കൊച്ചി കപ്പല്‍ശാലയില്‍ നടന്ന ചടങ്ങില്‍, മത്സ്യത്തൊഴിലാളികള്‍ക്ക് ദുരന്തമുഖത്തുതന്നെ ചികിത്സ ലഭ്യമാക്കാനാവുന്ന അത്യാധുനിക മറൈന്‍ ആംബുലന്‍സുകള്‍ ഇന്നലെ നീരണിഞ്ഞു. മുഖ്യമന്ത്രി പിണറായി വിജയനാണ് മറൈന്‍ ആംബുലന്‍സുകളില്‍ ആദ്യത്തേതായ പ്രതീക്ഷയുടെ ഫ്ളാഗ് ഓഫ് വീഡിയോ കോണ്‍ഫറന്‍സിലൂടെ നിര്‍വഹിച്ചത്. മത്സ്യത്തൊഴിലാളികളുടെ ദീര്‍ഘകാല സ്വപ്നമാണ് യാഥാര്‍ഥ്യമാകുന്നതെന്ന് അദ്ദേഹം പറഞ്ഞു.

മറ്റ് രണ്ട് ആംബുലന്‍സുകളായ പ്രത്യാശ, കാരുണ്യ എന്നിവ കൂടി നീരണിഞ്ഞു. മന്ത്രി ജെ. മേഴ്സിക്കുട്ടിയമ്മ, ഫിഷറീസ് വകുപ്പ് സെക്രട്ടറി ടിങ്കു ബിസ്വാള്‍ എന്നിവരാണ് ഈ യാനങ്ങളെ വെള്ളത്തിലിറക്കിയത്. കേരളത്തിന്റെ സൈനികരായ മത്സ്യത്തൊഴിലാളികള്‍ക്കുള്ള രക്ഷാകവചമാണ് മറൈന്‍ ആംബുലന്‍സെന്ന് മന്ത്രി ജെ. മേഴ്സിക്കുട്ടിയമ്മ പറഞ്ഞു.

2018 മെയ് 31-നാണ് കൊച്ചിന്‍ ഷിപ്പ്യാര്‍ഡുമായി മറൈന്‍ ആംബുലന്‍സ് നിര്‍മാണത്തിന് കരാറിലേര്‍പ്പെടുന്നത്. ഒരു ബോട്ടിന് ആറു കോടി എട്ട് ലക്ഷം രൂപ വച്ച് 18 കോടി 24 ലക്ഷം രൂപയായിരുന്നു മൊത്തം അടങ്കല്‍ തുക. മുഖ്യമന്ത്രിയുടെ ദുരിതാശ്വാസനിധിയില്‍നിന്ന് 7 കോടി 14 ലക്ഷം രൂപയും ഫിഷറീസ് വകുപ്പിന്റെ പ്ലാന്‍ ഫണ്ടില്‍നിന്ന് 2 കോടിയുമാണ് സര്‍ക്കാര്‍ അനുവദിച്ചത്.

ഒരു ആംബുലന്‍സിന്റെ നിര്‍മാണ ചെലവ് ബി.പി.സി.എല്‍. ഏറ്റെടുത്തു. മറ്റൊന്നിന്റെ പകുതി ചെലവ് കൊച്ചിന്‍ ഷിപ്പ് യാര്‍ഡിന്റെ സാമൂഹ്യപ്രതിബദ്ധതാ ഫണ്ടില്‍നിന്നാണ്. 14 നോട്ടിക്കല്‍ മൈല്‍ വേഗതയില്‍ സഞ്ചരിക്കുന്ന വിധമാണ് ബോട്ടിന്റെ രൂപകല്‍പ്പന. പട്രോളിങ്ങിനും ഇവ ഉപയോഗിക്കും. ആപത്ത് വന്നാല്‍ ഉടനെത്താനും പത്ത് പേര്‍ക്ക് വരെ സ്പെഷല്‍ കെയര്‍ കൊടുക്കാന്‍ കഴിയുന്ന ക്രിട്ടിക്കല്‍ കെയര്‍ സംവിധാനവും ആംബുലന്‍സിലുണ്ട്.