സ്വര്‍ണക്കടത്ത് കേസില്‍ നിന്നും തലയൂരാന്‍ സ്വപ്ന സുരേഷ് പല വഴികളും തേടിയിരുന്നു. ആദ്യമായി തലതൊട്ടപ്പനായ ശിവശങ്കറിന്റെ കാല് പിടിച്ചു. ശിവശങ്കര്‍ ഏറ്റതല്ലാതെ ഒന്നും ചെയ്തില്ല. അതിന് പിന്നാലെ പലരേയും വിളിച്ചു നോക്കി. ഒന്നും കാര്യമായി ഏറ്റില്ല. ആരും കേന്ദ്രത്തിന്റെ കീഴിലുള്ള കസ്റ്റംസുമായി ബന്ധപ്പെടാന്‍ ധൈര്യം കാട്ടിയില്ല. ധൈര്യം കാട്ടിയവരുടെ കാര്യം നമ്മള്‍ കണ്ടതാണ്. അങ്ങനെയാണ് മോദിയെപ്പിടിച്ചാലേ കാര്യം നടക്കൂവെന്നറിയുന്നത്. കേന്ദ്ര സര്‍ക്കാരുമായി അടുപ്പമുള്ള ബിജെപിക്കാരെ ആരെങ്കിലും വീഴ്ത്തിയാല്‍ ഈസിയാകും. അതിനായി സ്വപ്നയ്ക്ക് പെട്ടെന്ന് വഴിയും തെളിഞ്ഞു വന്നു. അനില്‍ നമ്പ്യാര്‍. പഴയ സഹായമുള്ളതിനാല്‍ അനില്‍ മടിക്കില്ല. അനില്‍ നമ്പ്യാര്‍ ഇപ്പോള്‍ സംഘപരിവാരുകാര്‍ ഏറെ ആഘോഷിക്കുന്ന ചാനലിന്റെ ന്യൂസിന്റെ തലവനുമാണ്. എല്ലാവരുമായി നല്ല ബന്ധം. മാധ്യമ പ്രവര്‍ത്തകന്‍. വെട്ടിത്തുറന്ന് കാര്യം പറഞ്ഞു.

പക്ഷെ സ്വപ്നയുടെ മോഹം ദേ കിടക്കുന്നു. കസ്റ്റംസും എന്‍ഐഎയും അനില്‍ നമ്പ്യാരെ വിട്ടില്ല. അന്വേഷിക്കാന്‍ മോദിയാണ് വിട്ടിരിക്കുന്നത്. അതിനാല്‍ ഇനിയാരൊക്കെ വന്നാലും വിടില്ല. പിടികൂടുക തന്നെ ചെയ്യും. അത്തരം കള്ളം ചെയ്തവര്‍ കൊടികെട്ടിയവനാണെങ്കിലും ബിജെപിക്ക് വേണ്ട.

അങ്ങനെ സ്വര്‍ണക്കടത്ത് കേസുമായി ബന്ധപ്പെട്ട് അന്വേഷണ സംഘം അനില്‍ നമ്പ്യാര്‍ക്ക് ക്ലീന്‍ ചിറ്റ് നല്‍കിയില്ല. മൊഴി വിശദമായി പരിശോധിച്ച ശേഷം വീണ്ടും ചോദ്യം ചെയ്യാനാണ് നിലവില്‍ കസ്റ്റസ് തീരുമാനം. ഇന്നലെ രാവിലെയാണ് അനില്‍ നമ്പ്യാര്‍ കസ്റ്റംസിനു മുന്നില്‍ ഹാജരായത്. കേസിലെ രണ്ടാം പ്രതി സ്വപ്ന സുരേഷുമായുള്ള ഇദ്ദേഹത്തിന്റെ ബന്ധം വ്യക്തമായതിനെ തുടര്‍ന്ന് കസ്റ്റംസ് കഴിഞ്ഞ ദിവസം ഹാജരാകാന്‍ നോട്ടിസ് നല്‍കിയിരുന്നു. തുടര്‍ന്നാണ് ഇന്ന് കൊച്ചിയിലെ ഓഫിസില്‍ മൊഴി നല്‍കാന്‍ ഹാജരായത്. സ്വര്‍ണക്കടത്തു കേസില്‍ മുഖ്യമന്ത്രിയുടെ ഐടി ഫെലോ ആയിരുന്ന അരുണ്‍ ബാലചന്ദ്രനോടും ഹാജരാകാന്‍ ആവശ്യപ്പെട്ടെങ്കിലും എത്തിയിട്ടില്ല.

നയതന്ത്ര ബാഗേജുവഴിയുള്ള സ്വര്‍ണം കടത്തിയത് പിടികൂടിയ ദിവസം അനില്‍ നമ്പ്യാര്‍ സ്വപ്നയെ ഫോണില്‍ ബന്ധപ്പെട്ടതിന്റെ വിവരങ്ങള്‍ കസ്റ്റംസിന് ലഭിച്ചിരുന്നു. തുടര്‍ന്നാണ് ഇതു സംബന്ധിച്ച ചോദ്യങ്ങള്‍ക്ക് സ്വപ്ന ഇയാള്‍ക്കെതിരെ മൊഴി നല്‍കിയത്. സ്വര്‍ണം കടത്തിയതിന്റെ കുറ്റം സരിത്ത് ഏറ്റെടുക്കാന്‍ അദ്ദേഹത്തോട് ആവശ്യപ്പെടണം എന്നായിരുന്നു അനില്‍ നമ്പ്യാര്‍ തന്നോടു പറഞ്ഞത് എന്നാണ് സ്വപ്നയുടെ മൊഴി. സ്വപ്നയുമായി ഇദ്ദേഹത്തിന് അടുത്ത ബന്ധമുണ്ടെന്നും കസ്റ്റംസ് കണ്ടെത്തിയിരുന്നു. ഇതിന്റെയെല്ലാം അടിസ്ഥാനത്തിലാണ് ഇന്ന് ചോദ്യം ചെയ്യലിന് വിളിപ്പിച്ചത്.

അതേസമയം, സ്വര്‍ണക്കടത്തുമായി അനില്‍ നമ്പ്യാരെ ബന്ധിപ്പിക്കുന്ന നേരിട്ടുള്ള തെളിവുകളൊന്നും കസ്റ്റംസിന് ലഭിച്ചിട്ടില്ല എന്നാണ് വിവരം. നയതന്ത്ര ബാഗിലൂടെ സ്വര്‍ണം കടത്തുന്ന വിവരം അനിലിന് നേരത്തെ അറിയുമായിരുന്നോ, ഇക്കാര്യത്തില്‍ എന്തെങ്കിലും ബന്ധമുണ്ടോ തുടങ്ങിയ കാര്യങ്ങളാണ് കസ്റ്റംസ് പരിശോധിക്കുന്നത്. ഇതില്‍ എന്തെങ്കിലും തെളിവു ലഭിക്കുന്ന സാഹചര്യമുണ്ടായാല്‍ അനിലിനെ കസ്റ്റംസ് പ്രതി ചേര്‍ക്കാനും സാധ്യതയുണ്ട്. അല്ലാത്തപക്ഷം സാക്ഷിയാക്കുന്നതിനായിരിക്കും കൂടുതല്‍ സാധ്യത എന്നാണ് വിലയിരുത്തല്‍.

നേരത്തെ അനില്‍ നമ്പ്യാര്‍ക്ക് വിദേശത്ത് ഒരു ചെക്കുകേസുമായി ബന്ധപ്പെട്ട് യാത്രാ വിലക്കുണ്ടായിരുന്നു. ഇത് സ്വപ്നയുടെ സ്വാധീനം ഉപയോഗിച്ച് നീക്കം ചെയ്തതായി മൊഴി നല്‍കിയിട്ടുണ്ട്. അതുകൊണ്ടു തന്നെ സ്വര്‍ണക്കടത്തില്‍ ഇദ്ദേഹം എന്തെങ്കിലും സഹായം ചെയ്തിട്ടുണ്ടോ എന്നതുള്‍പ്പടെയുള്ള കാര്യങ്ങള്‍ പരിശോധിക്കുന്നുണ്ട്. ബിജെപിയുടെ പിന്തുണയുള്ള ചാനലിന്റെ പ്രധാന സ്ഥാനം വഹിക്കുന്ന ആള്‍ എന്ന നിലയില്‍ അനിലിനെതിരെ ഉയരുന്ന ആരോപണം സഖാക്കള്‍ ഇപ്പോഴേ ആഘോഷിച്ച് തുടങ്ങി.

അനില്‍ നമ്പ്യാരെ ഇപ്പോഴെ ബിജെപി അധ്യക്ഷന്‍ കെ. സുരേന്ദ്രന്‍ തള്ളിപ്പറഞ്ഞിട്ടുണ്ട്. ജനം ടിവി ബിജെപിയുടെ ചാനലല്ല. ബിജെപിയുടെ ചാനലാണെന്ന് ആരാണ് പറഞ്ഞത്. ആര് സ്വര്‍ണക്കടത്തില്‍ ഇടപെട്ടാലും പിടികൂടുക തന്നെ ചെയ്യും. നിഷ്പക്ഷമായ അന്വേഷണമാണ് നടക്കുന്നതെന്ന് ഇതിലൂടെ വ്യക്തമല്ലേ എന്നുമാണ് സുരേന്ദ്രന്‍ ചോദിച്ചത്. ഇതോടെ വ്യക്തമായില്ലേ സ്വപ്നയുടെ ഭാവി.