തല്ക്കാലം ഇത്രയും മതി; വി.ഡി. സതീശനും അന്വര് സാദത്തിനുമെതിരെ വിജിലന്സ് അന്വേഷണത്തിന് അനുമതിയില്ല; സ്പീക്കറുടെ നിലപാട് മാറ്റത്തിന് കാരണം ഗവര്ണറുടെ നിലപാട്; ഗവര്ണര് വിജിലന്സ് അന്വേഷണ അനുമതി നല്കിയില്ലെങ്കില് സര്ക്കാരിന് തിരിച്ചടി
സര്ക്കാരിന്റെ കാലവധി അവസാനിക്കാന് മാസങ്ങള് മാത്രം അവശേഷിക്കെ പ്രതിപക്ഷ എം.എല്.എമാര്ക്കെതിരെ വ്യാപകമായി വിജിലന്സ് കേസ് രജിസ്റ്റര് ചെയ്യുകയാണ് എല്.ഡി.എഫ് സര്ക്കാര്. എന്നാല് ഇതില് കോണ്ഗ്രസ് എം.എല്.എ.മാരായ വി.ഡി. സതീശനും അന്വര് സാദത്തിനുമെതിരേ അന്വേഷണത്തിന് സ്പീക്കര് പി. ശ്രീരാമകൃഷ്ണന് വിജിലന്സിന് അനുമതി നല്കിയില്ല. അന്വേഷണത്തിന് പര്യാപ്തമായ തെളിവുകള് പരാതിക്കാര്ക്ക് ഹാജരാക്കാനായിട്ടില്ലെന്ന് വിലയിരുത്തിയാണ് അനുമതി അപേക്ഷ മടക്കിയത്. കൂടുതല് തെളിവുകള് ഹാജരാക്കിയാല് വീണ്ടും പരിശോധിക്കാമെന്ന് സ്പീക്കര് ആഭ്യന്തരവകുപ്പിനെ അറിയിച്ചു. ബാര് കോഴ വിവാദത്തില് ബിജുരമേശന്റെ വെളിപ്പെടുത്തലിന്റെ അടിസ്ഥാനത്തില് പ്രതിപക്ഷ നേതാവ് രമേശ് ചെന്നിത്തലക്ക് എതിരെ വരെ വിജിലന്സ് അന്വേഷണത്തിന് അനുമതി നല്കിയ ശേഷമാണ് സ്പീക്കറുടെ ഈ മനംമാറ്റം.
വിജിലന്സ് അനുമതി നല്കുന്ന വിഷയം നിലവില് ഗവര്ണറുടെ പരിഗണനയിലാണ്. അതെസമയം വിജിലന്സ് ഡയറക്ടറെ വിളിച്ചു വരുത്തി കേസിന്റെ വിവരങ്ങള് ചോദിച്ചറിയാന് ഗവര്ണര് തീരുമാനിച്ചിരുന്നു. രാഷ്ട്രീയമായി വിജിലന്സിനെ ഉപയോഗിക്കുന്നതിനെതിരെ വ്യാപകമായി പ്രതിഷേധമാണ് ഉയര്ന്നത്. ഇതിനെ തുടര്ന്നായിരുന്നു ഗവര്ണറുടെ നടപടി. ഈ സാഹചര്യത്തില് ഗവര്ണര് വിജിലന്സ് അന്വേഷണത്തിന് അനുമതി നിഷേധിക്കുകയാണെങ്കില് സര്ക്കാരിന് വലിയ തിരിച്ചടിയാകും. ഇതുകൂടി കണക്കിലെടുത്താണ് സ്പീക്കര് കൂടുതല് എം.എല്.എമാര്ക്കെതിരെയുള്ള വിജിലന്സ് അന്വേഷണത്തിന് അനുമതി നിഷേധിച്ചതെന്നാണ് വിലയിരുത്തപ്പെടുന്നത്.
വി.ഡി. സതീശന് പറവൂര് മണ്ഡലത്തില് നടപ്പാക്കിയ പുനര്ജനി പദ്ധതിക്ക് ചട്ടങ്ങള് മറികടന്ന് വിദേശസഹായം കൈപ്പറ്റിയെന്നായിരുന്നു പരാതി. നേരത്തേ നല്കിയ പരാതി ആഭ്യന്തരവകുപ്പുതന്നെ തള്ളിയിരുന്നു. തെരഞ്ഞെടുപ്പ് അടുത്തതോടെ കേസും അന്വേഷണവും പ്രധാനവിഷയമായി ഉയര്ന്നുതുടങ്ങിയപ്പോഴാണ് നേരത്തേയുള്ള അതേ പരാതിക്കാരന് വിജലന്സിന് വീണ്ടും പരാതിനല്കിയത്. ഇതിലാണ് അന്വേഷണം നടത്താന് വിജിലന്സ് സ്പീക്കറുടെ അനുമതിതേടിയത്. ചട്ടംലംഘിച്ച് വിദേശപണം വാങ്ങിയെന്ന് തെളിയിക്കാനുള്ള രേഖകളൊന്നും പരാതിക്കാരന് ഹാജരാക്കാനായിട്ടില്ലെന്ന് സ്പീക്കര് വിലയിരുത്തി.
ആലുവയില് പാലം നിര്മാണം വകയിരുത്തിയ തുകയേക്കാളും വര്ധിപ്പിച്ചാണ് പൂര്ത്തിയാക്കിയതെന്നായിരുന്നു അന്വര് സാദത്തിനെതിരേയുള്ള പരാതി. ചെലവ് അധികം വന്നത് എം.എല്.എ.യുടെ ഇടപെടലിന്റെ ഫലമായിട്ടാണെന്നായിരുന്നു ആരോപണം. എന്നാല്, പാലം നിര്മാണത്തിന്റെ എസ്റ്റിമേറ്റ് പുതുക്കിയതാണെന്ന് സ്പീക്കര് വിലയിരുത്തി. മാത്രവുമല്ല, ചെലവുകൂടാന് എം.എല്.എ.യുടെ പങ്കാളിത്തം എന്താണെന്ന് വ്യക്തമാക്കാനും പരാതിക്കാരന് കഴിഞ്ഞിട്ടില്ല. പുനര്ജനി പദ്ധതിക്ക് വിദേശസഹായം വാങ്ങിയതിനെക്കുറിച്ച് സി.ബി.ഐ. അന്വേഷിക്കണമെന്ന് കാണിച്ച് ഹൈക്കോടതിയില് ഹര്ജി നല്കിയിരുന്നു. വിജിലന്സിന് പരാതി നല്കിയ അതേ പരാതിക്കാരനാണ് ഹൈക്കോടതിയെയും സമീപിച്ചത്. ഇത് കോടതി തള്ളി.
https://www.facebook.com/Malayalivartha
