സ്ത്രീകളെ അധിഷേപിച്ച വീഡിയോ പോസ്റ്റ് ചെയ്ത യൂട്യൂബര്‍ വിജയ് പി നായരെ വീട്ടില്‍ കയറി മാന്യമായി കൈകാര്യം ചെയ്ത ഡബ്ബിംഗ് ആര്‍ട്ടിസ്റ്റ് ഭാഗ്യലക്ഷ്മി, ആക്റ്റിവിസ്റ്റായ ദിയ സന, ശ്രീലക്ഷ്മി അറയ്ക്കല്‍ എന്നിവരുടെ ഭാവി ഹൈക്കോടതിലാണ്. കേസെടുത്താല്‍ അഭിമാനത്തോടെ ജയിലില്‍ കിടക്കുമെന്ന് വീമ്പിളക്കിയവരെ മഷിയിട്ട് നോക്കിയിട്ടും കാണാനില്ല. അവര്‍ അഭിമാന പൂര്‍വം മുന്‍കൂര്‍ ജാമ്യത്തിനായി ഹൈക്കോടതിയില്‍ എത്തിയിരിക്കുകയാണ്. ഹൈക്കോടതി വിധി വരെ ഇവരെ തൊടേണ്ട എന്നാണ് തമ്പാനൂര്‍ പോലീസിന് കിട്ടിയ നിര്‍ദേശം.

അതേസമയം സര്‍ക്കാരിന്റേയും പോലീസിന്റേയും മുഖത്തുള്ള അടിയെന്ന് പറഞ്ഞ ഇവര്‍ക്കെതിരെ കോടതിയില്‍ ശക്തമായി വാദിക്കാനും തമ്പാനൂര്‍ പോലീസ് തീരുമാനിച്ചിട്ടുണ്ട്. ജാമ്യം ലഭിക്കാനായി ഇവര്‍ നടത്തുന്ന നീക്കങ്ങള്‍ തിരിച്ചറിഞ്ഞ് മറ്റ് ചില വകുപ്പുകളും കൂട്ടിച്ചേര്‍ത്തിട്ടുണ്ട്. നിയമം നിയമത്തിന്റെ വഴിയ്ക്ക് നീങ്ങട്ടെയെന്നാണ് സര്‍ക്കാരും കരുതുന്നത്.

വിജയ് പി നായരുടെ ലാപ്‌ടോപ്പും മൊബൈല്‍ഫോണും പൊലീസില്‍ ഏല്‍പ്പിച്ചുവെന്നിരിക്കെ മോഷണക്കുറ്റം ചുമത്തിയ നടപടിയും കൈയേറ്റവും നിലനില്‍ക്കില്ലെന്നാകും പ്രധാനമായും ഹര്‍ജിക്കാര്‍ വാദിക്കുക. അതേസമയം വീഡിയോ തെളിവുള്ളതിനാല്‍ ദേഹോപദ്രവമേല്‍പ്പിച്ചുള്ള മോഷണക്കുറ്റം എന്ന നിലയിലേക്കാണ് തമ്പാനൂര്‍ പോലീസ് നിലപാട് കടുപ്പിക്കുന്നത്. കൈയേറ്റം നടന്നുവെന്ന് വീഡിയോയില്‍ വ്യക്തമാണെന്നിരിക്കെ മുന്‍കൂര്‍ ജാമ്യ ഹര്‍ജിയില്‍ ഹൈക്കോടതി സ്വീകരിക്കുന്ന തീരുമാനമെന്താകുമെന്നത് നിര്‍ണായകമാണ്. ഭാഗ്യലക്ഷ്മി അടക്കമുള്ളവരുടെ ജാമ്യ ഹര്‍ജിയെ സെഷന്‍സ് കോടതിയില്‍ പൊലീസ് ശക്തമായി എതിര്‍ത്തിരുന്നു. നിയമം കൈയിലെടുത്ത നടപടിയെ കോടതിയും വിമര്‍ശിച്ചിരുന്നു.

വിജയ് പി നായരുടെ മുറിയില്‍ അതിക്രമിച്ച് കയറി ആക്രമിച്ചിട്ടില്ലെന്നും പ്രശ്‌നം പറഞ്ഞ് പരിഹരിക്കാനാണ് പോയതെന്നുമാണ് ഹര്‍ജിക്കാരുടെ വാദം. പ്രശ്‌നം സംസാരിച്ച് തീര്‍ക്കാന്‍ എത്തിയ തങ്ങളോട് പ്രകോപനപരമായി പെരുമാറുകയായിരുന്നുവെന്നാണ് ഇവര്‍ പറയുന്നത്. വിജയ് പി നായരുടെ ലാപ്‌ടോപ്, മൊബൈല്‍ ഫോണ്‍ എന്നിവ പൊലീസിന് കൈമാറിയിരുന്നെന്നും മോഷണം നടത്താനുള്ള ഉദ്ദേശത്തോടെയല്ല ഇത് കൊണ്ടുപോയതെന്നും ഹര്‍ജിയില്‍ പറയുന്നു. കേസില്‍ പൊലീസ് അറസ്റ്റ് ചെയ്യുമെന്ന ഭയമുണ്ടെന്നും അത് തങ്ങള്‍ക്ക് സമൂഹത്തിലുള്ള അംഗീകാരത്തെ മോശമായി ബാധിക്കുമെന്നതിനാല്‍ അറസ്റ്റ് തടയണമെന്നുമാണ് ഭാഗ്യലക്ഷ്മി അടക്കമുള്ളവരുടെ ആവശ്യം.

സെഷന്‍സ് കോടതി നേരത്തെ ഇവരുടെ മുന്‍കൂര്‍ ജാമ്യാപേക്ഷ തള്ളിയിരുന്നു. മുന്‍കൂര്‍ ജാമ്യാപേക്ഷയില്‍ ഹൈക്കോടതി നിലപാട് കൂടി നോക്കിയ ശേഷം മതി തുടര്‍നടപടികളെന്ന നിലപാടിലാണ് പോലീസ്. അതേസമയം ഹൈക്കോടതി കൂടി ജാമ്യപേക്ഷ തള്ളിയാല്‍ പോലീസ് നിലപാട് കടുപ്പിക്കും. പോലീസിന് മുമ്പില്‍ കീഴടങ്ങാന്‍ ആവശ്യപ്പെടും. അതിന് തയ്യാറായില്ലെങ്കില്‍ ഭൂലോകത്ത് എവിടെയുണ്ടെങ്കിലും പൊക്കാനായിരിക്കും പോലീസ് നോക്കുക.

ഭാഗ്യലക്ഷ്മിയും കൂട്ടരും ഇപ്പോള്‍ തന്നെ പോലീസിന്റെ നിരീക്ഷണത്തില്‍ ഉണ്ടെന്നാണ് സൂചന. ഇവരുടെ നീക്കങ്ങള്‍ പോലീസ് സൂക്ഷ്മമായി നിരീക്ഷിച്ചു വരുന്നു. ചൈന്നൈയിലെ ഫ്‌ളാറ്റില്‍ ഇവര്‍ ഉണ്ടെന്നാണ് കരുതുന്നത്. മുന്‍കൂര്‍ ജാമ്യം ലഭിച്ചാല്‍ വീണ്ടുമിവര്‍ കേരളത്തിലെത്തും. മാധ്യമങ്ങളെ കണ്ട് നാല് വര്‍ത്തമാനം പറയും. അതേസമയം ജാമ്യം ലഭിച്ചില്ലെങ്കില്‍ പിന്നെ മഷിയിട്ട് നോക്കിയാലും കാണില്ല. സുപ്രീം കോടതി വരെ മുന്‍ കൂര്‍ ജാമ്യത്തിന് പോകാമെന്നിരിക്കെ അതിനുള്ള സാധ്യത വിദുരമാണ്.

സുപ്രീം കോടതിയില്‍ ജാമ്യത്തിന് പോയാല്‍ വീണ്ടും ഹൈക്കോടതിയെ സമീപിക്കാനായിരിക്കും പറയുക. മാത്രമല്ല സുപ്രീം കോടതിവരെ പോകുന്നത് വലിയ പണചെലവുള്ള കാര്യമാണ്. നല്ല വക്കീലിനെ വയ്ക്കണമെങ്കില്‍ കീശ കാലിയാകും. സുപ്രീം കോടതിയില്‍ നിന്നും എന്ത് പ്രതികരണം ഉണ്ടാകുമെന്നും അറിയില്ല. അതിനാല്‍ തന്നെ ഹൈക്കോടതി വിധിയോടെ ഭാഗ്യ ലക്ഷ്മിയുടേയും കൂട്ടരുടേയും അവസ്ഥ എന്താണെന്നറിയാം. ജാമ്യം കിട്ടുമെന്ന് തന്നെയാണ് ഇവരുടെ ശുഭ പ്രതീക്ഷ. പക്ഷെ അതില്‍ തമ്പാനൂര്‍ പോലീസിന്റെ നിലപാടായിരിക്കും നിര്‍ണായകം. എന്തായാലും കാത്തിരിക്കാം.