കുമ്മനം രാജശേഖരന്റെ വഴിയേ മിസോറാം ഗവര്‍ണറായി പോയ പി.എസ്. ശ്രീധരന്‍പിള്ള കുമ്മനം രാജശേഖരന്റെ വഴിയേ തന്നെ കേരള രാഷ്ട്രീയത്തില്‍ തിരിച്ചെത്തുമോയെന്ന ചോദ്യം ശക്തമാണ്. സംസ്ഥാന സര്‍ക്കാരിനോ സംസ്ഥാന ബിജെപി നേതൃത്വത്തിനോ പരിഹരിക്കാനാവാത്ത വലിയ പ്രശ്‌നമാണ് മിസോറാം ഗവര്‍ണര്‍ ആയിരിക്കുമ്പോഴും ശ്രീധരന്‍ പിള്ള ചെയ്യുന്നത്. സഭാ തര്‍ക്കത്തില്‍ പ്രധാനമന്ത്രി ഇടപെട്ടു കഴിഞ്ഞു. ഇതില്‍ തീരുമാനമുണ്ടായാല്‍ വലിയ വോട്ട് ബാങ്കായിരിക്കും മുന്നില്‍വരിക. അത് കേരളത്തിലെ പല നേതാക്കളും ഭയപ്പെടുന്നുണ്ട്.

സഭാതര്‍ക്കം പരിഹരിക്കാന്‍ കേരളത്തിലെ ഓര്‍ത്തഡോക്‌സ്, യാക്കോബായ സഭാ പ്രതിനിധികളുമായി പ്രധാനമന്ത്രി നരേന്ദ്രമോദി അടുത്തയാഴ്ച ചര്‍ച്ച നടത്തുമെന്ന് മിസോറം ഗവര്‍ണര്‍ കൂടിയായ പി.എസ്. ശ്രീധരന്‍പിള്ള പറഞ്ഞു. ഇരുകൂട്ടരും ഉന്നയിച്ച പരാതികള്‍ നേരത്തെതന്നെ പ്രധാനമന്ത്രിയെ ധരിപ്പിച്ചിരുന്നു. സീറോ മലബാര്‍ സഭയുള്‍പ്പെടെ മറ്റു സഭകളുടെ നേതൃത്വവുമായും ചര്‍ച്ച നടത്തും.

ന്യൂനപക്ഷങ്ങള്‍ക്കുള്ള കേന്ദ്ര ഫണ്ടിന്റെ വിനിയോഗത്തില്‍ വിവേചനമുണ്ടെന്നതടക്കമുള്ള പരാതി ക്രിസ്ത്യന്‍ സഭാനേതൃത്വം അറിയിച്ചിരുന്നു. ഈ കാര്യങ്ങളെല്ലാം നിവേദനമായി പ്രധാനമന്ത്രിക്ക് സമര്‍പ്പിച്ചിട്ടുണ്ട്. ക്രിസ്തുമതത്തിലുള്ളവരെ ഐസിസില്‍ ചേര്‍ക്കുന്നതായും പരാതിയുണ്ട്. പ്രത്യേക നിയമസഭാ സമ്മേളനത്തിന് ഗവര്‍ണര്‍ അനുമതി നിഷേധിച്ചത് വിവേചനാധികാരമുപയോഗിച്ചാണെന്നും ശ്രീധരന്‍പിള്ള പറഞ്ഞു.

അതേസമയം തിരിച്ചുവരുമോയെന്ന ചോദ്യത്തിനും അദ്ദേഹത്തിന് മറുപടിയുണ്ട്. കുട്ടിക്കളി പോലെ വലിച്ചെറിയേണ്ടതല്ല ഗവര്‍ണര്‍ പദവിയെന്നും, കേരള രാഷ്ട്രീയത്തിലേക്ക് ഉടന്‍ മടങ്ങിവരാനില്ലെന്ന് ശ്രീധരന്‍ പിള്ള പറഞ്ഞു. ഗവര്‍ണറുടെ പോസ്റ്റ് ഏറ്റവും ഉയര്‍ന്ന ഭരണഘടനാ പദവികളിലൊന്നാണെന്നും, വലിച്ചെറിഞ്ഞ് കേരള രാഷ്ട്രീയത്തിലേക്ക് വരില്ലെന്നും അദ്ദേഹം വ്യക്തമാക്കി.

ഗവര്‍ണറുടെ പോസ്റ്റ് ഏറ്റവും ഉയര്‍ന്ന ഭരണഘടനാ പദവികളിലൊന്നാണ്. അതിനെ കുട്ടിക്കളി പോലെ വലിച്ചെറിയാന്‍ തയ്യാറാല്ല. എന്റെ ഭാഗത്തുനിന്ന് അതിനുള്ള നിഷേധാത്മക സമീപനം ഉണ്ടാകില്ല. തീരുമാനം എടുക്കേണ്ടത് എന്നെ നിയമിച്ചവരാണ് എന്നും ശ്രീധരന്‍ പിള്ള പറഞ്ഞു.

കേരള രാഷ്ട്രീയത്തിലേക്ക് വൈകാതെ തിരിച്ചുവരുമെന്ന രീതിയിലുള്ള വാര്‍ത്തകള്‍ വന്നതിനാലാണ് കുട്ടിക്കളി എന്ന വാക്കുപയോഗിച്ചതെന്നും, അല്ലാതെ ആരെയും ഉദ്ദേശിച്ചില്ലെന്നും അദ്ദേഹം വ്യക്തമാക്കി. കുട്ടിക്കളി എന്ന പ്രയോഗം കുമ്മനം രാജശേഖരനെ ഉദ്ദേശിച്ചാണോ എന്ന ചോദ്യത്തിനായിരുന്നു അദ്ദേഹത്തിന്റെ പ്രതികരണം.

അതേസമയം ശ്രീധരന്‍പിള്ള എഴുത്തിലും സജീവമായി. ശ്രീധരന്‍ പിള്ളയുടെ ഇംഗ്ലീഷ് കവിതകളുടെ ആദ്യ സമാഹാരം ഉപരാഷ്ട്രപതി എം. വെങ്കയ്യ നായിഡു അടുത്തിടെ പ്രകാശനം ചെയ്തു. 'ഓ മിസോറം' എന്ന പേരിലുള്ള കവിതാ സമാഹാരം പി.എസ്.ശ്രീധരന്‍ പിള്ളയുടെ നൂറ്റി ഇരുപത്തഞ്ചാമത് പുസ്തകമാണ്. ലോക്ഡൗണ്‍ കാലത്തെ രാജ്ഭവന്‍ ജീവിതം തന്നിലെ എഴുത്തുകാരനെ കൂടുതല്‍ സജീവമാക്കിയെന്ന് ശ്രീധരന്‍ പിള്ള പറഞ്ഞു.

കിഴക്കിന്റെ ജ്ഞാനവഴികളില്‍ വിരിഞ്ഞ കാലാതീതമായ കവിതകള്‍ എന്ന് ആമുഖത്തില്‍ ഇറ്റാലിയന്‍ കവിയും നിരൂപകനുമായ ആല്‍ഫ്രെഡോ പസോലിനോ കുറിയ്ക്കുന്നു. പ്രകൃതിയുടെ താരാട്ടെന്ന് എം.ടി വാസുദേവന്‍ നായര്‍. ഒ, മിസോറം പിഎസ് ശ്രീധരന്‍ പിള്ളയുടെ 36 കവിതകളുടെ സമാഹാരമാണ്. ആറ്റിക്കുറിക്കിയ വരികള്‍. ലോക്ഡൗണും കോവിഡ് ഭീതിക്കിടെ ലോകത്തോട് നമസ്‌തേ പറഞ്ഞ ഇന്ത്യയുടെ പാരമ്പര്യവും പ്രകൃതിയും ഗൃഹാതുരതയുമെല്ലാം കടന്നുവരുന്നു. അങ്ങനെ ആകെ മാറിയ ജീവിതവുമായി ശ്രീധരന്‍പിള്ള കേരളത്തിലേക്ക് തിരിച്ചുവരുമോയെന്നാണ് ഏവരും ചോദിക്കുന്ന ചോദ്യം.