ഇന്നലത്തെ ദിവസം സ്പീക്കര്‍ ശ്രീരാമകൃഷ്ണനുള്ളതായിരുന്നു. ആ ഒരൊറ്റ വ്യക്തിയിലൂന്നിയായിരുന്നു ഇന്നലത്തെ നിയമസഭയിലെ ചര്‍ച്ച മുഴുവനും. പ്രതിപക്ഷം ശ്രീരാമകൃഷ്ണനെതിരെ ആഞ്ഞടിച്ചപ്പോഴും ശ്രീരാമകൃഷ്ണന്‍ തകര്‍ന്നില്ല. ഗോഡ്ഫാദറിലെ ഇന്നസെന്റ് അച്ഛനെ അടിക്കാതെ സഹോദരനായ ഭിമന്‍ രഘുവിനെ അടിക്കുന്ന കഥപറഞ്ഞാണ് കത്തിക്കയറിയത്. എന്തിന് തോന്ന്യാസം പറയരുതെന്ന് പറഞ്ഞപ്പോള്‍ പ്രതിപക്ഷം സ്പീക്കറിത് പറയരുതെന്ന് പറഞ്ഞു. അതോടെ അത് പിന്‍വലിച്ചു. അങ്ങനെ കസ്റ്റംസിനെ വെല്ലുവിളിച്ച ശ്രീരാമകൃഷ്ണന് പുറത്ത് നിന്നും ശുഭകരമല്ലാത്ത വാര്‍ത്തയാണ് കേട്ടത്.

വിദേശത്തേക്ക് ഡോളര്‍ കടത്തിയ കേസില്‍ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറെ അറസ്റ്റു ചെയ്തും, സ്പീക്കര്‍ പി. ശ്രീരാമകൃഷ്ണനുമായി അടുപ്പമുള്ള പൊന്നാനി സ്വദേശികളായ രണ്ടു ബിസിനസുകാരെ ചോദ്യം ചെയ്തുമുള്ള കസ്റ്റംസ് നീക്കം രാഷ്ട്രീയ വിവാദത്തിന് തുടക്കമായി.

ഡോളര്‍ കേസില്‍ നാലാം പ്രതിയാണ് ശിവശങ്കര്‍. മസ്‌കറ്റില്‍ വ്യവസായിയായ ലഫീര്‍ മുഹമ്മദ്, നാസ് അബ്ദുള്ള എന്നിവരെയാണ് വിളിച്ചുവരുത്തി ചോദ്യംചെയ്തത്. നാസ് രണ്ടു വര്‍ഷം മുമ്പ് ഗള്‍ഫില്‍ നിന്നെത്തി നാട്ടില്‍ ബിസിനസ് നടത്തുകയാണ്. ഇന്നലെ രാവിലെ 10ന് നാസ് അബ്ദുള്ളയെയാണ് ആദ്യം ചോദ്യംചെയ്തത്. ഉച്ചയ്ക്ക് 12 ഓടെ ലഫീര്‍ മുഹമ്മദിനെയും.

സ്വര്‍ണക്കടത്തുമായി ബന്ധപ്പെട്ട ഇ.ഡി കേസില്‍ അറസ്റ്റിലായി കാക്കനാട് ജില്ലാ ജയിലില്‍ കഴിയുന്ന ശിവശങ്കറിനെ ഡോളര്‍ കടത്തു കേസില്‍ അറസ്റ്റു ചെയ്യാന്‍ സാമ്പത്തിക കുറ്റകൃത്യങ്ങള്‍ പരിഗണിക്കുന്ന എറണാകുളത്തെ കോടതി ഇന്നലെ രാവിലെ കസ്റ്റംസിന് അനുമതി നല്‍കിയിരുന്നു. വൈകിട്ട് അഞ്ചോടെ ജയിലിലെത്തി കസ്റ്റംസ് പ്രിവന്റീവ് വിഭാഗം അറസ്റ്റ് രേഖപ്പെടുത്തി. കോടതി നിര്‍ദേശപ്രകാരം ജയില്‍ സൂപ്രണ്ടിന്റെ സാന്നിദ്ധ്യത്തിലായിരുന്നു അറസ്റ്റ്. ഇക്കാര്യം കോടതിയെ അറിയിച്ചശേഷം കസ്റ്റഡിയില്‍ വാങ്ങാന്‍ അപേക്ഷ നല്‍കിയേക്കും. സ്വപ്ന സുരേഷിന്റെയും സരിത്തിന്റെയും മൊഴികളുടെ അടിസ്ഥാനത്തിലാണ് ശിവശങ്കറിനെ പ്രതി ചേര്‍ത്തത്. ഡോളര്‍ കടത്താന്‍ ശിവശങ്കര്‍ സഹായിച്ചെന്ന് കസ്റ്റംസ് കോടതിയെ അറിയിച്ചിരുന്നു.

നാസ് സ്വന്തം പേരിലെടുത്ത മൊബൈല്‍ ഫോണ്‍ സ്പീക്കര്‍ പി. ശ്രീരാമകൃഷ്ണന് ഉപയോഗിക്കാന്‍ നല്‍കിയെന്നാണ് കസ്റ്റംസിന്റെ കണ്ടെത്തല്‍. സ്വര്‍ണക്കടത്ത് പിടികൂടിയ ശേഷം ഈ ഫോണ്‍ സ്വിച്ച് ഓഫാണ്. ഫോണ്‍ സ്പീക്കര്‍ ഉപയോഗിച്ചതു സംബന്ധിച്ച വിവരങ്ങളാണ് നാസില്‍ നിന്ന് ചോദിച്ചറിഞ്ഞത്.

മസ്‌കറ്റിലെ മിഡില്‍ ഈസ്റ്റ് കോളേജിന്റെ ഉടമയായ ലഫീര്‍ മുഹമ്മദും നാസും ചേര്‍ന്നാണ് തിരുവനന്തപുരത്തെ യു.എ.ഇ കോണ്‍സല്‍ ഓഫീസിലെ ഫിനാന്‍സ് വിഭാഗം തലവനായിരുന്ന ഈജിപ്ഷ്യന്‍ പൗരന്‍ ഖാലിദ് അലി ഷൗക്രി കടത്തിക്കൊണ്ടുപോയ ഡോളര്‍ സ്വീകരിച്ചതെന്നാണ് വിവരം. ഇതില്‍ വ്യക്തത വരുത്താനും ഇദ്ദേഹത്തിന്റെ വിദ്യാഭ്യാസ സ്ഥാപനങ്ങളില്‍ കേരളത്തില്‍ നിന്ന് രാഷ്ട്രീയ നേതാക്കളുള്‍പ്പെടെ നിക്ഷേപം നടത്തിയിട്ടുണ്ടെന്ന വിവരം സ്ഥിരീകരിക്കാനുമാണ് ചോദ്യംചെയ്യല്‍. മന്ത്രി കെ.ടി.ജലീലുമായും ലഫീറിന് അടുപ്പമുണ്ടെന്ന് കസ്റ്റംസ് പറയുന്നു.

ഒരു തെറ്റും താന്‍ ചെയ്തിട്ടില്ല, ഒരിഞ്ചും തല കുനിക്കില്ലെന്ന് മുട്ടുകാലില്‍ ഉറച്ച് നട്ടെല്ല് നിവര്‍ത്തി നിന്ന് പറയാനാവുമെന്നാണ് സ്പീക്കര്‍ പി. ശ്രീരാമകൃഷ്ണന്‍ നിയമസഭയില്‍ പറഞ്ഞത്. ഒരു വഴിവിട്ട നീക്കവും ഒരു ശുപാര്‍ശയും എന്റെ ഭാഗത്ത് നിന്നുണ്ടായിട്ടില്ല. ഈ കൈകള്‍ പരിശുദ്ധമാണ് എന്ന് പറഞ്ഞു കഴിഞ്ഞപ്പോഴാണ് ടിവിയില്‍ സുഹൃത്തുക്കളെ ചോദ്യം ചെയ്യുന്നെന്ന ബ്രേക്കിംഗ് ന്യൂസ് വന്നത്.