സംസ്ഥാനത്ത് 8 ദിവസമായി നടക്കുന്ന പ്രക്ഷോഭങ്ങള്ക്കായി ജലപീരങ്കികള് ഒഴുക്കിയത് 23.04 ലക്ഷം ലീറ്റര് വെള്ളം
സംസ്ഥാനത്ത് കഴിഞ്ഞ 8 ദിവസമായി നടക്കുന്ന പ്രക്ഷോഭങ്ങള്ക്കെതിരെ ഇതു വരെ പൊലീസ് ചീറ്റിച്ചത് 23.04 ലക്ഷം ലീറ്റര് വെള്ളം.
ഒരു ദിവസം ശരാശരി 24000 ലീറ്റര് വെള്ളമാണ് ഓരോ സമര കേന്ദ്രത്തിലെയും ജലപീരങ്കികള്ക്കായി 'കരുതി'വയ്ക്കുന്നത്. ജലപീരങ്കിയുടെ ടാങ്ക് കാലിയാകുമ്പോള് വീണ്ടും നിറയ്ക്കാന് തോട്ടിലെയും പുഴയിലെയും ചെളിവെള്ളമാണ് ചിലയിടങ്ങളില് ഉപയോഗിക്കുന്നതെന്നും ആക്ഷേപമുണ്ട്. സംസ്ഥാനത്ത് ഒരു ദിവസം 2,88,000 ലക്ഷം ലീറ്റര് വെള്ളമാണു സമരക്കാരെ തുരത്താന് ജലപീരങ്കികളിലൂടെ ഉപയോഗിക്കുന്നത്.
സംസ്ഥാനത്ത് 12 ജലപീരങ്കികളാണുള്ളത്. തിരുവനന്തപുരം ഉള്പ്പെടെ പ്രധാന നഗരങ്ങളില് 2 എണ്ണമുണ്ട്. കഴിഞ്ഞ ഞായര് ഒഴികെ, സമരങ്ങള് നടന്ന 8 ദിവസവും പ്രധാന നഗരങ്ങളിലെ ജലപീരങ്കികളില് പലതിനും വിശ്രമമില്ലായിരുന്നു.മിനിറ്റില് 2500 3000 ലീറ്റര് വേഗത്തിലാണ് ജലപീരങ്കി പ്രയോഗിച്ചത്.
ഒരു മിനിറ്റില് 2000 മുതല് 10000 ലീറ്റര് വേഗത്തില് വെള്ളം ചീറ്റാന് ജലപീരങ്കിയുടെ മുകളില് ഘടിപ്പിച്ച 2 പൈപ്പുകള് (ഗണ്) വഴി കഴിയും. 150 മീറ്റര് അകലെയുള്ളവരെപ്പോലും തുരത്തിയോടിക്കാനും വീഴ്ത്താനും ഹൈഡ്രോളിക് സംവിധാനത്തിലൂടെ കഴിയും.
പലപ്പോഴും ജലപീരങ്കി പ്രയോഗിക്കുന്നത് സമരക്കാരുടെ തലയ്ക്കു താഴെയാണ്. കണ്ണിനും കാതിനു നേരെയും വെള്ളം ചീറ്റിയാല് 'പണി' പാളും. ആഞ്ഞു വീശിയാല് 30 സെക്കന്ഡുകള്ക്കുള്ളില് സമരക്കാരെ ഒന്നടങ്കം നിലത്തടിച്ചു വീഴ്ത്താനും ജലപീരങ്കിക്കു കഴിയും. സ്ത്രീകള് ഉള്പ്പെടെയുള്ള സമരക്കാരായതിനാല് ശക്തിയും വേഗവും കുറച്ചാണ് ഇപ്പോഴുള്ള പീരങ്കി പ്രയോഗം. എല്ലാ ജില്ലകളിലും ജലപീരങ്കി അനുവദിച്ചിട്ടില്ല. ആവശ്യമുള്ളപ്പോള് മറ്റു ജില്ലകളില് നിന്ന് എത്തിക്കുകയാണ് പതിവ്.
പൊലീസുകാരുടെ ലാത്തി പിടിച്ചു വാങ്ങിയും ബാരിക്കേഡുകളില് തൊഴിച്ചും, ആക്രമിക്കുന്നവര്ക്കെതിരെ ജാമ്യമില്ലാ വകുപ്പുകള് പ്രകാരം കേസുകള് റജിസ്റ്റര് ചെയ്യാന് രഹസ്യ നിര്ദേശം. എല്ലാ കേസുകളിലും സമരം നയിക്കുന്ന നേതാക്കളെ നിര്ബന്ധമായും പ്രതിപ്പട്ടികയില് ഉള്പ്പെടുത്തണമെന്നും നിര്ദേശമുണ്ട്.
സെക്രട്ടേറിയറ്റിനു മുന്നില് നടക്കുന്ന അക്രമ സമരവുമായി ബന്ധപ്പെട്ട് അന്യായമായി സംഘം ചേരല്, പൊലീസിനെ ആക്രമിക്കല്, വഴി തടയല് എന്നീ വകുപ്പുകളാണു ഭൂരിഭാഗം കേസുകളിലും ചുമത്തുന്നത്. ദിവസേന വിവിധ വകുപ്പുകള് പ്രകാരം 25 കേസുകളാണു റജിസ്റ്റര് ചെയ്യുന്നത്. ഇവയില് 15 എണ്ണവും ജാമ്യമില്ലാ വകുപ്പുകള് പ്രകാരമാണ്.
https://www.facebook.com/Malayalivartha