അട്ടപ്പാടി വനത്തില്‍ കഞ്ചാവ് പ്ലാന്റേഷന്‍ കണ്ടെത്തിയതായി റിപ്പോര്‍ട്ട്. 175 കഞ്ചാവ് ചെടികളാണ് കണ്ടെത്തിയത്. മൂന്ന് മാസം പ്രായമുള്ള 91 ചെടികളും ഒരുമാസം പ്രായമുള്ള 84 ചെടികളും അടങ്ങിയ 25 തടങ്ങളിലായാണ് കഞ്ചാവ് ചെടികള്‍ നട്ടുവളര്‍ത്തിവന്നിരുന്നത്. എക്‌സൈസ് ഇന്റലിജന്‍സ് ബ്യൂറോയുടെ രഹസ്യ വിവരത്തിന്റെ അടിസ്ഥാനത്തില്‍ പാലക്കാട് ഐബി യും ജെഇഎസ് അട്ടപ്പാടിയും അഗളി റെയ്ഞ്ച് പാര്‍ട്ടിയും വനംവകുപ്പുമായി സംയുക്തമായി അട്ടപ്പാടി പാടവയല്‍ വില്ലേജില്‍ കുറുക്കത്തിക്കല്ല് വന മേഖലയില്‍ നടത്തിയ പരിശോധനയിലാണ് കഞ്ചാവ് പ്ലാന്റേഷന്‍ കണ്ടെത്തിയത്.

കേസില്‍ ആരേയും പ്രതി ചേര്‍ത്തിട്ടില്ല. വന മേഖലയില്‍ കഞ്ചാവ് കൃഷി വ്യാപകമാകുന്നു എന്ന രഹസ്യ വിവരം ഊരുകളില്‍ നിന്നും ലഭിച്ചതിന്റെ അടിസ്ഥാനത്തില്‍ ചൊവ്വാഴ്ച അതിരാവിലെ നടത്തിയ പരിശോധനയില്‍ ആണ് കഞ്ചാവ് പ്ലാന്റേഷന്‍ കണ്ടെത്തിയത്. കഴിഞ്ഞ വര്‍ഷം മേഖലയില്‍ നിന്നും 420 കഞ്ചാവ് ചെടികള്‍ അടങ്ങിയ വലിയൊരു തോട്ടം എക്‌സൈസ് ഇന്റലിജന്‍സ് വിഭാഗത്തിന്റെ നേതൃത്വത്തില്‍ കണ്ടെത്തിയിരുന്നു.