വര്ധിപ്പിച്ച ഇന്ധന വിലയുടെ അധിക നികുതിയെങ്കിലും ഉപേക്ഷിക്കാന് ഇടതുസര്ക്കാര് തയാറാകണം; കോവിഡ് കാലത്ത് ജനങ്ങളെ കുത്തിപ്പിഴിഞ്ഞ് ഇന്ധന വില വര്ധിപ്പിക്കുന്നത് തികച്ചും അന്യായമാണെന്ന് മുന് മുഖ്യമന്ത്രി ഉമ്മന് ചാണ്ടി
കോവിഡ് കാലത്ത് മഹാദുരിതത്തിലായ ജനങ്ങളെ കുത്തിപ്പിഴിഞ്ഞ് ഇന്ധന വില വര്ധിപ്പിക്കുന്നത് തികച്ചും അന്യായമാണെന്ന് മുന് മുഖ്യമന്ത്രി ഉമ്മന് ചാണ്ടി. കേന്ദ്ര-സംസ്ഥാന സര്ക്കാരുകള് അടിയന്തരമായി ഇടപെട്ട് വില നിയന്ത്രിക്കണം. യുഡിഎഫ് സര്ക്കാര് പെട്രോള്/ ഡീസല് വില കുതിച്ചു കയറിയപ്പോള് നാലു തവണ അധിക നികുതി വേണ്ടെന്നു വച്ച് 619.17 കോടിയുടെ സമാശ്വാസം നല്കിയെന്നും അദ്ദേഹം ചൂണ്ടിക്കാട്ടി.
ഇടതുസര്ക്കാര് ചെങ്ങന്നൂര് തെരഞ്ഞെടുപ്പ് വേളയില് മാത്രം ഒരു രൂപയുടെ ഇളവ് നല്കി. കര്ണാടക തെരഞ്ഞെടുപ്പ് വേളയില് മൂന്നാഴ്ച പെട്രോളിയം കമ്ബനികള് വില കൂട്ടിയില്ല. വര്ധിപ്പിച്ച ഇന്ധന വിലയുടെ അധിക നികുതിയെങ്കിലും ഉപേക്ഷിക്കാന് ഇടതുസര്ക്കാര് തയാറാകണമെന്ന് ഉമ്മന് ചാണ്ടി ആവശ്യപ്പെട്ടു.
ജനുവരിയില് ഇതുവരെ ആറു തവണയാണ് വില കൂട്ടിയത്. പെട്രോളിന് 25 പൈസയും ഡീസലിന് 26 പൈസയുമാണ് ഇന്നു വര്ധിച്ചത്. കൊച്ചിയില് ഒരു ലിറ്റര് പെട്രോളിന്റെ വില 85.97 രൂപയും ഡീസലിന് 80.14 രൂപമാണ് വില. തിരുവനന്തപുരത്ത് പെട്രോളിന് 87.63 രൂപയും ഡീസലിന് 81.68 രൂപയുമാണ് വില.
അന്താരാഷ്ട്ര വിപണയില് ബെന്റ് ഇനം ക്രൂഡിന് വില 2020 ജനുവരിയില് 63.65 ഡോളറായിരുന്നത് ഇപ്പോള് 55.61 ഡോളറായി കുറഞ്ഞുനില്കുമ്ബോഴാണ് രാജ്യത്ത് വില കുതിക്കുന്നത്.
https://www.facebook.com/Malayalivartha