സ്വർണമൂക്കുത്തി മോഷ്ടിക്കാൻ വയോധികയെ ക്രൂരമായി കൊലപ്പെടുത്തി മൃതദേഹം കത്തിച്ച ശേഷം അവശിഷ്ടങ്ങൾ ചാക്കിലാക്കി കുഴിച്ചുമൂടി. സംഭവത്തിൽ യുവാവ് അറസ്റ്റിലായി. ആട്ടയാമ്പതി ന്യൂ ഉന്നതി സ്വദേശി സരസാൾ ആണ് കൊല്ലപ്പെട്ടത്. 66 വയസുകാരിയെ കൊലപ്പെടുത്തിയ അയൽവാസി എസ്.ഉദയകുമാർ (19) അറസ്റ്റിലായി.

കൊഴിഞ്ഞാമ്പാറ പൊലീസ് ആണ് പ്രതിയെ അറസ്റ്റ് ചെയ്തത്. കൂടുതൽ പേർക്കു കൊലപാതകത്തിൽ പങ്കുണ്ടോയെന്ന് പൊലീസ് അന്വേഷിക്കുന്നു . കഴിഞ്ഞമാസം 12നാണു സരസാളിനെ കാണാനില്ലെന്നു മകൾ ബേബി കൊഴിഞ്ഞാമ്പാറ പൊലീസിൽ പരാതി കൊടുത്തത്. അന്വേഷണം ആരംഭിച്ച പൊലീസ് പ്രദേശത്തെ ചില യുവാക്കളെ കസ്റ്റഡിയിലെടുത്തു ചോദ്യം ചെയ്തു. ഇതോടെയാണ് പ്രതിയെക്കുറിച്ചു സൂചന കിട്ടിയത് .

കസ്റ്റഡിയിലെടുത്തവരിൽ പ്രായപൂർത്തിയാകാത്ത ആളുമുണ്ടായിരുന്നു . ചോദ്യം ചെയ്യലിനിടെ വയോധികയെ കൊലപ്പെടുത്തിയശേഷം മൃതദേഹം ശുചിമുറിയിലെ ഡ്രമ്മിൽ ഇട്ടു കത്തിക്കുകയും പകുതി കത്തിയ നിലയിൽ ചാക്കിൽ കെട്ടി കുഴിച്ചുമൂടിയതായും പ്രതി സമ്മതിച്ചു.