സെക്രട്ടേറിയേറ്റിനു മുന്നില്‍ റാങ്ക് ഹോള്‍ഡേഴ്സ് നടത്തുന്ന സമരം പ്രതിപക്ഷം ഇളക്കിവിട്ട സമരമാണെന്ന് ധനമന്ത്രി തോമസ് ഐസക്. പ്രതിപക്ഷ നേതാക്കളുടെ പ്രതികരണങ്ങളില്‍നിന്ന് ഇക്കാര്യം വ്യക്തമാണെന്നും ഐസക്ക് പറഞ്ഞു.

പല റാങ്ക് ഹോള്‍ഡര്‍ സംഘടനകളും രാഷ്ട്രീയ ലക്ഷ്യത്തോടെ രൂപം കൊണ്ടവയാണ്. ലിസ്റ്റില്‍ ഉള്‍പ്പെട്ട എല്ലാവര്‍ക്കും ജോലി നല്‍കുക എന്നത് പ്രായോഗികമല്ലെന്നും അദ്ദേഹം പ്രതികരിച്ചു.

പി.എസ്.സിക്ക് റിപ്പോര്‍ട്ട് ചെയ്യുന്ന ഒഴിവുകളില്‍ അല്ല താല്‍ക്കാലികക്കാരെ സ്ഥിരപ്പെടുത്തിയത്. സമരത്തില്‍നിന്ന് പിന്മാറാന്‍ ഉദ്യോഗാര്‍ഥികള്‍ തയ്യാറാകണമെന്നും തോമസ് ഐസക്ക് ആവശ്യപ്പെട്ടു. ലിസ്റ്റില്‍ വന്നു കഴിഞ്ഞാല്‍ ഇവര്‍ക്കൊക്കെ തൊഴിലിന് അവകാശമുണ്ടെന്ന് ആരൊക്കെയോ പറഞ്ഞതിന്റെ അടിസ്ഥാനത്തില്‍ സമരവും ബഹളവും ഉണ്ടാക്കുന്നത്. ഇത്തരം കാര്യത്തിന്റെ നിജസ്ഥിതി മനസ്സിലാക്കി പിന്തിരിയുകയാണ് വേണ്ടത്.

പ്രതിപക്ഷത്തിന്റെ പ്രസ്താവനകളില്‍ നിന്ന് അവരാണ് ഇതിനു പിന്നിലെന്ന് മനസ്സിലാക്കാന്‍ സാധിക്കും. ഒരു കാരണവശാലും ലിസ്റ്റില്‍ ഉള്ള എല്ലാവരെയും നിയമിക്കാന്‍ സര്‍ക്കാരിന് സാധിക്കില്ല. കേരളത്തിലെ 20 ലക്ഷം അഭ്യസ്തവിദ്യര്‍ക്ക് ഏതാണ്ട് സര്‍ക്കാര്‍ ശമ്പളത്തില്‍ വരുന്ന നല്ല ജോലി നല്‍കാനുള്ള വളരെ കൃത്യമായ പരിപാടി ബജറ്റില്‍ മുന്നോട്ടുവെച്ചിട്ടുണ്ടെന്നും അദ്ദേഹം സൂചിപ്പിച്ചു

എന്നാല്‍, ധനമന്ത്രി തോമസ് ഐസകിന് സമരങ്ങളോട് പുച്ഛമാണെന്നും ഭരണം തലയ്ക്കു പിടിച്ചതു കൊണ്ടാണ് മന്ത്രിക്ക് പുച്ഛമെന്നും പ്രതിപക്ഷ നേതാവ് രമേശ് ചെന്നിത്തല പറഞ്ഞു. സമരജീവികളെന്ന മന്ത്രിയുടെ പരാമര്‍ശം ചൂണ്ടിക്കാട്ടി, പ്രധാനമന്ത്രിയും ഐസക്കും തമ്മില്‍ എന്ത് വ്യത്യാസമെന്നും രമേശ് ചെന്നിത്തല ആരാഞ്ഞു. യുവാക്കളുടെ സമരത്തെ യുഡിഎഫ് പിന്തുണയ്ക്കുമെന്നും രമേശ് ചെന്നിത്തല പറഞ്ഞു.