രണ്ടാഴ്ചക്കുള്ളില്‍ സ്പീക്കര്‍ പി ശ്രീരാമകൃഷ്ണനെ ചോദ്യം ചെയ്യുമെന്നാണ് അറിയുന്നത്. ഇക്കാര്യം സ്പീക്കര്‍ക്കറിയാം. അതു കൊണ്ടുകൂടിയാണ് വിദേശത്തേക്ക് ഡോളര്‍ കടത്തിയ കേസുമായി ബന്ധപ്പെട്ട് കസ്റ്റംസ് തന്നെ ചോദ്യം ചെയ്യുമെന്ന വാര്‍ത്ത നിഷേധിച്ച് സ്പീക്കര്‍ പി ശ്രീരാമകൃഷ്ണന്‍ രംഗത്തെത്തിയത്. തന്നെ ചോദ്യം ചെയ്യും എന്നത് മാധ്യമ വാര്‍ത്തകള്‍ മാത്രമാണെന്നാണ് അദ്ദേഹം പറഞ്ഞത്.

എന്നാല്‍ മാധ്യമ വാര്‍ത്തകള്‍ തീര്‍ത്തും ശരിയാണെന്നാണ് റിപ്പോര്‍ട്ട്. സ്പീക്കറെ ചോദ്യം ചെയ്യാനുള്ള ചോദ്യാവലി പോലും കസ്റ്റംസ് തയ്യാറാക്കി കഴിഞ്ഞു. സ്പീക്കര്‍ പദവി അലങ്കരിക്കുന്ന ഒരാള്‍ ഒരു സുഹ്യത്തിന്റെ പേരില്‍ സിം കാര്‍ഡ് വാങ്ങി ഉപയോഗിക്കുന്നത് എന്തിനാണെന്നാണ് കസ്റ്റംസിന്റെ സംശയം.

സ്പീക്കര്‍ക്ക് ഔദ്യോഗികമായും അല്ലാതെയും ഫോണ്‍ കണക്ഷനുണ്ട്. എന്നിട്ടും ആ സിമ്മുകളില്‍ നിന്നും സ്പീക്കര്‍ സ്വപ്നയുമായി സംസാരിക്കാത്തതിലാണ് കസ്റ്റംസിന് സംശയം. സ്വപ്നയുടെ ഫോണിന്റെ നശിപ്പിക്കപ്പെട്ട ചാറ്റുകള്‍ കണ്ടെത്തിയതോടെയാണ് സ്പീക്കര്‍ ഉപയോഗിക്കുന്ന സുഹൃത്തിന്റെ ഫോണ്‍ നമ്പര്‍ കണ്ടെത്തിയത്.

സ്പീക്കറുടെ സുഹൃത്താണ് പൊന്നാനി സ്വദേശി നാസ് അബ്ദുള്ള. അദ്ദേഹത്തിന്റെ പേരിലുള്ള കണക്ഷനാണ് സ്പീക്കര്‍ ഉപയോഗിച്ചിരുന്നത്. സ്വര്‍ണ്ണക്കടത്തുമായി ബന്ധപ്പെട്ട ഡോളര്‍ കടത്ത് കേസില്‍ അദ്ദേഹത്തെ ചോദ്യം ചെയ്തിരുന്നു. യുഎഇ കോണ്‍സുലേറ്റിന്റെ മുന്‍ ചീഫ് അക്കൗണ്ട് ഓഫീസര്‍ ഖാലിദ് വിദേശത്തേക്ക് ഡോളര്‍ കടത്തിയ കേസിലാണ് കസ്റ്റംസിന്റെ നിര്‍ണായക നടപടികള്‍ നടന്നത്. സ്പീക്കര്‍ ഉപയോഗിക്കുന്ന ഒരു സിം കാര്‍ഡ് നാസിന്റെ പേരില്‍ എടുത്തതാണെന്നാണ് കസ്റ്റംസ് കണ്ടെത്തിയിട്ടുണ്ട്. നയതന്ത്ര ബാഗേജില്‍ നിന്ന് സ്വര്‍ണ്ണം കണ്ടെടുത്ത ജൂലൈ ആദ്യവാരം മുതല്‍ സിം കാര്‍ഡ് പ്രവര്‍ത്തിക്കുന്നില്ല. അതാണ് കസ്റ്റംസിന് സംശയമുണ്ടാക്കിയത്. അതോടെ അവര്‍ സ്പീക്കറുടെ ബന്ധങ്ങള്‍ പരിശോധിച്ചു. വളരെ കൃത്യമായ പരിശോധനക്ക് ശേഷം സ്പീക്കറുടെ നീക്കങ്ങള്‍ കസ്റ്റംസില്‍ സംശയങ്ങളുങാക്കിയെന്നാണ് കസ്റ്റംസ് വ്യത്തങ്ങള്‍ നല്‍കുന്ന സൂചന.

സ്പീക്കറുമായി ബന്ധപ്പെട്ട കാര്യങ്ങള്‍ പ്രതിപക്ഷ നേതാവിനും ബി ജെ പി സംസ്ഥാന പ്രസിഡന്റിനുമറിയാം. പരസ്യമായി അവര്‍ ഇക്കാര്യങ്ങളെല്ലാം പറഞ്ഞെങ്കിലും അതിന് ഫലമുണ്ടാകുന്നില്ലെന്ന് കണ്ടപ്പോഴാണ് അവര്‍ ശബ്ദം താഴ്ത്തിയത്. എന്നാല്‍ സ്പീക്കറെ ചോദ്യം ചെയ്യുന്നത് തെരഞ്ഞടുപ്പ് അടുത്തിട്ട് മതിയെന്നും ഒരു ആലോചനയുണ്ടത്രേ.

ഇത് സംബന്ധിച്ച വിവരങ്ങള്‍ക്കായാണ് നാസിന്റെ മൊഴിയെടുത്തത്. ഇതിനു പിന്നാലെയാണ് സ്പീക്കറെയും ചോദ്യം ചെയ്യുമെന്ന് അഭ്യൂഹങ്ങള്‍ പരന്നത്. എന്നാല്‍ കസ്റ്റംസ് രഹസ്യങ്ങളൊന്നും പുറത്തുവിട്ടിട്ടില്ല. നാസില്‍ നിന്നും ആവശ്യമായ വിവരങ്ങള്‍ കസ്റ്റംസിന് ലഭിച്ചുവെന്നാണ് അറിയുന്നത്.

ഡോളര്‍ കള്ളക്കടത്തില്‍ സ്പീക്കര്‍ക്ക് പുറമേ, വിദേശത്തേക്ക് ഡോളര്‍ കടത്തിയതിന് കസ്റ്റംസ് രജിസ്റ്റര്‍ ചെയ്ത കേസില്‍ എം ശിവശങ്കറിനെ കോടതി റിമാന്റ് ചെയ്തു. അടുത്ത മാസം 9 വരെയാണ് റിമാന്റ് ചെയ്തത്. വീഡിയോ കോണ്‍ഫറന്‍സ് വഴിയാണ് ശിവശങ്കറിനെ കോടതിയില്‍ ഹാജരാക്കിയത്. അതേസമയം, കേസില്‍ എം ശിവശങ്കര്‍ ജാമ്യാപേക്ഷ സമര്‍പ്പിച്ചു. അടുത്ത തിങ്കളാഴ്ച ജാമ്യാപേക്ഷ കോടതി പരിഗണിക്കും.

ഡോളര്‍ കടത്തില്‍ ശിവശങ്കറിന് പങ്കുണ്ടെന്നാണ് കസ്റ്റംസ് കണ്ടെത്തിയിരിക്കുന്നത്. ഡോളര്‍ കടത്ത് കേസില്‍ കഴിഞ്ഞ ആഴ്ചയാണ് എം ശിവശങ്കറിന്റെ അറസ്റ്റ് കസ്റ്റംസ് രേഖപ്പെടുത്തിയത്. കോടതി അനുമതിയോടെ ആയിരുന്നു നടപടി. യുഎഇ കോണ്‍സുലേറ്റിന്റെ മുന്‍ ചീഫ് അക്കൗണ്ട് ഓഫീസര്‍ ഖാലിദ് വിദേശത്തേക്ക് ഡോളര്‍ കടത്തിയ കേസിലാണ് കസ്റ്റംസിന്റെ നിര്‍ണായക നടപടികള്‍. 15 കോടി രൂപയുടെ ഡോളര്‍ കടത്തിയ കേസില്‍ ശിവശങ്കറിന് പങ്കുണ്ടെന്ന് കസ്റ്റംസ് ആരോപിക്കുന്നു. ഇദ്ദേഹത്തിനെതിരെ ശക്തമായ തെളിവുണ്ടെന്നും കസ്റ്റംസ് വാദിക്കുന്നു. ഡോളര്‍ കേസ് ഇല്ലായിരുന്നെങ്കില്‍ ശിവശങ്കറിന് ഇതിനകം പുറത്തിങ്ങാന്‍ കഴിയുമായിരുന്നു.

ഡോളര്‍ കടത്തില്‍ സ്പീക്കര്‍ക്ക് പലതും അറിയാമെന്നാണ് കസ്റ്റംസിന്റെ കണ്ടെത്തല്‍. വിവാദങ്ങളുടെ ആദ്യകാലത്ത് തനിക്ക് സ്വപ്നയുമായി ഒരു പ്രത്യേകബന്ധവുമില്ലെന്നാണ് സ്പീക്കര്‍ പറഞ്ഞെത്. എന്നാല്‍ അത്തരം കാര്യങ്ങള്‍ സ്പീക്കര്‍ നിഷേധിക്കുന്നു. നിയമസഭ കഴിയും വരെയാണ് സ്പീക്കര്‍ക്ക് കസ്റ്റംസ് സമയം നല്‍കിയിരുന്നത്. അതു കൊണ്ടു തന്നെ എന്തും എപ്പോഴും സംഭവിക്കാം. ഏതായിലും സ്പീക്കറുടെ നിയമസഭാ സ്വപ്നങ്ങള്‍ക്കാണ് മങ്ങലേറ്റിരിക്കുന്നത്.