കാസര്കോട് ജില്ലയ്ക്ക് 2 സ്പെഷല് കോടതികള് കൂടി
മുഖ്യമന്ത്രി പിണറായി വിജയന് വിഡിയോ കോണ്ഫറന്സിലൂടെ കാസര്കോട് ജില്ലയ്ക്ക് അനുവദിച്ച വാഹനാപകട നഷ്ടപരിഹാര ട്രൈബ്യൂണലിന്റെയും (എംഎസിടി) ഹോസ്ദുര്ഗ് ഫാസ്റ്റ് ട്രാക്ക് സ്പെഷല് കോടതികളുടെയും ഉദ്ഘാടനം നിര്വഹിച്ചു.
കാസര്കോട് കോടതി സമുച്ചയത്തില് സംഘടിപ്പിച്ച ഉദ്ഘാടന ചടങ്ങില് ഹൈക്കോടതി ജഡ്ജി എ.എം.ഷഫീക്ക് അധ്യക്ഷത വഹിച്ചു. യോഗത്തില് മന്ത്രിമാരായ എ.കെ.ബാലന്, കെ.കെ.ശൈലജ, ഹൈക്കോടതി ജഡ്ജിമാരായ എ.എം.ബദര്, അമിത് റാവല് എന്നിവര് സംബന്ധിച്ചു. ജില്ലാ സെഷന്സ് ജഡ്ജ് എസ്.എച്ച്. പഞ്ചാപകേശന്റെ താല്പര്യമാണ് കോടതികള് യാഥാര്ഥ്യമാക്കിയത്. എംഎസിടി, പോക്സോ കോടതികള് വരുന്നതു കൊണ്ട് ഈ വിഭാഗത്തിലുള്ള കേസുകള് പെട്ടെന്ന് തീര്ക്കാനാവും. നിലവില് ഇവ അഡീഷനല് കോടതിയായിരുന്നു കൈകാര്യം ചെയ്തിരുന്നത്.
കാസര്കോട് ബാര് അസോസിയേഷന് ഹൈക്കോടതിയില് ഫയല് ചെയ്ത റിട്ട് ഹര്ജിയിലെ ഉത്തരവ് പ്രകാരമാണ് ജില്ലയില് എംഎസിടി സ്ഥാപിക്കുന്നത്. സ്വതന്ത്രമായി വാഹനാപകട നഷ്ടപരിഹാര ട്രൈബ്യൂണല് ഇല്ലാത്ത സംസ്ഥാനത്തെ ഏക ജില്ലയായിരുന്നു കാസര്കോട്. അഡീഷനല് ജില്ലാ ജഡ്ജി (ഒന്ന്) ആര്.എല്.ബൈജുവിനാണ് ജഡ്ജിയുടെ താല്ക്കാലിക ചുമതല. ജില്ലാ ജഡ്ജിമാരുടെ പ്രമോഷന് നടക്കുമ്പോള് സ്ഥിരം ജഡ്ജി നിയമനം ഉണ്ടാവും. എംഎസിടിയില് ആദ്യദിനം അഞ്ച് കേസുകളാണ് പരിഗണിച്ചത്.
ഹോസ്ദുര്ഗില് ആരംഭിക്കുന്ന സ്പെഷല് കോടതി, സംസ്ഥാനത്ത് അനുവദിച്ചിട്ടുള്ള 28 ഫാസ്റ്റ് ട്രാക്ക് സ്പെഷല് കോടതികളിലൊന്നാണ്. പോക്സോ കേസുകളുള്പ്പെടെയുള്ള സെഷന്സ് കേസുകള് ഈ കോടതി കൈകാര്യം ചെയ്യും. നിലവില് കാസര്കോട് പ്രവര്ത്തിക്കുന്ന സ്പെഷല് കോടതിക്ക് പുറമേയാണ് ഹോസ്ദുര്ഗില് സ്പെഷല് കോടതി ആരംഭിക്കുന്നത്. അഡീഷനല് ജില്ലാ ജഡ്ജി(രണ്ട്) രാജന് തട്ടിലിനാണ് ഹോസ്ദുര്ഗ് സ്പെഷല് കോടതിയുടെ ചുമതല നല്കിയിരിക്കുന്നത്.
പ്രവര്ത്തനം ആരംഭിച്ച ആദ്യ ദിനത്തില് നാല് കേസുകള് വിളിച്ചു. കേസുകള് വിചാരണയ്ക്കായി മാറ്റിവച്ചു. അഭിഭാഷകര് വിട്ടുനല്കിയ ബാര് അസോസിയേഷന് ഹാളിലാണ് ഫാസ്റ്റ് ട്രാക്ക് സ്പെഷല് കോടതി ആരംഭിക്കുന്നത്. നേരത്തെ ജില്ലാ അഡീഷനല് കോടതി ഒന്നിലായിരുന്നു പോക്സോ കേസുകള് വിചാരണ നടത്തിയിരുന്നത്.
https://www.facebook.com/Malayalivartha