ജാനകിയമ്മയ്ക്ക് കണ്ണീരോടെ വിട
സംഗീത വിസ്മയം എസ്.ജാനകിയമ്മ(88)യ്ക്ക് കണ്ണീരോടെ വിട. ഗായികയുടെ ഭൗതികദേഹം മൈസൂരുവിലെ കനിയനഹുണ്ഡി ഫാം ഹൗസില് സംസ്കരിച്ചു. മൈസൂരു മഹാരാജാസ് കോളജ് മൈതാനത്തു മണിക്കൂറുകള് നീണ്ട പൊതുദര്ശനത്തിനു ശേഷമായിരുന്നു സംസ്കാരച്ചടങ്ങ്. സിനിമാ, രാഷ്ട്രീയ മേഖലകളിലെ പ്രമുഖരടക്കം ആയിരങ്ങളാണ് പ്രിയഗായികയെ അവസാനമായി കാണാന് മഹാരാജാസ് കോളജ് മൈതാനത്തേക്ക് എത്തിയത്.
വൈകിട്ട് നാലരയോടെ മഹാരാജാസ് കോളജിലെ പൊതുദര്ശനം അവസാനിപ്പിച്ച്് മൃതദേഹം കനിയനഹുണ്ഡി ഫാം ഹൗസിലേക്ക് എത്തിച്ചു. ഇവിടേക്കും ഗായികയ്ക്ക് അന്ത്യോപചാരം അര്പ്പിക്കാന് ആളുകള് ഒഴുകിയെത്തി. മൈസൂരുവില് സംസ്കരിക്കണമെന്നത് ഗായികയുടെ ആഗ്രഹമായിരുന്നു. ചെറുമകള് അപ്സര വൈദ്യുലയാണ് അന്ത്യകര്മങ്ങള് നിര്വഹിച്ചത്. ഔദ്യോഗിക ബഹുമതികളോടെയായിരുന്നു സംസ്കാരം.
കേരള സര്ക്കാരിനെ പ്രതിനിധീകരിച്ച് ഉന്നത വിദ്യാഭ്യാസ വകുപ്പ് മന്ത്രി റോജി എം. ജോണ് അന്തിമോപചാരം അര്പ്പിച്ചു. മഹാരാജാ ഗ്രൗണ്ടില് നടന്ന പൊതുദര്ശന ചടങ്ങില് എത്തിയാണ് റോജി.എം.ജോണ് പുഷ്പചക്രം സമര്പ്പിച്ചത്. ശനിയാഴ്ച രാത്രി 7.30നായിരുന്നു എസ്.ജാനകിയുടെ അന്ത്യം. മൈസൂരുവിലെ വീട്ടില് കുഴഞ്ഞുവീണ ജാനകിയെ ഇന്നലെ ഉച്ചയോടെ സ്വകാര്യ ആശുപത്രിയില് പ്രവേശിപ്പിച്ചിരുന്നു.
https://www.facebook.com/Malayalivartha
