സംസ്ഥാന സര്ക്കാരിന്റെ തെറ്റായ നടപടികളുടെ രക്തസാക്ഷിയാണ് അനു' ; യുവാവിന്റെ ആത്മഹത്യയില് പിണറായി സര്ക്കാരിനെതിരെ രൂക്ഷ വിമർശനവുമായി രമേശ് ചെന്നിത്തല
പി.എസ്.സി റാങ്ക് ലിസ്റ്റിന്റെ കാലാവധി അവസാനിച്ചതോടെ ജോലി ലഭിക്കില്ലെന്ന മനോവിഷമത്തില് അനു എന്ന ഉദ്യോഗാര്ഥി ആത്മഹത്യ ചെയ്ത സംഭവത്തില് സംസ്ഥാന സര്ക്കാരിനെതിരെ രൂക്ഷ വിമർശനവുമായി പ്രതിപക്ഷ നേതാവ് രമേശ് ചെന്നിത്തല.
സര്ക്കാരിന്റെ തെറ്റായ നടപടികളുടെ രക്തസാക്ഷിയാണ് അനു. റാങ്ക് ലിസ്റ്റ് മൂന്ന് മാസം നീട്ടിയിരുന്നെങ്കില് ഈ അവസ്ഥയുണ്ടാകുമായിരുന്നില്ല. സംഭവത്തില് ഗവണ്മെന്റ് അന്വേഷണം നടത്തണമെന്നും കുടുംബത്തിന് സര്ക്കാര് സഹായം നല്കണമെന്നും രമേശ് ചെന്നിത്തല ആവശ്യപ്പെട്ടു.
തിരുവനന്തപുരം നെയ്യാറ്റിന്കര കാരക്കോണം സ്വദേശി അനുവാണ് ജീവനൊടുക്കിയത്. ഇക്കഴിഞ്ഞ സിവില് എക്സൈസ് ഓഫീസര് റാങ്ക് ലിസ്റ്റില് 77 ആം റാങ്കുകാരനായിരുന്നു അനു. ജൂണ് 19ാം തീയതിയാണ് റാങ്ക് ലിസ്റ്റിന്റെ കാലാവധി അവസാനിച്ചത്. റാങ്ക് ലിസ്റ്റ് റദ്ദാക്കിയതില് അനു ഏറെ മനോവിഷമത്തിലായിരുന്നെന്ന് അച്ഛന് സുകുമാരന് പറഞ്ഞു. ജോലിയില്ലാത്തതില് ദുഃഖമുണ്ടെന്ന് അനുവിന്റെ ആത്മഹത്യ കുറിപ്പിലും വ്യക്തമാക്കിയിരുന്നു.
https://www.facebook.com/Malayalivartha
