ഭര്‍ത്താവുമായി പിണങ്ങി സ്വന്തം വീട്ടില്‍ കഴിയുകയായിരുന്ന യുവതി പിഞ്ചു കുഞ്ഞുങ്ങളുമായി വീട്ടുവളപ്പിലെ കിണറ്റില്‍ ചാടി . വീട്ടില്‍ ആരുമില്ലാതിരുന്ന സമയം നോക്കിയാണ് യുവതി കിണറ്റില്‍ ചാടിയത്. ആറും മൂന്നും വയസുള്ള കുട്ടികള്‍ മരിച്ചു. യുവതിയായ വീട്ടമ്മ രക്ഷപ്പെട്ടു. കുഴല്‍മന്ദം കളപ്പെട്ടി വിനോദിന്റെ ഭാര്യ മഞ്ജുള (27) ആണ് കുട്ടികളുമായി കിണറ്റില്‍ ചാടിയത്. അഭിന്‍(6), അഭിത്ത്(3) എന്നിവരാണ് മരിച്ചത്.

പാലക്കാട് കണ്ണാടി പഞ്ചായത്തിലെ കിണാശ്ശേരി ഉപ്പുംപാടത്ത് ഇന്നലെ ഉച്ചയോടെയാണ് സംഭവം.ഭര്‍ത്താവുമായി പിണങ്ങി മഞ്ജുള കുറച്ചുകാലമായി കുട്ടികള്‍ക്കൊപ്പം ഉപ്പുംപാടത്തെ സ്വന്തം വീട്ടിലാണ് കഴിഞ്ഞിരുന്നത്. ഇവര്‍ക്കൊപ്പം അമ്മ പ്രേമയും സഹോദരന്‍ മനോജുമാണ് താമസിക്കുന്നത്. മനോജ് ജോലി ആവശ്യത്തിനായി പുറത്തുപോയിരുന്നു. അമ്മ സമീപത്തെ കടയില്‍ പോയതിനിടെയാണ് ഇവരുടെ വീട്ടുവളപ്പില്‍ തന്നെയുള്ള കിണറ്റില്‍ കുട്ടികളുമായി മഞ്ജുള ചാടിയത്.
സംഭവം അറിഞ്ഞയുടന്‍ സമീപവാസിയായ ഒരാള്‍ കിണറ്റിലിറങ്ങിയാണ് മഞ്ജുളയെ രക്ഷിച്ചത്. പാലക്കാട് നിന്ന് അഗ്നിരക്ഷാസേന സ്ഥലത്തെത്തി കുട്ടികളെയും മഞ്ജുളയെയും ജില്ലാ ആശുപത്രിയില്‍ എത്തിച്ചെങ്കിലും കുട്ടികള്‍ മരിച്ചിരുന്നു. കുട്ടികളുടെ മൃതദേഹങ്ങള്‍ ജില്ലാ ആശുപത്രി മോര്‍ച്ചറിയില്‍ സൂക്ഷിച്ചിരിക്കയാണ്.