സര്‍ക്കാര്‍ ജോലി വാഗ്ദാനം ചെയ്ത് പണം തട്ടിയെന്ന പരാതിയില്‍ പ്രതികരണവുമായി സരിത നായര്‍. തനിക്കെതിരായ ആരോപണങ്ങള്‍ നിഷേധിച്ച സരിത പുറത്ത് വന്ന ഓഡിയോയിലെ ശബ്ദം തന്റേതല്ലെന്നും ഗൂഡാലോചനക്കാര്‍ മിമിക്രിക്കാരുടെ സഹായത്തോടെ ഉണ്ടാക്കിയതാണെന്നും അവകാശപ്പെട്ടു.

ആ ശബ്ദം എന്റേതല്ല. മിമിക്രിക്കാരുടെ സഹായത്തോടെയാണ് ഗൂഡാലോചനക്കാര്‍ ഇത് ചെയ്തത്. പരാതിക്കാരന്‍ തന്നെ കണ്ടിട്ടില്ലെന്നാണ് പൊലീസിനു നല്‍കിയിട്ടുള്ള മൊഴിയും എഫ്‌ഐആറിലുമുള്ളത്. ഒരിക്കലും തന്നെ കണ്ടിട്ടില്ലെന്നാണ് മാദ്ധ്യമങ്ങളോടും പറഞ്ഞത്. കാണാതെ എങ്ങനെ പൈസ തന്നു എന്നാണ് പറയുന്നത്. അക്കൗണ്ട് രേഖകളിലൊന്നും അരുണ്‍ എന്നൊരാള്‍ പണം തന്നതിന്റെ തെളിവില്ല. അവര്‍ പറയുന്നു.

രണ്ടു വര്‍ഷത്തെ മുഴുവന്‍ രേഖകളും പരിശോധിച്ചിട്ടും ഈ പേരില്‍ ഒരാള്‍ അക്കൗണ്ടില്‍ പണം ഇട്ടതു കണ്ടിട്ടില്ല. വ്യാജവാര്‍ത്തകളോട് പ്രതികരിക്കേണ്ട കാര്യമില്ലെന്നും ഇതു സംബന്ധിച്ച്‌ കോടതിയില്‍ പരാതി നല്‍കിയിട്ടുണ്ടെന്നും സരിത വ്യക്തമാക്കി.സോളാര്‍ കേസിലെ സി.ബി.ഐ. അന്വേഷണവുമായി ബന്ധപ്പെട്ട ഗൂഢാലോചനയാണിതെന്നും സരിത നായര്‍ ആരോപിച്ചു. സി.ബി.ഐക്ക് മൊഴി നല്‍കരുതെന്ന് ആവശ്യപ്പെട്ടുള്ള ബ്ലാക്ക് മെയില്‍ വരുന്നുണ്ട്. കേസില്‍ നിന്നും പിന്‍മാറണമെന്നും ആവശ്യപ്പെടുന്നുണ്ടെന്നും സരിത പറഞ്ഞു.

സര്‍ക്കാര്‍ ജോലി വാഗ്ദാനം ചെയ്ത് സരിത നായര്‍ പണം തട്ടിയെടുത്തെന്ന് നെയ്യാറ്റിന്‍കര സ്വദേശി എസ്. എസ്. അരുണാണ് പരാതി നല്‍കിയത്. ഇതിനു പിന്നാലെ ആരോഗ്യകേരളം പദ്ധതിയില്‍ നാല് പേര്‍ക്ക് ജോലി വാങ്ങി നല്‍കിയെന്ന ഫോണ്‍ സംഭാഷണവും പുറത്ത് വന്നിരുന്നു. ജോലി കിട്ടുന്നവരും കുടുംബവും പാര്‍ട്ടിക്കൊപ്പം നില്‍ക്കുമെന്നാണ് കരുതുന്നതെന്നും പിന്‍വാതില്‍ നിയമനത്തില്‍ ഉദ്യോഗസ്ഥര്‍ക്കും രാഷ്ട്രീയക്കാര്‍ക്കും പങ്കുണ്ടെന്നും പുറത്തുവന്ന ശബ്ദരേഖയില്‍ പറയുന്നുണ്ട്.