മരം കടപുഴകി വീണ് ഗതാഗതം തടസ്സപ്പെട്ടതിനെത്തുടര്ന്ന് ആംബുലന്സില് രോഗി മരിച്ചു
ചീയപ്പാറയ്ക്കു സമീപം കൊച്ചി- ധനുഷ്കോടി ദേശീയപാതയില് മരം കടപുഴകി വീണ് ഗതാഗതം തടസ്സപ്പെട്ടതിനെത്തുടര്ന്ന് ആംബുലന്സില് രോഗി മരിച്ചു. രക്തസമ്മര്ദം കുറഞ്ഞതിനെത്തുടര്ന്ന് അടിമാലി താലൂക്ക് ആശുപത്രിയില് ചികിത്സ തേടിയെത്തിയ അടിമാലി ചിറയിലാന് കുഞ്ഞുമുഹമ്മദിന്റെ ഭാര്യ ബീവിയാണ് (55) മരിച്ചത്.
ചീയപ്പാറയ്ക്കു സമീപം മൂന്നു കലുങ്കിലെ വന്മരമാണ് കടപുഴകി വീണത്. അടിമാലിയില് നിന്ന് കോതമംഗലം ഭാഗത്തേക്കു പോകുകയായിരുന്ന ആംബുലന്സാണ് ഗതാഗതക്കുരുക്കില്പെട്ടത്. ബീവിയെ വിദഗ്ധ ചികിത്സയ്ക്കായി കൊണ്ടുപോകും വഴിയാണ് സംഭവം. 15 മിനിറ്റ് ഗതാഗതക്കുരുക്കില് അകപ്പെട്ടതോടെ ബീവി മരിച്ചു. ഇതോടെ ബീവിയെ തിരികെ അടിമാലി താലൂക്ക് ആശുപത്രിയില് തന്നെ എത്തിച്ചു.
അഗ്നിരക്ഷാസേനയും ഹൈവേ പൊലീസും സംഭവസ്ഥലത്തെത്തിയത് സംഭവം നടന്ന് അരമണിക്കൂര് കഴിഞ്ഞാണ്. ഒന്നര മണിക്കൂറിനു ശേഷമാണ് മരം മുറിച്ചുമാറ്റി ഗതാഗതം പുനരാരംഭിച്ചത്. ദേശീയപാതയില് നേര്യമംഗലം വനമേഖലയില് ഒട്ടേറെ മരങ്ങളാണ് അപകടാവസ്ഥയിലുള്ളത്. മരം വീഴുന്ന സമയത്ത് ഇതുവഴി കടന്നുപോയ 2 ബൈക്കുകളിലെ യാത്രക്കാര് തലനാരിഴയ്ക്കാണ് രക്ഷപ്പെട്ടത്. ബീവിയുടെ കബറടക്കം ഇന്ന് അടിമാലി ടൗണ് ജുമാ മസ്ജിദില്. മക്കള്: ഫൈസല്, ഷെമീന, ഹസീന. മരുമക്കള്: അല്ത്താന, റഹിം, നവാസ്.
https://www.facebook.com/Malayalivartha
