കുട്ടികളും സ്ത്രീകളും ആക്രമിക്കപ്പെടാത്ത ഒരു സമൂഹമാണ് ലക്ഷ്യം: മന്ത്രി കെ.കെ.ശൈലജ
കുട്ടികളും സ്ത്രീകളും ആക്രമിക്കപ്പെടാത്ത ഒരു സമൂഹമാണ് സര്ക്കാരിന്റെ ലക്ഷ്യമെന്നും അതിനായി 2017 മുതല് പ്രത്യേക വനിതാ ശിശുക്ഷേമ വകുപ്പുതന്നെ രൂപീകരിച്ച് വിവിധങ്ങളായ പദ്ധതികളാണ് ആസൂത്രണം ചെയ്ത് നടപ്പിലാക്കിവരുന്നതെന്ന് ആരോഗ്യവും സാമൂഹ്യനീതിയും വനിതാ ശിശു വികസനവും വകുപ്പ് മന്ത്രി കെ.കെ. ശൈലജ പറഞ്ഞു. ഇതിന്റെ ഭാഗമായി കേരള വനിതാ കമ്മിഷനും ധീരമായ പ്രവര്ത്തനങ്ങളാണ് നടത്തുന്നതെന്നും മന്ത്രി പറഞ്ഞു.
യുവാക്കളില് സ്ത്രീ പുരുഷ തുല്യത എന്ന മൂല്യബോധം വളര്ത്തുന്നതിനായി കേരള വനിതാ കമ്മിഷനും ഹയര് സെക്കന്ഡറി വിദ്യാഭ്യാസ വകുപ്പിന്റെ നാഷണല് സര്വീസ് സ്കീം വിഭാഗവും സംയുക്തമായി സംഘടിപ്പിച്ച ലിംഗസമത്വ ബോധവത്കരണ പരിപാടി കലാലയജ്യോതി-സമദര്ശന് വെബിനാര് ഉദ്ഘാടനം ചെയ്യുകയുകയായിരുന്നു മന്ത്രി. സ്ത്രീകളുടെയും കുട്ടികളുടെയും ക്ഷേമത്തിനായുള്ള നിരവധി പരിപാടികളില് ചിലതാണ് സധൈര്യം മുന്നോട്ട്, നിര്ഭയ ഹോമുകള്, ബാലനീതി വെബ്പോര്ട്ടല് തുടങ്ങിയവ.
പല രക്ഷാകര്ത്താക്കളും കുട്ടികളെ അകാരണമായി മര്ദിക്കുന്നു. ചില പീഡന കേസുകളില് രക്ഷാകര്ത്താക്കള് പ്രതികളാകുമ്പോള് ചിലയിടത്ത് പ്രതികള്ക്ക് കൂട്ടുനില്ക്കുന്നതായും കാണുന്നത് ഞെട്ടിപ്പിക്കുന്നതാണ്. ഈ സാഹചര്യത്തില് റെസ്പോണ്സിബിള് പാരന്റിംഗിലും ബോധവത്കരണം നടത്തേണ്ടതുണ്ട്. നിയമസംവിധാനങ്ങളെക്കുറിച്ച് അവബോധമില്ലാതെ വിഷയങ്ങളെ മത, വര്ഗീയ വത്കരിക്കുന്നത് അങ്ങേയറ്റം അപലപനീയമാണെന്ന് വെബിനാറില് അധ്യക്ഷത വഹിച്ച വനിതാ കമ്മിഷന് ചെയര്പേഴ്സണ് എം.സി ജോസഫൈന് പറഞ്ഞു. ഈ അവബോധമില്ലായ്മമൂലം വാളയാര് സംഭവത്തില് വനിതാ കമ്മിഷന് അധിക്ഷേപത്തിന് ഇരയായി. വാളയാര് കേസില് വിചാരണക്കോടതി വിധി റദ്ദാക്കിയ ഹൈക്കോടതി വിധി കമ്മിഷന് സ്വാഗതം ചെയ്യുന്നതായും എം.സി.ജോസഫൈന് പറഞ്ഞു.
മുഖ്യ പ്രഭാഷണവും ലോഗോ പ്രകാശനവും വിദ്യാഭ്യാസ ഡയറക്ടര് ജനറല് കെ. ജീവന് ബാബു നിര്വഹിച്ചു. വനിതാ കമ്മിഷന് അംഗം അഡ്വ.എം.എസ്.താര സ്വാഗതവും ഹയര് സെക്കന്ഡറി എന്എസ്എസ് മേഖലാ കണ്വീനര് പി.ബി. ബിനു നന്ദിയും പറഞ്ഞു.
ഹയര് സെക്കന്ഡറി ജോയിന്റ് ഡയറക്ടര് പി.പി.പ്രകാശന് സമദര്ശന് സന്ദേശം നല്കി. എന്എസ്എസ് റീജണല് ഡയറക്ടര് ജി.പി. സജിത് ബാബു മുഖ്യാതിഥിയായിരുന്നു. ഹയര്സെക്കന്ഡറി എന്എസ്എസ് സ്റ്റേറ്റ് കോ ഓര്ഡിനേറ്റര് ജേക്കബ് ജോണ് എന്.എസ്.എസ് സന്ദേശം നല്കി. തിരുവനന്തപുരം ജില്ലാ കോ ഓര്ഡിനേറ്റര് ജോയി മോന്, കൊല്ലം ജില്ലാ കോ ഓര്ഡിനേറ്റര് ഇന്ചാര്ജ് കെ.ജി.പ്രകാശ്, ആലപ്പുഴ ജില്ലാ കോ ഓര്ഡിനേറ്റര് കെ.വി.വസന്തരാജന്, പത്തനംതിട്ട ജില്ലാ കോ ഓര്ഡിനേറ്റര് വി.എസ്. ഹരികുമാര് എന്നിവര് ആശംസകള് അര്പ്പിച്ചു. തിരുവനന്തപുരം ജില്ലയില് നിന്നും തെരഞ്ഞെടുക്കപ്പെട്ട ഇരുനുറു എന്എസ്എസ് വളന്റിയര്മാര് പങ്കെടുത്തു.
https://www.facebook.com/Malayalivartha
