടേത് എന്ന് പറഞ്ഞ് സോഷ്യല്‍ മീഡിയയില്‍ കത്തിക്കയറിയ ചല്‍ത്തേ നികല്‍ത്തേ ഹെ... എന്ന ഗാനം. നമ്മുടെയെല്ലാം മനസില്‍ ക്യാപ്റ്റനെപ്പറ്റിയുള്ള ഓര്‍മ്മകള്‍ നില്‍ക്കുന്നതോ എന്തോ ആ ഗാനം എല്ലാവരും ഏറ്റെടുത്തു. പലവട്ടം കേട്ടു, പലര്‍ക്കും ഷെയര്‍ ചെയ്തു.
അതേസമയം കരിപ്പൂര്‍ വിമാനാപകടത്തില്‍ മരിച്ച ക്യാപ്റ്റന്‍ ദീപക് സാത്തേയുടേതെന്ന പേരില്‍ പ്രചരിക്കുന്ന ഈ വീഡിയോ ഗാനം വ്യാജമെന്നാണ് തെളിഞ്ഞിരിക്കുന്നത്. ദീപക് സാത്തെയുടെ പാട്ട് എന്ന പേരിലാണ് വിഡിയോ സമൂഹമാധ്യമങ്ങളില്‍ പ്രചരിക്കുന്നത്. സൈനിക പരിപാടിയില്‍ ഉദ്യോഗസ്ഥന്‍ ഒരു ഹിന്ദി പാടുന്ന വിഡിയോ ആണ് ദീപക് സാത്തെയുടേതായി പ്രചരിക്കുന്നത്. എന്നാല്‍ യഥാര്‍ഥത്തില്‍ ആ വിഡിയോയിലുള്ളത് നാവിക സേനയുടെ മുന്‍ കമാന്‍ഡര്‍ ഇന്‍ ചീഫ് വൈസ് അഡ്മിറല്‍ ഗിരീഷ് ലൂത്രയാണ്. വെസ്‌റ്റേണ്‍ നേവല്‍ കമാന്‍ഡിന്റെ ഗോള്‍ഡന്‍ ജൂബിലി ആഘോഷ വേളയില്‍ ഷൂട്ട് ചെയ്തതാണ് വിഡിയോ.
യഥാര്‍ഥ വിഡിയോയുടെ ആരംഭത്തില്‍ വൈസ് അഡ്മിറല്‍ ഗിരീഷ് ലൂത്രയുടെ പേര് അനൗണ്‍സ് ചെയ്യുന്നുണ്ട്. എന്നാല്‍ ഈ ഭാഗം ഒഴിവാക്കിയാണ് വിഡിയോ പ്രചരിക്കുന്നത്. അതോടെ ആ വീഡിയോ കയറി വൈറലായി. എന്തായാലും ആ ക്യപ്റ്റന്‍ ദീപക് സേത്തയ്ക്കുള്ള ഓര്‍മ്മ കുറിപ്പായി ആ ഗാനം മാറി. ധീരതയുടെ പര്യായമായി ദീപക് സേത്ത മാറുകയാണ്.
സ്വന്തം ജീവന്‍ നല്‍കി മറ്റുള്ളവരുടെ ജീവന്‍ രക്ഷിച്ച ആള്‍ രൂപമായാണ് ദീപക് സേത്തയെ വിശേഷിപ്പിക്കുന്നത്. കരിപ്പൂരില്‍ കഴിഞ്ഞ ദിവസമുണ്ടായ ഉണ്ടായ വിമാന ദുരന്തത്തിന്റെ വ്യാപ്തി കുറച്ചത് പൈലറ്റ് ഡി വി സാത്തേയുടെ മിടുക്ക് തന്നെയെന്നാണ് എല്ലാവരും വിലയിരുത്തുന്നത്. അപകടത്തില്‍ മരണത്തിന് കീഴടങ്ങിയെങ്കിലും പൈലറ്റിന്‍െ മിടുക്കാണ് മരണം 18 ല്‍ ഒതുങ്ങാന്‍ കാരണമായതെന്നാണ് വിദഗ്ദ്ധര്‍ വിലയിരുത്തുന്നത്. അപകടത്തിന് ഇരയായ എയര്‍ഇന്ത്യ എക്‌സ്പ്രസ് വിമാനം പറത്തിയ ഡിവി സാത്തേ മുമ്പ് വ്യോമസേനാംഗവും മൂന്ന് ദശകത്തോളം വിമാനം പറത്തി പരിചയമുള്ളയാളുമാണ്.
ബോയിംഗ് 737 800 വിമാനത്തിന്റെ പൈലറ്റായി പരിചയസമ്പത്ത് നേടിയിട്ടുണ്ട്. മുമ്പ് അദ്ദേഹം എയര്‍ബസ് എ 310 പറത്തിയിട്ടുണ്ട്. 30 വര്‍ഷത്തോളം വിമാനം പറത്തി പരിചയമുള്ള അദ്ദേഹം കൊമേഴ്‌സ്യല്‍ ഫ്‌ളൈറ്റുകള്‍ പറത്തുന്നതിന് മുമ്പ് വ്യോമസേനയില്‍ അംഗമായിരുന്നു. യുദ്ധവിമാനത്തിന്റെ പൈലറ്റ്, ടെസ്റ്റ് പൈലറ്റ് എന്നീ നിലകളില്‍ 22 വര്‍ഷം സേവനം അനുഷ്ഠിച്ചിട്ടുണ്ട്. 1992 ല്‍ സ്‌ക്വാഡ്രണ്‍ ലീഡറായിരുന്ന അദ്ദേഹം 2003 ല്‍ വിംഗ്കമാന്റര്‍ പദവിയിലാണ് വിരമിച്ചത്. അടുത്തിടെ ഫ്രാന്‍സില്‍ നിന്നും ഇന്ത്യയില്‍ എത്തിയ റഫാല്‍ യുദ്ധവിമാനം കൊണ്ടുവന്ന ഗോള്‍ഡന്‍ ആരോസിലും മുമ്പ് ഭാഗമായിരുന്നു.
ദേശീയ പ്രതിരോധ അക്കാദമിയില്‍ നിന്നും സ്വര്‍ണ്ണമെഡല്‍ നേട്ടവുമായി പുറത്തു വന്ന അദ്ദേഹം 1981 ജൂണിലാണ് സേനയില്‍ ചേര്‍ന്നത്. സ്വാഡ് ഓഫ് ഓണര്‍ പുരസ്‌ക്കാരത്തിനും മറ്റും അര്‍ഹനായിരുന്നു. മുംബൈക്കാരനായിരുന്ന സാേേത്ത കൊമേഴ്‌സ്യല്‍ പൈലറ്റായുള്ള കരിയറില്‍ ഹിന്ദുസ്ഥാന്‍ എയ്‌റോമനാട്ടിക്‌സിലായിരുന്നു ടെസ്റ്റ് പൈലറ്റായി സേവനം ചെയ്തിട്ടുണ്ട്. അപകടത്തില്‍ സാത്തേയ്‌ക്കൊപ്പം സഹപൈലറ്റ് അഖിലേഷ് കുമാറും മരണമടഞ്ഞു.
191 പേരുമായി ലാന്റ് ചെയ്ത വിമാനം അപകടത്തില്‍ കത്തിയമര്‍ന്നിരുന്നെങ്കില്‍ വന്‍ ദുരന്തമായി മാറുമായിരുന്നു. 158 പേര് മരണമടഞ്ഞ 2010 ലെ മംഗലാപുരം വിമാനാപകടത്തില്‍ വിമാനം പൊട്ടിത്തെറിച്ചത് പോലെ കരിപ്പൂരിലെ അപകടം മാറാതിരുന്നത് പൈലറ്റിന്റെ മിടുക്കാണെന്നാണ് വിദഗ്ദ്ധര്‍ ചൂണ്ടിക്കാട്ടുന്നത്. ഇന്നലെത്തേതിനേക്കാള്‍ മോശമായ കാലവസ്ഥകളില്‍ പോലും വിമാനങ്ങള്‍ ലാന്റ് ചെയ്ത് പരിചയസമ്പന്നത ഉള്ള ആളായിരുന്നു ഡി വി സാത്തേ. കാഴ്ച പ്രശ്‌നം വരാറുള്ള ടേബിള്‍ ടോപ്പ് റണ്‍വേകളില്‍ കൃത്യതയാര്‍ന്ന ലാന്റിംഗിന് വലിയ പ്രാധാന്യമുണ്ട്. ഇതിന് വിഷ്വല്‍ കണ്‍ട്രോളിംഗാണ് പൈലറ്റുമാര്‍ സ്വീകരിക്കാറുള്ളത്. വിമാനം റണ്‍വേയില്‍ തെന്നി നിയന്ത്രണംവിട്ടെന്നു തിരിച്ചറിഞ്ഞയുടന്‍ വീണ്ടും ഉയര്‍ത്താന്‍ ശ്രമം നടത്തിയിരിക്കാമെന്നാണ് വിലയിരുത്തല്‍. അതായത് മരണത്തിന് തൊട്ട് മുമ്പ് പോലും ദീപക് സാത്തെ അവസാന ശ്രമവും നടത്തിയിരുന്നു എന്നര്‍ത്ഥം. അവിടെയാണ് മഹാനായ പൈലറ്റിന് ബിഗ് സല്യൂട്ട് കിട്ടുന്നത്.
https://www.facebook.com/Malayalivartha
