എല്ലാവരും വിചാരിക്കും മാസ്മര സൗന്ദര്യം കൊണ്ടാണ് സ്വപ്ന സുരേഷിന്റെ പുറകേ പലരും പോയതെന്ന്. അല്ലേയല്ല. കാര്യം പത്താം ക്ലാസ് തോറ്റതാണെങ്കിലും സ്വപ്നയ്ക്ക് പത്തര മാറ്റുള്ള ബന്ധങ്ങളാണുണ്ടായിരുന്നത്. അതും മലയാളികളുടെ സ്വപ്ന ഭൂമിയായ യുഎഇയില്‍. നടക്കില്ലെന്ന് കരുതി പലരും ഉപേക്ഷിച്ച കാര്യങ്ങളാണ് സ്വപ്ന ഈസിയായി സൂര്യനസ്തമിക്കും മുമ്പ് നടത്തിക്കൊടുത്തത്. അതിന് സ്വപ്നയ്ക്ക് രാഷ്ട്രീയമൊന്നുമില്ല. ഭരണ പ്രതിപക്ഷത്തുള്ള നിരവധിയാളുകളുടേയും ബന്ധുക്കളുടേയും യാത്ര സംബന്ധിച്ച വിലക്കുകള്‍ സ്വപ്ന ഈസിയായാണ് നീക്കിക്കൊടുത്തത്. ആ ഈസിയായി നീക്കിക്കൊടുക്കുമ്പോള്‍ സ്വപ്നയുമായി കാര്യസിദ്ധി നേടിയവര്‍ക്കും ഒരടുപ്പം കാണില്ലേ. അങ്ങനെ കേരളത്തിലും അവര്‍ക്ക് നല്ല ബന്ധമുണ്ടായി. ആ അടുപ്പമാണ് ഇപ്പോള്‍ ഏറാകൂടമായത്.

അതുപോലെയാണ് നമ്മുടെ ഇപ്പോഴത്തെ കഥാനായകനായ മാധ്യമ പ്രവര്‍ത്തകന്‍ അനില്‍ നമ്പ്യാരും സ്വപ്നയെ പരിചയപ്പെടുന്നത്. എന്നോ ഒരിക്കല്‍ ചെയ്ത ചെയ്ത്തിന് ദുബായില്‍ കാല് കുത്താന്‍ പറ്റാത്ത അവസ്ഥ. ദുബായില്‍ കാല് കുത്തിയാല്‍ കേരള പോലീസ് പോലെയല്ല. അറബികളാണ്, അറബി പോലീസ് കൈയ്യോടെ പൊക്കും. പിന്നെ ഇവിടത്തെ ചാനല്‍ ചര്‍ച്ച പോലൊന്നുമല്ല, മറുലോകം കാണില്ല. അങ്ങനെയാണ് സ്വപ്നയെക്കാണാന്‍ അനില്‍ നമ്പ്യാരെ സുഹൃത്തുക്കള്‍ ഉപദേശിച്ചത്. അങ്ങനെയാണ് സ്വപ്ന സഹായിച്ചത്. ഇക്കാര്യമാണ് ചോദ്യം ചെയ്യലിനിടെ സ്വപ്ന മണിമണിയായി പറഞ്ഞത്.

മാധ്യമ പ്രവര്‍ത്തകന്‍ അനില്‍ നമ്പ്യാര്‍ക്ക് യുഎഇയില്‍ വഞ്ചനാകേസ് നിലവിലുണ്ടായിരുന്നെന്നും അവിടേക്കു പോകാന്‍ താനാണ് സഹായിച്ചതെന്നും സ്വപ്നയുടെ മൊഴി. യുഎഇ സന്ദര്‍ശിച്ചാല്‍ അറസ്റ്റ് ഉണ്ടാകുമോ എന്ന് അനില്‍ നമ്പ്യാര്‍ ഭയന്നിരുന്നു. ഒരു വ്യവസായിയുടെ അഭിമുഖത്തിനായി അനിലിന് ദുബായില്‍ പോകണമായിരുന്നു. യാത്രാനുമതി ലഭിക്കാന്‍ സരിത്തിനെ സമീപിച്ചു.

സരിത്ത് തന്നെ വിളിക്കാന്‍ നിര്‍ദ്ദേശിച്ചതനുസരിച്ചു അനില്‍ വിളിച്ചു. പല നൂലാമാലകളും ഈസിയായി കടന്നു. കോണ്‍സല്‍ ജനറല്‍ വഴി യാത്രാനുമതി നല്‍കി. അങ്ങനെയാണ് ഒരിക്കലും കാലുകുത്താന്‍ പറ്റാത്ത അനിലിന് വീണ്ടും ദുബായ് കാണാന്‍ കഴിഞ്ഞത്.

അതിനുശേഷമാണ് തങ്ങള്‍ നല്ല സുഹൃത്തുക്കളായതെന്നാണ് സ്വപ്ന പറയുന്നത്. 2018ല്‍ താജ് ഹോട്ടലില്‍ അത്താഴ വിരുന്നിനായി അനില്‍ നമ്പ്യാര്‍ വിളിച്ചിരുന്നെന്നും അന്ന് യുഎഇ നിക്ഷേപങ്ങളെക്കുറിച്ച് അനില്‍ നമ്പ്യാര്‍ അന്വേഷിച്ചുവെന്നും സ്വപ്‌ന പറയുന്നു. അനിലിന്റെ ബന്ധുവിന്റെ ടൈല്‍ കട ഉദ്ഘാടനത്തിന് യുഎഇ കോണ്‍സല്‍ ജനറലിനെ എത്തിക്കാന്‍ സഹായിച്ചുവെന്നും സ്വപ്‌ന വ്യക്തമാക്കിയിട്ടുണ്ട്.

സ്വര്‍ണം കൊണ്ടുവന്നത് നയതന്ത്ര ബാഗേജില്‍ അല്ലെന്നു വരുത്തിത്തീര്‍ക്കാന്‍ അനിലിന്റെ ഇടപെടല്‍ ഉണ്ടായതായും സ്വപ്‌നയുടെ മൊഴിയില്‍ പറയുന്നു. അഞ്ചാം തീയതി ഉച്ചയ്ക്ക് ഒളിവില്‍ പോകാന്‍ തിരുവനന്തപുരത്തെ ഒരു അഭിഭാഷകന്‍ നിര്‍ദ്ദേശിച്ചുവെന്നും അതിനു മുമ്പ് അനില്‍ നമ്പ്യാര്‍ തന്നെ വിളിച്ചുവെന്നും സ്വപ്‌ന പറഞ്ഞു. കസ്റ്റംസ് പിടിച്ചെടുത്ത സ്വര്‍ണം അടങ്ങിയ ബാഗേജ് നയതന്ത്ര ബാഗേജ് അല്ലെന്നും വ്യക്തിപരമായ ബാഗേജ് ആണെന്നും കോണ്‍സല്‍ ജനറലിനെക്കൊണ്ട് പ്രസ്താവന ഇറക്കാന്‍ അനില്‍ നമ്പ്യാര്‍ ആവശ്യപ്പെട്ടു.

അനില്‍ നമ്പ്യാരെ തിരിച്ചുവിളിച്ച് കോണ്‍സല്‍ ജനറലിന്റെ പേരില്‍ ഒരു കത്ത് തയാറാക്കി നല്‍കാന്‍ പറഞ്ഞു. ഇതു നല്‍കാം എന്ന് അനില്‍ അറിയിച്ചു. എന്നാല്‍ ആ സമയത്ത് താന്‍ സ്വയരക്ഷയ്ക്കുള്ള ശ്രമത്തിലായിരുന്നതിനാല്‍ ഇക്കാര്യം തുടര്‍ന്ന് അന്വേഷിക്കാന്‍ കഴിഞ്ഞില്ലെന്നും സ്വപ്‌നയുടെ മൊഴിയില്‍ പറയുന്നു.

അനില്‍ നമ്പ്യാരുടെ കുരുക്കുകള്‍ ഒഴിവാക്കി യുഎഇയില്‍ എത്തിച്ചത് സ്വപ്നയുടെ വെറും ഒരു സാമ്പിള്‍ മാത്രമാണ്. ഇതിനേക്കാളും കുരുക്കുള്ള കേസുകള്‍ പോലും സ്വപ്ന ഈസിയായി ഊരിക്കൊടുത്തിട്ടുണ്ട്. അതാണ് സ്വപ്നയ്ക്ക് ഇത്രയും ബഹുമാനം നേടിക്കൊടുത്തത്. ആ ബഹുമാനത്തില്‍ തട്ടിയാണ് ഒന്നൊന്നായി വീണുകൊണ്ടിരിക്കുന്നത്.