കൊച്ചിയില് ഗിഫ്റ്റ് പദ്ധതി : 10 വര്ഷത്തിനകം 18,000 കോടി രൂപയുടെ നിക്ഷേപവും 1.20 ലക്ഷം പേര്ക്ക് നേരിട്ടു തൊഴിലും
കൊച്ചി രാജ്യാന്തര വിമാനത്താവളത്തിനു സമീപം 1,600 കോടി രൂപ നിക്ഷേപത്തില് കൊച്ചി ഗ്ലോബല് ഇന്ഡസ്ട്രിയല് ഫിനാന്സ് ആന്ഡ് ട്രേഡ് (ഗിഫ്റ്റ്) സിറ്റി നിര്മിക്കുന്നു. കൊച്ചി ബെംഗളൂരു വ്യവസായ ഇടനാഴിയുടെ ഭാഗമായി 220 ഹെക്ടറില് നിര്മിക്കുന്ന ഗിഫ്റ്റ് സിറ്റിയില് 10 വര്ഷത്തിനകം 18,000 കോടി രൂപയുടെ വരെ നിക്ഷേപവും 1.20 ലക്ഷം പേര്ക്കു നേരിട്ടു തൊഴിലും ലഭിക്കും.
രാജ്യാന്തര പ്രശസ്തമായ ബിസിനസ്, ഇന്ഷുറന്സ്, നിയമ, ഓഹരി സ്ഥാപനങ്ങളുടെ മേഖലാ ആസ്ഥാനമായി കൊച്ചിയെ മാറ്റുകയാണ് ലക്ഷ്യമെന്ന് കേരള സ്പെഷല് പ്രോജക്ട്സ് നോഡല് ഓഫിസറും വ്യവസായ ഇടനാഴി പ്രോജക്ട് ഓഫിസറും കൂടിയായ അഡീഷനല് ചീഫ് സെക്രട്ടറി അല്കേഷ്കുമാര് ശര്മ പറഞ്ഞു. സിംഗപ്പൂര്, ഹോങ്കോങ്, ടോക്കിയോ നഗരങ്ങളുടെ മാതൃകയില് വന്കിട ഹോട്ടലുകളും സെന്റര് ഓഫ് എക്സലന്സ് നിലവാരത്തിലുള്ള വിദ്യാഭ്യാസ സ്ഥാപനങ്ങളും ഉണ്ടാകും.
സ്ഥലം ഏറ്റെടുക്കാന് സംസ്ഥാന സര്ക്കാര് 540 കോടി രൂപ അനുവദിച്ചു. പദ്ധതിക്കു ഭരണാനുമതി നല്കി. സംസ്ഥാന സര്ക്കാരിന്റെ ഓഹരി പങ്കാളിത്തം ഇതാണ്. കേന്ദ്ര, സംസ്ഥാന സര്ക്കാരുകളുടെ പങ്കാളിത്തത്തോടെ സ്വകാര്യ നിക്ഷേപത്തിലാകും പദ്ധതി. പരോക്ഷമായി 3.6 ലക്ഷം പേര്ക്കു തൊഴില് ലഭിക്കും.
റോഡ്, വൈദ്യുതി, കണക്ടിവിറ്റി ഉള്പ്പെടെ എല്ലാ അടിസ്ഥാന സൗകര്യങ്ങളും ഒരുക്കേണ്ടത് കേന്ദ്ര സര്ക്കാരിന്റെ ചുമതലയാണ്. ഇതിനും അപ്പുറമുള്ള നിര്മാണത്തിലാകും സ്വകാര്യ പങ്കാളിത്തം. ഓഫിസ് തുടങ്ങാന് ആഗ്രഹിക്കുന്ന സ്ഥാപനങ്ങള്ക്കു ഒരു മാസം പോലും കാത്തിരിക്കാതെ പ്രവര്ത്തനം തുടങ്ങാന് കഴിയും വിധം ' വോക് ടു വര്ക് ' രീതിയാകും ഗിഫ്റ്റ് സിറ്റിയില് എന്ന് അല്കേഷ്കുമാര് ശര്മ പറഞ്ഞു.
https://www.facebook.com/Malayalivartha