യുഡിഎഫ് വിട്ട് ഇടതുമുന്നണിയിലേക്കു പോകാന്‍ ഉറച്ചു നില്‍ക്കുന്ന വീരന്റെ നിലപാട് മയപ്പെടുത്താന്‍ ഉമ്മന്‍ചാണ്ടി നാളെ ചര്‍ച്ചയ്ക്ക്. നാളെ കോഴിക്കോട്ടുവച്ചാണ് ചര്‍ച്ച. ഏറെ നാളായി യുഡിഎഫുമായി മാനസിക അകല്‍ച്ചയിലാണ് ജെഡിയു. പാലക്കാട്ട് ലോക്‌സഭ തെരഞ്ഞെടുപ്പിലേറ്റ തോല്‍വി സംബന്ധിച്ചു നടത്തിയ അന്വേഷണത്തിന്റെ റിപ്പോര്‍ട്ട് സമര്‍പ്പിക്കാന്‍ വൈകുന്നതും ജെഡിയുവിനെ ചൊടിപ്പിച്ചിട്ടുണ്ട്.
യുഡിഎഫ് വിട്ടുപോകാന്‍ ജെഡിയു ഒരുങ്ങുന്നതായി മുമ്പുതന്നെ വാര്‍ത്തകള്‍ വന്നിരുന്നു. പാര്‍ട്ടി യോഗങ്ങളിലും യുഡിഎഫിനെതിരായ നിലപാടുകള്‍ തന്നെയാണ് ജെഡിയു എടുക്കുന്നതെന്നാണ് സൂചന. യുഡിഎഫ് യോഗത്തില്‍ നിന്നും വിട്ടു നില്‍ക്കാനും പാര്‍ട്ടിക്കുള്ളില്‍ ആലോചന നടക്കുന്നുണ്ട്.
പാലക്കാട് ഡിസിസി പ്രസിഡന്റടക്കം ജില്ലയിലെ മൂന്നു കോണ്‍ഗ്രസ് നേതാക്കള്‍ക്കു എം പി വീരേന്ദ്രകുമാറിന്റെ പരാജയത്തില്‍പങ്കുള്ളതായി യുഡിഎഫ് നിയോഗിച്ച ഉപസമിതി കണ്ടെത്തിയിരുന്നു. എന്നാല്‍ അന്തിമ റിപ്പോര്‍ട്ടില്‍ നിന്നും ഡിസിസി പ്രസിഡന്റിനെ ഒഴിവാക്കാന്‍ ആലോചന നടക്കുന്നതായി ആരോപണമുണ്ട്. ഈ സാഹചര്യത്തിലാണു ജെഡിയു നിലപാടു കടുപ്പിക്കുന്നത്.
ലോക്‌സഭയിലെ തോല്‍വിക്കു കാരണമായ പാലക്കാട് ഡി.സി.സി പ്രസിഡന്റ് സി.വി.ബാലചന്ദ്രന്‍, സി.ചന്ദ്രന്‍, പി.ബാലഗോപാല്‍ എന്നിവര്‍ക്കെതിരെയാണ് നടപടി ആവശ്യപ്പെട്ടിരിക്കുന്നത്. എന്നാല്‍, ഇടതു മുന്നണിയിലേക്ക് ചേക്കേറാനൊരുങ്ങുന്ന എം പി വീരേന്ദ്രകുമാറിനെ അനുനയിപ്പിച്ച് ഒപ്പം നിര്‍ത്താനുള്ള തന്ത്രങ്ങളുടെ ഭാഗമായാണ് കോണ്‍ഗ്രസ് നേതാക്കള്‍ക്കെതിരെ നടപടിക്കു ശുപാര്‍ശ ചെയ്തതെന്നാണ് രാഷ്ട്രീയ നിരീക്ഷകര്‍ പറയുന്നത്. എന്നാല്‍, ഇക്കാര്യത്തില്‍ നടപടികള്‍ വൈകുന്നത് ജെഡിയുവിനെ ചൊടിപ്പിച്ചിരിക്കുകയാണ്.
യു.ഡി.എഫില്‍ തൃപ്തരല്ലെന്ന് തന്നെയാണ് ജെ.ഡി.യു നേതൃയോഗത്തിന് ശേഷം കേന്ദ്ര നേതൃത്വത്തെ അറിയിച്ചിരുന്നത്. യു.ഡി.എഫ് വിട്ട് ഇടതുമുന്നണിയില്‍ പോകുന്നതില്‍ അവര്‍ക്ക് തടസ്സമൊന്നുമില്ലെന്നും കേന്ദ്രത്തിന് സൂചന നല്‍കിയിട്ടുണ്ട്. മാത്രമല്ല, ദേശീയതലത്തില്‍പോലും ജനതാദളിന്റെ സ്വാഭാവിക മിത്രം ഇടതുപാര്‍ട്ടികളാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha