സിപിഎം ഔദ്യോഗികമായാണ് മുഖ്യമന്ത്രിയുടെ അഡി. പ്രൈവറ്റ് സെക്രട്ടറി സിഎം രവീന്ദ്രന്‍ ചോദ്യം ചെയ്യുന്നതിന് ഹാജരാകുന്നതാണ് നല്ലതെന്ന് പറഞ്ഞത്.പക്ഷെ എന്ത് കൊണ്ട് സിഎം രവീന്ദ്രന്‍ ഇഡിയുടെ ചോദ്യം ചെയ്യലിന് ഹാജരാകുന്നില്ല എന്ന് മാത്രം പാര്‍ട്ടി പറയുന്നില്ല. മന്ത്രി കടകംപള്ളി സുരേന്ദ്രനാകട്ടെ രവി വളരെ നല്ലവനാണെന്നാണ് പറഞ്ഞത്. കടകംപള്ളി പറഞ്ഞതുപോലെ മൂന്നല്ല മുപ്പത് പ്രാവശ്യം ചോദ്യം ചെയ്യാന്‍ വിളിച്ചാലും ഹാജരാകണമെന്നില്ല എന്നത് യാഥാര്‍ത്ഥ്യമാകുകയാണ്. നിരവധി തവണ ചോദ്യം ചെയ്യാന്‍ വിളിച്ച രവീന്ദ്രന്റെ യഥാര്‍ത്ഥ അസുഖം എന്താണെന്ന് ഇന്നലത്തോടെ ഇഡിക്ക് ബോധ്യമായി.

കള്ളപ്പണ ഇടപാടുമായി ബന്ധപ്പെട്ട് ചോദ്യം ചെയ്യലിന് നാളെ കൊച്ചിയില്‍ ഹാജരാകാന്‍ എന്‍ഫോഴ്‌സ്‌മെന്റ് ഡയറക്ടറേറ്റ് നോട്ടീസ് നല്‍കിയതിന് തൊട്ടുപിന്നാലെ സി.എം.രവീന്ദ്രന്‍ ഹൈക്കോടതിയെ സമീപിച്ചു. നാലാം തവണയാണ് ഇ.ഡി നോട്ടീസ് നല്‍കുന്നത്.

ആരോഗ്യ കാരണങ്ങളാല്‍ തന്നെ നിശ്ചിത സമയത്തിലധികം ചോദ്യം ചെയ്യരുതെന്ന് ഇ.ഡിക്ക് നിര്‍ദ്ദേശം നല്‍കണമെന്നും ചോദ്യം ചെയ്യല്‍ വേളയില്‍ തന്റെ അഭിഭാഷകനെ അനുവദിക്കണമെന്നും ഹര്‍ജിയില്‍ ആവശ്യപ്പെട്ടിട്ടുണ്ട്. ഇ.ഡിയുടെ നോട്ടീസിലെ തുടര്‍ നടപടികള്‍ സ്‌റ്റേ ചെയ്യണമെന്നാണ് ഹര്‍ജിയിലെ ഇടക്കാല ആവശ്യം. ഹര്‍ജി ഇന്നു പരിഗണിച്ചേക്കും.

നേരത്തേ മൂന്നു തവണ നോട്ടീസ് നല്‍കിയപ്പോഴും ആരോഗ്യകാരണങ്ങള്‍ പറഞ്ഞ് രവീന്ദ്രന്‍ ഒഴിഞ്ഞുമാറുകയായിരുന്നു. നവംബര്‍ ആറിന് ആദ്യ നോട്ടീസിനു തലേന്ന് രവീന്ദ്രന്‍ കൊവിഡിന് ചികിത്സതേടി ആശുപത്രിയില്‍ അഡ്മിറ്റായി. രോഗമുക്തി നേടിയപ്പോള്‍ രണ്ടാം നോട്ടീസ് നല്‍കിയെങ്കിലും ശ്വാസതടസം പറഞ്ഞ് ഒഴിഞ്ഞു. തുടര്‍ന്ന്, കഴിഞ്ഞ 10 ന് ഹാജരാകന്‍ നോട്ടീസ് നല്‍കിയെങ്കിലും കോവിഡാനന്തര അസ്വസ്ഥതകള്‍ക്ക് മെഡിക്കല്‍ റിപ്പോര്‍ട്ട് സമര്‍പ്പിച്ച് ചോദ്യംചെയ്യലിനു ഹാജരാകന്‍ രവീന്ദ്രന്‍ രണ്ടാഴ്ചത്തെ സാവകാശം തേടുകയായിരുന്നു. എന്നാല്‍, രവീന്ദ്രന്റെ ആരോഗ്യസ്ഥിതിയില്‍ ഇ.ഡി വിശദപരിശോധനയ്ക്ക് ഒരുങ്ങുന്നുവെന്ന വാര്‍ത്തയ്ക്കു പിന്നാലെ 11 ന് തിരുവനന്തപുരം മെഡിക്കല്‍ കോളേജില്‍ നിന്ന് ഡിസ്ചാര്‍ജ് ആയി.

നവംബര്‍ നാല്, 20, ഡിസംബര്‍ മൂന്ന് തീയതികളില്‍ ഇ.ഡി രവീന്ദ്രന് നോട്ടീസ് നല്‍കി. കൊവിഡും അനുബന്ധ പ്രശ്‌നങ്ങളും ചൂണ്ടിക്കാട്ടി ഹാജരാകാനാവില്ലെന്ന് ഓരോ തവണയും മറുപടി നല്‍കി. ഒടുവിലാണ് ഡിസം. 12ന് വീണ്ടും നോട്ടീസ്.

ഡോക്ടര്‍മാര്‍ ഒരാഴ്ചത്തെ വിശ്രമം നിര്‍ദ്ദേശിച്ചിരുന്നതിനാല്‍, അതുകഴിഞ്ഞേ ചോദ്യം ചെയ്യലുണ്ടാകൂ എന്നു കരുതിയിരിക്കുമ്പോഴാണ് നാളെ ഹാജരാകാന്‍ ഇ.ഡി 12 ന് നോട്ടീസ് നല്‍കിയത്. ഇ.ഡി നോട്ടീസ് നല്‍കിയതിനാല്‍ മുന്‍കൂര്‍ ജാമ്യ ഹര്‍ജി ഫലപ്രദമല്ലെന്ന കണക്കു കൂട്ടലിലാണ് രവീന്ദ്രന്‍ ദീര്‍ഘനേരം ചോദ്യം ചെയ്യുന്നത് ഒഴിവാക്കാന്‍ ഹര്‍ജി നല്‍കിയത്. നേരത്തെ ശിവശങ്കറിന്റെ സമാനമായ മുന്‍കൂര്‍ ജാമ്യ ഹര്‍ജി ഹൈക്കോടതി തള്ളിയിരുന്നു.

രവീന്ദ്രന്റെ വാദങ്ങള്‍ ഇങ്ങനേയാണ്. ഇ.ഡി അന്വേഷിക്കുന്ന ഒരു കേസിലും പ്രതിയല്ല. ഏതു കേസിലാണ് ഹാജരാകാന്‍ നിര്‍ദ്ദേശിക്കുന്നതെന്ന് സമണ്‍സില്‍ പറയുന്നില്ല. കോവിഡ് കാരണം ആരോഗ്യവാനല്ല. അത് കണക്കിലെടുക്കാതെ ഹാജരാകാന്‍ ഇ.ഡി തുടര്‍ച്ചയായി നോട്ടീസ് നല്‍കുന്നു. ചോദ്യം ചെയ്യാന്‍ വിളിക്കുന്നത് ഏതു കേസിലാണെന്ന് അറിയാന്‍ അവകാശമുണ്ട്. കള്ളപ്പണം വെളുപ്പിക്കല്‍ തടയല്‍ നിയമ പ്രകാരമുള്ള നോട്ടീസിന്റെ അടിസ്ഥാനത്തില്‍ കസ്റ്റഡിയില്‍ ചോദ്യം ചെയ്യുന്നതു പോലെ ദീര്‍ഘനേരം ചോദ്യം ചെയ്യാന്‍ കഴിയില്ല. അസുഖമുള്ളതിനാല്‍ ദീര്‍ഘനേരം ചോദ്യം ചെയ്യല്‍ നേരിടാനാവില്ല. ചോദ്യം ചെയ്യലിനായി നിശ്ചിത സമയത്തില്‍ കൂടുതല്‍ തടഞ്ഞുവയ്ക്കരുത്. കൊള്ളാം നല്ല കഥ. എന്തായാലും ഇഡിയുടെ അടുത്ത നീക്കം അറിയാന്‍ കേരളത്തിന് താത്പര്യമുണ്ട്.