സഫീര്‍ ഒറ്റയ്ക്കാണ് താമസമെങ്കിലും ഇടയ്ക്കിടെ ഭാര്യയുടെ കൂടെ താമസിക്കുന്നകുട്ടികളെ വിളിച്ചു കൊണ്ടു വരിക പതിവായിരുന്നു, അതു പോലെ കഴിഞ്ഞ ദിവസം കുട്ടികളെ കൂട്ടികൊണ്ടുവന്നപ്പോള്‍ അമ്മ അറിഞ്ഞില്ല ഇനി ഒരിക്കലും വരാന്‍ കഴിയാത്തിടത്തേക്കാണ് അച്ഛന്‍ കുട്ടികളെ കൊണ്ടുപോകുന്നതെന്ന്... ആ അമ്മയുടെ നിലവിളി എല്ലാരേയും കണ്ണീരിലാഴ്ത്തി.

നാവായിക്കുളത്ത് മൂത്തമകനെ കഴുത്തറുത്ത് കൊലപ്പെടുത്തിയ ശേഷം ഇളയ മകനുമായി അച്ഛന്‍ കുളത്തില്‍ ചാടി ആത്മഹത്യ ചെയ്തു. പിതാവിന്റെയും ഇളയ മകന്റെയും മൃതദേഹം നാവായിക്കുളം ശ്രീ ശങ്കരനാരായണ സ്വാമി ക്ഷേത്ര ആറാട്ടു കുളത്തില്‍ നിന്നാണ് കണ്ടെത്തിയത് നാവായിക്കുളം നൈനാംകോണത്താണ് സംഭവം നടന്നത്. നാവായിക്കുളം നൈനാംകോണം വടക്കേവയല്‍ മംഗ്ലാവില്‍വാതുക്കല്‍ വയലില്‍ വീട്ടില്‍ ഓട്ടോറിക്ഷ ഡ്രൈവറായ സഫീര്‍ (34), സഫീറിന്റെ മൂത്തമകന്‍ ആറാംക്ലാസ് വിദ്യാര്‍ത്ഥിയായ അല്‍ത്താഫ് (11), നാലാം ക്ലാസ് വിദ്യാര്‍ത്ഥിയായ അന്‍ഷാദ് (9) എന്നിവരാണ് മരിച്ചത്.

അല്‍ത്താഫും അന്‍ഷാദും നാവായിക്കുളം ഗവ. ഹയര്‍സെക്കന്‍ഡറി സ്‌കൂള്‍ വിദ്യാര്‍ത്ഥികളാണ്. അല്‍ത്താഫിനെ കിടപ്പുമുറിയിലെ കട്ടിലില്‍ മയക്കികിടത്തി കൈകാലുകള്‍ കയറുകൊണ്ട് കെട്ടിയിട്ട ശേഷം കത്തികൊണ്ട് കഴുത്തറുത്ത് കൊലപ്പെടുത്തിയ നിലയിലായിരുന്നു കണ്ടെത്തിയത്. സഫീറിന്റെ മാനസിക പ്രശ്‌നമാണ് കൊലയിലേക്കും ആത്മഹത്യയിലേക്കും നയിച്ചതെന്നാണ് പൊലീസിന്റെ പ്രാഥമിക നിഗമനം.

നടപടികള്‍ പൂര്‍ത്തിയാക്കിയ ശേഷം മൃതദേഹങ്ങള്‍ തിരുവനന്തപുരം മെഡിക്കല്‍ കോളേജ് ആശുപത്രി മോര്‍ച്ചറിയിലേക്ക് മാറ്റി.

നാവായിക്കുളം വൈരമലയില്‍ ഇവര്‍ പുതുതായി വീടും പണിതിരുന്നു.ഈ വീട്ടില്‍ സഫീറിന്റെ ഭാര്യാ സഹോദരനുമുണ്ടായിരുന്നു. എന്നാല്‍ പുതിയ വീട്ടില്‍ താമസിക്കാന്‍ സഫീര്‍ കൂട്ടാക്കിയില്ല. ഭയം കാരണം നിലവിലെ വീട്ടില്‍ കഴിയാന്‍ ഭാര്യയും തയ്യാറായില്ല. തുടര്‍ന്ന് സഫീര്‍ ഒറ്റക്ക് പഴയവീട്ടില്‍ താമസമാക്കി.

ഇടക്കിടെ രണ്ട് മക്കളെയും സഫീര്‍ വീട്ടില്‍ കൊണ്ടുവരാറുണ്ടായിരുന്നു. വെള്ളിയാഴ്ച വൈകിട്ട് ആറുമണിയോടെ സഫീര്‍ വൈരമലയിലുള്ള ഭാര്യവീട്ടിലെത്തി കുട്ടികളെ കൂട്ടി തന്റെ ഓട്ടോറിക്ഷയില്‍ പാപനാശത്തും തുടര്‍ന്ന് വര്‍ക്കല പാലച്ചിറയിലുള്ള ബന്ധുവീട്ടിലും എത്തിയിരുന്നു. ഈ വീട്ടില്‍ ഇന്നലെ മരണാനന്തര ചടങ്ങ് നടക്കാനുള്ളതിനാല്‍ രാവിലെ എത്താമെന്ന് പറഞ്ഞ് രാത്രി എട്ടരയോടെ സഫീര്‍ കുട്ടികളുമായി ഇറങ്ങി രാത്രി 9മണിയോടെ തന്റെ വീട്ടിലെത്തി.

രാവിലെ പാലച്ചിറയിലെ ബന്ധുവീട്ടില്‍ സഫീറും കുട്ടികളും എത്താത്തതിനെ തുടര്‍ന്ന് ഭാര്യാസഹോദരന്‍ വീട്ടിലെത്തിയപ്പോള്‍ വീട് പുറത്ത് നിന്ന് പൂട്ടിയ നിലയിലായിരുന്നു. തുടര്‍ന്ന് നടത്തിയ തെരച്ചിലില്‍ നാവായിക്കുളം വലിയകുളത്തിന് സമീപം ഓട്ടോറിക്ഷ ഉപേക്ഷിക്കപ്പെട്ട നിലയില്‍ കണ്ടെത്തി. ഓട്ടോയില്‍ നിന്നും മൂത്തമകന്‍ വീട്ടിലുണ്ട് എന്ന ഒറ്റവരി കത്തും, കുളത്തിലെ പടിക്കെട്ടില്‍ ഉപേക്ഷിക്കപ്പെട്ട നിലയില്‍ ചെുരുപ്പുകളും വാച്ചും കണ്ടെത്തി.

തുടര്‍ന്ന് കല്ലമ്പലം പൊലീസും ഫയര്‍ഫോഴ്‌സും നടത്തിയ തെരച്ചിലിനിടയില്‍ ഇന്നലെ രാവിലെ 11 മണിയോടെ സഫീറിന്റെ മൃതദേഹവും ഉച്ചക്ക് ഒരുമണിയോടെ അന്‍ഷാദിന്റെ മൃതദേഹവും കണ്ടെത്തുകയായിരുന്നു.