കസ്റ്റംസില്‍ സി. പി. എം ഫ്രാക്ഷനെന്ന് കേന്ദ്ര സര്‍ക്കാരും ബിജെപിയും. എത്രയും വേഗം ഇടതന്‍മാരെ കണ്ടെത്തി അറിയിക്കാന്‍ കേന്ദ്ര സര്‍ക്കാര്‍ കസ്റ്റംസിന് നിര്‍ദ്ദേശം നല്‍കി. ഇല്ലെങ്കില്‍ ചിലപ്പോള്‍ കേരളത്തിലെ കസ്റ്റംസ് ഉദ്യോഗസ്ഥര്‍ക്കെതിരെ നടപടി വരും.

എന്‍ ഐ എ , കസ്റ്റംസ് അന്വേഷണങ്ങള്‍ ശരിയായ ദിശയിലാണെന്നും അന്വേഷണം തീരുമ്പോള്‍ ആരൊക്കെ അകത്താകുമെന്ന് അറിയാമെന്നും മുഖ്യമന്ത്രി പിണറായി വിജയന്‍ ശനിയാഴ്ച പറഞ്ഞത് ഇക്കാര്യം മനസില്‍ വച്ചുകൊണ്ടാണെന്ന സംശയത്തിലാണ് ബിജെപി നേതൃത്വം.

അതേ സമയം സ്വര്‍ണ്ണക്കടത്തു കേസില്‍ മുഖ്യപ്രതിയായ സ്വപ്ന സുരേഷിന്റെ മൊഴി ചോര്‍ന്നതു സംബന്ധിച്ച് കസ്റ്റംസ് ഉന്നത കേന്ദ്രങ്ങള്‍ അന്വേഷണം തുടങ്ങി. സ്വപ്നയുടെ നിരവധി പേജുകളുള്ള മൊഴിയില്‍ നിന്ന് മാധ്യമ പ്രവര്‍ത്തകനായ അനില്‍ നമ്പ്യാരുമായി ബന്ധപ്പെട്ട ഭാഗം മാത്രം ചോര്‍ന്നതിനു പിന്നില്‍ പ്രത്യേക ലക്ഷ്യങ്ങളുണ്ടെന്നാണ് ഉന്നത ഉദ്യോഗസ്ഥരുടെ വിലയിരുത്തല്‍. മൂന്നു പേജുകളുള്ള മൊഴി കേരളം എമ്പാടും വാട്ട്‌സ് ആപ്പ് പോലുള്ള സാമൂഹിക മാധ്യമങ്ങളിലൂടെ വന്‍തോതില്‍ പ്രചരിച്ചു.

മൊഴിയിലെ ചില ഭാഗങ്ങള്‍ ബി ജെ പി കേന്ദ്ര നേതൃത്വത്തെയും പ്രതിരോധത്തിലാക്കിയിട്ടുണ്ട്. ഈ സാഹചര്യത്തില്‍ ഉത്തരവാദികളായവരെ ഉടന്‍ കണ്ടെത്തണമെന്നാണ് കേന്ദ്ര സര്‍ക്കാര്‍ നല്‍കിയിരിക്കുന്ന നിര്‍ദേശം. കസ്റ്റംസിലെ ഇടത് ആഭിമുഖ്യമുള്ളവരാണ് മൊഴി ചോര്‍ന്നതിന് പിന്നിലെന്ന നിഗമനത്തിലാണ് ഉന്നത ഉദ്യോഗസ്ഥര്‍.

സ്വര്‍ണ്ണക്കടത്ത് കേസില്‍ മുഖ്യമന്ത്രിയുടെ ഓഫീസിനെതിരായ ആരോപണങ്ങളില്‍ പ്രതിരോധത്തിലായിരുന്ന സിപിഎം അനില്‍ നമ്പ്യാരുടെ ചോദ്യം ചെയ്യല്‍ ഉപയോഗിച്ച് ബിജെപിയെ കടന്നാക്രമിക്കുകയാണ്. ജനം ടിവിയെ തന്നെ തള്ളിപ്പറഞ്ഞ ബിജെപി നിലപാടിനെ അടക്കം പരിഹസിച്ചാണ് വിമര്‍ശനം. എല്‍ഡിഎഫ് കണ്‍വീനര്‍ ആരോപണമുന കേന്ദ്രമന്ത്രി വി മുരളീധരനിലേക്ക് നീട്ടുന്നു. സ്വര്‍ണക്കടത്തിനെ കുറിച്ച് ബിജെപിയുടെ പല ഉന്നത നേതാക്കള്‍ക്കും അറിയാമായിരുന്നെന്നാണ് നമ്പ്യാരുടെയും സ്വപ്നയുടെയും മൊഴികളിലൂടെ വ്യക്തമാകുന്നതെന്ന് ഇടതുമുന്നണി കണ്‍വീനര്‍ എ.വിജയരാഘവന്‍ ആരോപിച്ചു.

കേന്ദ്ര സര്‍ക്കാരിനെ സഹായിക്കാന്‍ അനില്‍ നമ്പ്യാര്‍ സ്വപ്നയോട് ആവശ്യപ്പെട്ട വിവരവും ചോര്‍ന്നു. ഇത് സത്യമാണെങ്കില്‍ അത് ബി ജെ പി കേന്ദ്രനേത്യത്വത്തെ വല്ലാത്ത പ്രതിസന്ധിയിലാക്കിയിട്ടുണ്ട്.

ബി ജെ പി സംസ്ഥാന പ്രസിഡന്റിനെതിരെ വരെ സി പി എം നേതാക്കള്‍ ആരോപണം ഉന്നയിച്ച് കഴിഞ്ഞു. മുഖ്യമന്ത്രിയും ഇത് സംബന്ധിച്ച് ചില സൂചന നല്‍കിയിട്ടുണ്ട്. ശനിയാഴ്ച ഇക്കാര്യത്തില്‍ കുറച്ചു കൂടി വ്യക്തത വരുത്തി.

തിരുവനന്തപുരം വിമാനത്താവളത്തിലെ നയതന്ത്രബാഗില്‍ സ്വര്‍ണം കണ്ടെത്തിയ ദിവസം രണ്ട് തവണയാണ് സ്വപ്നയും അനില്‍ നമ്പ്യാരും ഫോണില്‍ സംസാരിച്ചത്. നയതന്ത്രബാഗില്‍ സ്വര്‍ണം കണ്ടെത്തിയാല്‍ ഗുരുതരപ്രശ്‌നമാകും എന്നതിനാല്‍ ബാഗ് വ്യക്തിപരമായ ആവശ്യത്തിനാണെന്ന് കാണിച്ച് കോണ്‍സുല്‍ ജനറലിന് കത്ത് നല്‍കാന്‍ തന്നോട് അനില്‍ നമ്പ്യാര്‍ ആവശ്യപ്പെട്ടതായി സ്വപ്നയുടെ മൊഴിയിലുണ്ട്.

ജൂലൈ അഞ്ചിനാണ് അനില്‍ നമ്പ്യാര്‍ സ്വപ്നയെ ഫോണില്‍ വിളിച്ച് ഇക്കാര്യം ആവശ്യപ്പെട്ടത്. ഇത്തരം കത്ത് നല്‍കിയാല്‍ നികുതിയും പിഴയും അടച്ച് കേസില്‍ നിന്നും ഒഴിവാക്കാം എന്നും നമ്പ്യാര്‍ സ്വപ്നയെ ഉപദേശിച്ചു. കോണ്‍സുലര്‍ ജനറല്‍ക്ക് നല്‍കേണ്ട കത്തിന്റെ പകര്‍പ്പ് തയ്യാറാക്കി അയക്കാന്‍ സ്വപ്ന അനില്‍ നമ്പ്യാരോട് ആവശ്യപ്പെടുകയും ചെയ്തു.

ഈ സംഭാഷണം കഴിഞ്ഞ് അധികം വൈകാതെ താന്‍ ഒളിവില്‍ പോയതിനാല്‍ പിന്നെ അനില്‍ നമ്പ്യാരുമായി ബന്ധപ്പെടാനോ കത്തുമായി ബന്ധപ്പെട്ട മറ്റു വിവരങ്ങള്‍ അറിയാനോ സാധിച്ചില്ലെന്നും സ്വപ്നയുടെ മൊഴിയില്‍ പറയുന്നു. സ്വര്‍ണക്കടത്ത് കേസിനും വളരെക്കാലം മുന്‍പേ തന്നെ അനില്‍ നമ്പ്യാരെ പരിചയമുണ്ടെന്നാണ് സ്വപ്ന കസ്റ്റംസിനെ അറിയിച്ചിരിക്കുന്നത്. ഒരു കേസില്‍ നമ്പ്യാരെ സഹായിച്ചിട്ടുണ്ടെന്നും മൊഴി നല്‍കിയിട്ടുണ്ട്.

ബിജെപി സംസ്ഥാന നേതൃത്വം അനില്‍ നമ്പ്യാരൂടെ ചോദ്യം ചെയ്യലോടെ പ്രതിസന്ധിയാലായ വിവരം കേന്ദ്ര നേതൃത്യത്വത്തിന് അറിയാം. എന്നാല്‍ കസ്റ്റംസിന്റെയും എന്‍ ഐ എയുടെയും അന്വേഷണത്തില്‍ ഇടപെടാന്‍ കേന്ദ്രസര്‍ക്കാരിന് പരിമിതികളുണ്ട്. എന്നാല്‍ കസ്റ്റംസിലെ ഇടതന്‍മാരെ അന്വേഷണസംഘത്തില്‍ നിന്നും മാറ്റിനിര്‍ത്താന്‍ കഴിയും. ഒരു കസ്റ്റംസ് അസിസ്റ്റന്റ് കമ്മീഷണര്‍ക്കെതിരെ നേരത്തെ ആരോപണം ഉയര്‍ന്നിരുന്നു. അദ്ദേഹത്തെ കേരളത്തിന് പുറത്തേക്ക് സ്ഥലം മാറ്റി.