കെ.വി വിജയദാസ് എം.എല്‍.എയുടെ നില അതീവ ഗുരുതരം; മരുന്നുകളോട് പ്രതികരിക്കുന്നില്ല; ഡിസംബര്‍ 11ന് കോവിഡ് പോസിറ്റീവായി ആശുപത്രിയില്‍ പ്രവേശിപ്പിച്ചു, പിന്നീട് കോവിഡ് മുക്തനായെങ്കിലും തലയ്ക്കുളളില്‍ രക്തസ്രാവം ആരോഗ്യനില ഗുരുതരമാക്കി
കോങ്ങാട് എം.എല്‍.എ കെ.വി വിജയദാസിന്റെ നില അതീവ ഗുരുതരമായി തുടരുന്നു. തൃശൂര്‍ ഗവണ്‍മെന്റ് മെഡിക്കല്‍ കോളേജില്‍ ചികിത്സയില്‍ കഴിയുന്ന അദ്ദേഹം മരുന്നുകളോട് പ്രതികരിക്കുന്നില്ലെന്നാണ് മെഡിക്കല്‍ ബുളളറ്റിന്‍. ഡിസംബര്‍ 11ന് കോവിഡ് പോസിറ്റീവായി ആശുപത്രിയില്‍ പ്രവേശിപ്പിച്ച വിജയദാസ് പിന്നീട് രോഗമുക്തി നേടി. എന്നാല്‍ കൊവിഡാനന്തര ആരോഗ്യപ്രശ്നങ്ങളാല്‍ ആശുപത്രിയില്‍ തുടരുകയാണ്.
തലയ്ക്കുളളില്‍ രക്തസ്രാവത്തെ തുടര്‍ന്നാണ് വിജയദാസിനെ മെഡിക്കല്‍ കോളേജില്‍ പ്രവേശിപ്പിച്ചത്. രക്തസമ്മര്‍ദ്ദത്തിന്റെയും, ധാതുലവണങ്ങളുടെയും ഓക്സിജന്റെയും ഏറ്റക്കുറച്ചില്‍ കാരണം ആരോഗ്യനില അതീവ സങ്കീര്‍ണമാണ്. മെഡിക്കല്‍ ബോര്‍ഡും തിരുവനന്തപുരത്തെ ക്രിട്ടിക്കല്‍ കെയര്‍ സ്പെഷ്യലിസ്റ്റും എം.എല്‍.എയുടെ നില സൂക്ഷ്മമായി നിരീക്ഷിച്ചുവരികയാണ്.
സിപിഎം ജില്ലാ കമ്മിറ്റി അംഗം കൂടിയായ കെ.വി.വിജയദാസ് പാലക്കാട് ജില്ലയിലെ കോങ്ങാട് നിയോജകമണ്ഡലത്തിന്റെ പ്രതിനിധീകരിച്ചാണ് നിയമസഭയില്‍ എത്തിയത്. നേരത്തെ പാലക്കാട് ജില്ലാ പഞ്ചായത്ത് അധ്യക്ഷനായി പ്രവര്‍ത്തിച്ച വിജയദാസ് 2011-ലും കോങ്ങാട് നിന്ന് നിയമസഭയിലേക്ക് വിജയിച്ചിരുന്നു. രണ്ടു തവണ തുടര്‍ച്ചയായി കോങ്ങാട് മണ്ഡലത്തിനെ അദ്ദേഹം നിയമസഭയില്‍ പ്രതിനിധികരിക്കുകയാണ്.
https://www.facebook.com/Malayalivartha
