എനിക്കൊന്നും കാണാന്മേല... എപ്പോഴും കാരണവരെ പോലെ വിവിഐപികളെ മാത്രം കണ്ട് മുഖ്യമന്ത്രിയുടെ പ്രിന്സിപ്പല് സെക്രട്ടറിയായി പോക്കറ്റില് കയ്യും ഇട്ട് നടന്ന ശിവശങ്കറിന്റെ ഇന്നലത്തെ കാഴ്ച പരമ ദയനീയം; പാതിരാത്രിയില് നടുവില് കയ്യും പിടിച്ച് ഡെസ്കില് ചാഞ്ഞ് കിടക്കുന്ന ശിവശങ്കറിന്റെ രൂപം കണ്ട് സാക്ഷാല് സ്വപ്നപോലും ഞെട്ടിപ്പോയി
ഒരു കാരണവരെ പോലെയായിരുന്നു എം. ശിവശങ്കര് എന്ന ഐഎഎസ് ഉദ്യോഗസ്ഥന് മുഖ്യമന്ത്രിയുടെ പ്രിന്സിപ്പല് സെക്രട്ടറിയായി വിലസിയത്. ശിവശങ്കറെ പോലെ ഒരുദ്യോഗസ്ഥനെ കിട്ടാന് തപസ് ചെയ്യണമെന്ന് മറ്റുള്ളവരെ കൊണ്ട് പറയിപ്പിച്ച നിമിഷം. അങ്ങനെ ശിവശങ്കര് വിവിഐപികളുടെ മാത്രം കാണലായി. ചാരുകസേരയില് കാലിന്മേല് കാലിട്ട് പ്രതാപിയായിരുന്ന ശിവശങ്കറിന്റെ രൂപം എല്ലാവരിലും അത്ഭുതം ഉളവാക്കുന്നതായിരുന്നു.
ഇന്നലെ രാവിലെ ഇഡി കസ്റ്റഡിയിലെടുത്തപ്പോള് ഇടതു കൈ നടുവില് പിടിച്ചാണ് ആയുര്വേദ ആശുപത്രിയില് നിന്നുമിറങ്ങിയത്. നടുവേദനയുടെ ലക്ഷണമായി പണ്ടേ നമ്മള് ചെയ്യുന്നതാണ് ഈ നടുവില് പിടുത്തം. അവസാനം ഇഡി അറസ്റ്റ് ചെയ്തപ്പോഴും ശിവശങ്കര് മാധ്യമങ്ങള്ക്കു മുന്നിലും ആശുപത്രിയിലും നിര്ന്നിമേഷനായി നിന്നു. നിരാശയോടെയായിരുന്നു അദ്ദേഹത്തിന്റെ ഇടപെടല്. രാവിലെ മുതലുള്ള നടപടിക്രമങ്ങള് അദ്ദേഹത്തെ പാടേ തളര്ത്തിയിരുന്നു. വൈദ്യ പരിശോധനയ്ക്ക് എത്തിച്ച അദ്ദേഹം പലപ്പോഴും മേശയില് തലവച്ച് ചാഞ്ഞുകിടന്നു.
മേശയില് തലവച്ച് പത്തിമടക്കിയ പാമ്പിനെ പോലെ കിടക്കുന്ന ശിവശങ്കറിന്റെ കിടപ്പ് കണ്ട് സ്വപ്ന പോലും തകര്ന്നു പോയി. ഈ ചിത്രം പത്രങ്ങളില് വന്നതോടെ സ്വപ്നയുള്പ്പെടെ പലരും തലതല്ലിപ്പോയെന്നാണ് അണിയറ വര്ത്തമാനം.
കള്ളപ്പണം വെളുപ്പിക്കല് നിരോധന നിയമപ്രകാരം പിഎംഎല്എ 7 വര്ഷം വരെ തടവുശിക്ഷ ലഭിക്കാവുന്ന വകുപ്പാണു ചുമത്തിയിരിക്കുന്നത്. ഇത്തരമൊരു കേസില് മുതിര്ന്ന ഐഎഎസ് ഉദ്യോഗസ്ഥന് അറസ്റ്റിലാകുന്നത് സംസ്ഥാന സിവില് സര്വീസ് ചരിത്രത്തില് ആദ്യമാണ്. ശിവശങ്കറിനെ ഇന്ന് എറണാകുളം പ്രിന്സിപ്പല് സെഷന്സ് കോടതിയില് ഹാജരാക്കും.
സ്വര്ണക്കടത്തു കേസ് പ്രതി സ്വപ്ന സുരേഷിനു കള്ളപ്പണം ബാങ്ക് ലോക്കറില് സൂക്ഷിക്കാന് സൗകര്യം ഒരുക്കിയതു സംബന്ധിച്ച് അസി.ഡയറക്ടര് പി.രാധാകൃഷ്ണന്റെ നേതൃത്വത്തില് നടത്തിയ ചോദ്യംചെയ്യലില് കസ്റ്റംസ് ഉദ്യോഗസ്ഥരും സന്നിഹിതരായിരുന്നു. ഇഡി സ്പെഷല് ഡയറക്ടര് പി.സുശീല്കുമാര്, ജോയിന്റ് ഡയറക്ടര് ഗണേഷ്കുമാര് എന്നിവരും കൊച്ചിയിലെത്തിയിരുന്നു. സ്പെഷല് പ്രോസിക്യൂട്ടര് ടി.എ. ഉണ്ണികൃഷ്ണനും ഇഡി ഓഫിസിലെത്തി.
വിദേശത്തേക്കു ഡോളര് കടത്താന് സ്വപ്നയെ സഹായിച്ചെന്ന കേസില് ഇനി കസ്റ്റംസും ശിവശങ്കറെ ചോദ്യം ചെയ്യും. ഈ കേസില് ചോദ്യം ചെയ്യാന് 16നു കസ്റ്റംസ് കസ്റ്റഡിയിലെടുത്തപ്പോഴാണു ശിവശങ്കര് വൈദ്യസഹായം ആവശ്യപ്പെട്ടതും തിരുവനന്തപുരത്തെ സ്വകാര്യ ആശുപത്രിയിലും മെഡിക്കല് കോളജിലും ചികിത്സ തേടിയതും. മുന്കൂര് ജാമ്യം തേടി ഹൈക്കോടതിയെ സമീപിക്കുകയും ചെയ്തു.
ആയുര്വേദ ചികിത്സയിലായിരുന്ന എം.ശിവശങ്കറിനെ വഞ്ചിയൂരിലെ ത്രിവേണി ആശുപത്രിയില് നിന്ന് ഇ.ഡി കസ്റ്റഡിയിലെടുത്തത് ഹൈക്കോടതി മുന്കൂര് ജാമ്യം തള്ളി, പതിനഞ്ചു മിനിറ്റിനുള്ളിലാണ്. കസ്റ്റഡിയും അറസ്റ്റുമായി മുന്നോട്ടു പോകാന് അന്വേഷണ ഏജന്സിക്കു തടസ്സമില്ലെന്ന് കോടതി വ്യക്തമാക്കിയതിനു പിന്നാലെ എന്ഫോഴ്സ്മെന്റിന്റെ കാര് ആശുപത്രിയിലെത്തി. ഉദ്യോഗസ്ഥര് ശിവശങ്കറിന്റെ മുറിയിലെത്തി സമന്സ് കൈമാറി. മുറിയിലുണ്ടായിരുന്നത് ശിവശങ്കറിന്റെ രണ്ട് സഹോദരന്മാര്. കസ്റ്റഡിയിലെടുക്കുന്ന വിവരം ഉദ്യോഗസ്ഥര് അറിയിച്ചു. എതിര്പ്പു പറയാതെ മുറിവിട്ട് ഇ.ഡി ഉദ്യോഗസ്ഥര്ക്കൊപ്പം ശിവശങ്കര് കൊച്ചിയിലേക്ക് യാത്രയായി. ശിവശങ്കറിനെ കൊച്ചിയിലെത്തിച്ച് ഏഴു മണിക്കൂറോളം ചോദ്യം ചെയ്തതിനു ശേഷം രാത്രി 10.10 ഓടെയാണ് കള്ളപ്പണം വെളുപ്പിക്കല് കുറ്റം ചുമത്തി അറസ്റ്റ് ചെയ്തത്. ഇങ്ങനെ ദീര്ഘ ഓട്ടത്തിന് ഒടുവിലാണ് ശിവശങ്കര് മേശയില് ചാഞ്ഞ് കിടന്നത്. സര്വ പ്രതാപവും നഷ്ടപ്പെട്ട ശിവശങ്കറിന്റെ ഒന്നൊന്നര വീഴ്ച പ്രതിഫലിക്കുന്നതായിരുന്നു ഈ കിടപ്പ്.
https://www.facebook.com/Malayalivartha
