രണ്ടു സംഭവങ്ങൾ ഇപ്പോൾ മുഴുവൻ സേനയ്ക്ക് തന്നെ നാണക്കേടുണ്ടാക്കിയിരിക്കുകയാണ് . കള്ളിക്കാട് എക്‌സൈസ് ചെക്ക് പോസ്റ്റിൽ ഡ്യൂട്ടിയിലുണ്ടായിരുന്ന ഉദ്യോഗസ്ഥൻ യൂണിഫോമിൽ മദ്യപിച്ച് ബോധരഹിതനായി വീണു. കള്ളിക്കാട് ചെക്ക് പോസ്റ്റിലെ എക്‌സൈസ് പ്രിവന്റീവ് ഓഫീസറായ ഷീൻരാജാണ് യൂണിഫോം ധരിച്ച് മദ്യലഹരിയിൽ ബോധം കെട്ട് കിടന്നുറങ്ങിയത്. ഇയാളുടെ ഉത്തരവാദിത്തമില്ലായ്മ കാരണം ചെക്ക് പോസ്റ്റിലൂടെയുള്ള വാഹന പരിശോധന പൂർണ്ണമായും തടസ്സപ്പെട്ടു. അതിർത്തി കടന്നെത്തുന്ന ലഹരി വസ്തുക്കളും വ്യാജമദ്യവും തടയേണ്ട ഉദ്യോഗസ്ഥൻ തന്നെ മദ്യപിച്ച് ബോധമില്ലാതെ വീണത് എക്‌സൈസ് വകുപ്പിന് വലിയ നാണക്കേടായി മാറിയിരിക്കുകയാണ്.

നാട്ടുകാരാണ് എക്‌സൈസ് ഉദ്യോഗസ്ഥൻ ചെക്ക് പോസ്റ്റിൽ ബോധമില്ലാത്ത അവസ്ഥയിൽ കിടക്കുന്നത് ആദ്യം കണ്ടത്. വിവരം ഉടനടി എക്‌സൈസിലെ ഉന്നത ഉദ്യോഗസ്ഥരെ അറിയിക്കുകയായിരുന്നു. സംഭവം ഗുരുതരമാണെന്ന് മനസ്സിലാക്കിയ എക്‌സൈസ് അഡീഷണൽ കമ്മീഷണർ വിഷയത്തിൽ അടിയന്തരമായി ഇടപെടുകയും അന്വേഷണത്തിന് ഉത്തരവിടുകയും ചെയ്തു. അഡീഷണൽ കമ്മീഷണറുടെ കർശന നിർദ്ദേശത്തെത്തുടർന്ന് നെയ്യാറ്റിൻകര എക്‌സൈസ് സർക്കിൾ ഇൻസ്പെക്ടറുടെ (സി.ഐ) നേതൃത്വത്തിലുള്ള പ്രത്യേക സംഘം ഉടൻ തന്നെ സംഭവസ്ഥലത്തേക്ക് തിരിച്ചു.ഉന്നത ഉദ്യോഗസ്ഥരുടെ നേതൃത്വത്തിലുള്ള അന്വേഷണ സംഘം കള്ളിക്കാട് ചെക്ക് പോസ്റ്റിൽ എത്തിയപ്പോൾ കണ്ടത്

എക്‌സൈസ് യൂണിഫോം അണിഞ്ഞ പ്രിവന്റീവ് ഓഫീസർ ഷീൻരാജ് തറയിൽ ബോധം കെട്ട് കിടക്കുന്ന കാഴ്ചയാണ്. ചുറ്റും നടക്കുന്നത് എന്താണെന്ന് പോലും അറിയാത്ത വിധം അബോധാവസ്ഥയിലായിരുന്നു ഇയാൾ. തുടർന്ന് ഇയാളെ കസ്റ്റഡിയിലെടുക്കുകയും ഉന്നത അധികാരികളുടെ നിർദ്ദേശപ്രകാരം വൈദ്യപരിശോധനയ്ക്ക് വിധേയനാക്കുകയും ചെയ്തു. പരിശോധനയിൽ ഇയാൾ അമിതമായി മദ്യപിച്ചിട്ടുണ്ടെന്ന് സ്ഥിരീകരിച്ചിട്ടുണ്ട്.

മറ്റൊരിടത്ത് സെൻട്രൽ സ്‌റ്റേഷനിലെ ലോക്കറിൽ സൂക്ഷിച്ചിരുന്ന 87 ഗ്രാം രാസലഹരി സീൽചെയ്ത കവറോടെ മോഷ്ടിച്ച എസ്ഐ, പിടിവീഴുമെന്നായപ്പോൾ‍ തിരിച്ചേൽപിച്ചത് 202 ഗ്രാം ലഹരി! സംഭവത്തിൽ എറണാകുളം സെൻട്രൽ പൊലീസ് എസ്‌ഐ തിരുവനന്തപുരം കാട്ടാക്കട സ്വദേശി അനസ്‌ എസ്‌.ത‍ൗഫീഖിനെ അറസ്റ്റ് ചെയ്തു. പ്രതിയെ സസ്‌പെൻഡ്‌ ചെയ്‌തു. വകുപ്പുതല അന്വേഷണം ആരംഭിച്ചു. രണ്ടര ഇരട്ടിയോളം രാസലഹരി സീൽ ചെയ്യാത്ത കവറിലാണ് എസ്ഐ തിരിച്ചേൽപിച്ചത്. എന്തിനാണ് ലഹരി പുറത്തേക്കു കടത്തിയതെന്ന കാര്യത്തിലും അധിക അളവ് എങ്ങനെ വന്നെന്നതിലും വ്യക്തതയില്ല. എസ്എച്ച്ഒയ്ക്കു നൽകിയ വിശദീകരണത്തിൽ കളവായ വാദങ്ങൾ പറഞ്ഞെന്നും സസ്പെൻഷൻ ഉത്തരവിൽ പറയുന്നു.

ഓപ്പറേഷൻ തൂഫാൻ പദ്ധതിയുടെ ഭാഗമായി ബോധവൽക്കരണ ക്ലാസുകൾ എടുക്കുന്നതിലുൾപ്പെടെ അനസ് സജീവമായിരുന്നു. ലഹരിക്കേസിൽ മുൻപ് വിവരങ്ങൾ ചോർത്തിയോ, മറ്റാരെയെങ്കിലും കുടുക്കാനാണോ മോഷ്ടിച്ചത് തുടങ്ങിയ കാര്യങ്ങൾ അന്വേഷിക്കും.ട്രാഫിക് വെസ്റ്റ് എസിപി അന്വേഷണം നടത്തി 10 ദിവസത്തിനകം റിപ്പോർട്ട് സമർപ്പിക്കും. കോടതി നടപടി പൂർത്തിയാക്കിയ ശേഷം നശിപ്പിക്കാൻ സൂക്ഷിച്ച രാസലഹരിയാണ് ലോക്കർ റൂമിൽ നിന്ന് എസ്ഐ കടത്തിയത്.87 ഗ്രാമിന്റെ കവർ ഇല്ലെന്നു കണ്ടെത്തിയതിനെത്തുടർന്നുള്ള അന്വേഷണത്തിലാണ് ഈ മാസം 18ന് അനസ് ലോക്കർ മുറിയിൽ കയറുന്നതു കണ്ടെത്തിയത്.

വിവിധ കേസുകളിലായി പിടിച്ചെടുക്കുന്ന തൊണ്ടിമുതലുകൾ അതത് സ്‌റ്റേഷനുകളിലെ സുരക്ഷിത ലോക്കറുകളിലും അലമാരകളിലുമാണ് സൂക്ഷിക്കുക. ഇത്തരത്തിൽ എറണാകുളം സെൻട്രൽ സ്‌റ്റേഷനിൽ എത്തിച്ച എംഡിഎംഎ അടങ്ങിയ സീൽ ചെയ്‌ത കവറാണ് എസ്‌ഐ അനസ് കടത്തിയത്. കഴിഞ്ഞ 18-ാം തീയതിയാണ് സ്‌റ്റേഷനിലെ അലമാരയിൽ സൂക്ഷിച്ചിരുന്ന ഈ കവർ പ്രതി മോഷ്‌ടിച്ചത്.