തടവുകാര്‍ക്കായുള്ള മഞ്ചേരിയിലെ കോവിഡ് ചികിത്സാ കേന്ദ്രത്തില്‍നിന്ന് കോവിഡ് പോസിറ്റീവായ ലഹരിമരുന്ന് കേസ് പ്രതി കടന്നുകളഞ്ഞു. വെസ്റ്റ് ബംഗാള്‍ മുര്‍ഷിദാബാദ് കാറ്റ്‌ലമാരി അനാറുല്‍ ബഹാര്‍ (23) ആണ് സുരക്ഷാ ഉദ്യോഗസ്ഥരുടെ കണ്ണുവെട്ടിച്ച് ചാടിപ്പോയത്.

ഇന്നലെ രാവിലെ 5-ന് ആണ് സംഭവം. കോഴിക്കോട് റോഡിലെ തടവുകാരെ പാര്‍പ്പിക്കുന്ന കേന്ദ്രത്തിലെ രണ്ടാം നിലയില്‍നിന്നാണ് പ്രതി രക്ഷപ്പെട്ടത്. ഇത് നാലാം തവണയാണ് പ്രതികള്‍ കടന്നുകളയുന്നത്.

കെട്ടിടത്തിന്റെ താഴത്തെ നിലയില്‍ സുരക്ഷാ ജീവനക്കാരും ആരോഗ്യ പ്രവര്‍ത്തകരുമാണ്. ഒന്നാം നിലയിലാണ് തടവുകാരെ പാര്‍പ്പിക്കുന്നത്. എന്നാല്‍ ഇവിടെനിന്നു രണ്ടാം നിലയില്‍ പ്രവേശിച്ചാണ് കടന്നുകളഞ്ഞത്. പ്രവേശന കവാടത്തില്‍ ഗ്രില്‍ ഉള്ളതിനാല്‍ പുറത്തേക്ക് ഇറങ്ങാന്‍ മാര്‍ഗമില്ല. കെട്ടിടത്തിന്റെ മുകളില്‍നിന്ന് തുണി പിരിച്ചു കൂട്ടിക്കെട്ടി താഴേക്ക് ഇറങ്ങിയെന്നാണ് കരുതുന്നത്. തുണി തൂങ്ങിക്കിടക്കുന്നതായി കണ്ടെത്തിയിരുന്നു.

ഇക്കഴിഞ്ഞ 22-നാണ് വളാഞ്ചേരിയില്‍നിന്നു ലഹരിമരുന്ന് പിടികൂടിയ കേസില്‍ ഇയാളെ അറസ്റ്റ് ചെയ്തത്. കോവിഡ് പോസിറ്റീവ് ആയതോടെ 26-ന് തടവുകാരുടെ ക്വാറന്റീന്‍ കേന്ദ്രത്തിലേക്കു മാറ്റി. കേന്ദ്രത്തില്‍ പോസിറ്റീവായി ചികിത്സയില്‍ ഇപ്പോള്‍ 30 തടവുകാരുണ്ട്. കാവലിനു 2 സുരക്ഷാ ഉദ്യോഗസ്ഥരും. പൊലീസ് അന്വേഷണം ഊര്‍ജിതമാക്കി.

റിമാന്‍ഡ് പ്രതികള്‍ മഞ്ചേരി കോവിഡ് ചികിത്സാ കേന്ദ്രത്തില്‍നിന്ന് ചാടിപ്പോകുന്നത് ഇത് നാലാം തവണയാണ്. മെഡിക്കല്‍ കോളജ് ആശുപത്രിയില്‍നിന്നു ജൂണില്‍ 2 പേരാണ് കടന്നുകളഞ്ഞത്. ഇവരെ പിടികൂടി തിരികെ ജയിലില്‍ പ്രവേശിപ്പിച്ചു. ഇവരിലൊരാള്‍ കോവിഡ് പോസിറ്റീവ് ആയി ചികിത്സാ കേന്ദ്രത്തില്‍ കഴിയുന്നതിനിടെ വീണ്ടും കടന്നുകളഞ്ഞു. ആഴ്ചകള്‍ക്കുശേഷം ഇയാളെ എറണാകുളത്തുനിന്നു പിടികൂടി.

കാളികാവ് പൊലീസ് പിടികൂടിയ പ്രതി കഴിഞ്ഞ ദിവസം ചാടിപ്പോയിരുന്നു. ഇയാളെ ആലിപറമ്പ് മലയില്‍ ആള്‍ ഒഴിഞ്ഞ വീട്ടില്‍നിന്ന് പിടികൂടി. ഇന്നലെ കേന്ദ്രത്തില്‍നിന്ന് ലഹരിമരുന്ന് കേസ് പ്രതി കടന്നുകളഞ്ഞു. പ്രതികള്‍ കോവിഡ് പോസിറ്റീവ് ആയതിനാല്‍ സുരക്ഷാ ഉദ്യോഗസ്ഥര്‍ക്ക് ഇടപെടാനുള്ള ബുദ്ധിമുട്ടും സുരക്ഷാ വീഴ്ചയുമാണ് പ്രതികള്‍ക്ക് കടന്നുകളയാന്‍ വഴിയൊരുക്കുന്നത്.