രാത്രി വീട്ടിനുള്ളില്‍ കിടന്നുറങ്ങിയ ഭാര്യയെ പുലര്‍ച്ചെ കാണാതായി. നാലുമണിയോടെ ഭര്‍ത്താവ് ഉറക്കമുണര്‍ന്നപ്പോള്‍ ഭാര്യയെ കാണാനില്ല. ഭാര്യയെ അന്വേഷിച്ച്‌ വീടിനു ചുറ്റും ഭര്‍ത്താവ് നടന്നു. ഒടുവില്‍ നാലരയോടെ വീടിനടുത്തുള്ള പ്ലാവിന്റെ 22 അടിയോളം ഉയരത്തിലുള്ള കൊമ്ബില്‍ ഇരിക്കുന്ന ഭാര്യയെ കണ്ടെത്തി.

ചില്ലകള്‍ കുറവായ പ്ലാവില്‍ 50 വയസുകടന്ന സ്ത്രീ കയറിയത് എല്ലാവര്‍ക്കും അദ്ഭുതമായി. അരിമ്ബൂരിലാണ് സംഭവം. പ്ലാവില്‍ കയറി ഭാര്യയെ ഇറക്കാന്‍ ഇതിനിടെ ഭര്‍ത്താവ് ശ്രമം നടത്തി. പ്ലാവില്‍ വലിഞ്ഞുകയറി ഭാര്യയെ താഴെയിറക്കാന്‍ ഇദ്ദേഹം ശ്രമിച്ചെങ്കിലും താഴെ വീഴുമോയെന്ന ഭയം മൂലം ഇറങ്ങാന്‍ ഭാര്യ സമ്മതിച്ചില്ല.

തുടര്‍ന്ന് കയര്‍ ഉപയോഗിച്ച്‌ ഭാര്യയെ മരത്തില്‍ കെട്ടിവെച്ച്‌ അദ്ദേഹം കൂട്ടിരുന്നു. നേരം പുലര്‍ന്നശേഷം അതുവഴിയെത്തിയവരാണ് ഇക്കാര്യം അറിഞ്ഞത്. : നാട്ടുകാരാണ് എട്ടുമണിയോടെ വിവരം അഗ്നിശമനാ സേനയെ അറിയിച്ചത്. 15 മിനിറ്റിനകം സ്ഥലത്തെത്തിയ സേനാംഗങ്ങള്‍ വല ഉപയോഗിച്ച്‌ വീട്ടമ്മയെ താഴെയിറക്കി.

മാനസികാസ്വാസ്ഥ്യം കാണിക്കുന്ന വീട്ടമ്മയെ ആശുപത്രിയില്‍ പ്രവേശിപ്പിച്ചു. ഇവര്‍ എങ്ങനെ പ്ലാവിന്റെ മുകളില്‍ കയറിപ്പറ്റിയെന്ന അമ്ബരിപ്പിലാണ് നാട്ടുകാര്‍.