പഴയ പാട്ടുകള് ചേര്ത്തുപിടിച്ച്... പക്ഷാഘാതത്തെ തുടര്ന്ന് 16 വര്ഷം തളര്ന്നു കിടന്ന ഗായകന് എംഎസ് നസീം അന്തരിച്ചു; ഗാനമേളകളിലൂടെയും സ്റ്റേജ് ഷോകളിലൂടെയും പഴയ പാട്ടുകളുടെ തനിപ്പകര്പ്പുമായി വന്ന എംഎസ് നസീമിന്റെ മരണം ഏറെ വേദന തന്നെ
ദൂരദര്ശന് കൊടികുത്തി വാഴുന്ന സമയത്ത് മലയാളികള്ക്ക് ഏറെ സുപരിചിതനായിരുന്നു ഗായകന് എം.എസ്. നസീം. നസീമിന്റെ ഗാനങ്ങള് മിക്കപ്പോഴും ദൂരദര്ശനില് നിറഞ്ഞ് കാണാം. അന്നത്തെ സ്റ്റേജ് ഷോകളിലും ഗാനമേളകളിലും നിറഞ്ഞുനിന്ന താരമാണ് എം.എസ്. നസീം.
എന്നാല് 16 വര്ഷം മുമ്പ് സ്ട്രോക്ക് ബാധിച്ചതിനെ തുടര്ന്ന് അദ്ദേഹം കിടക്കയിലായിരുന്നു. അവസാനം മലയാളികളെ വേദനിപ്പിച്ച് നസീം വിടചൊല്ലിയിരിക്കുകയാണ്. തിരുവനന്തപുരത്തായിരുന്നു അന്ത്യം.
ഗായകന്, മ്യൂസിക് കണ്ടക്ടര്, മലയാള സംഗീതത്തിന്റെ ചരിത്ര സൂക്ഷിപ്പുകാരന്, സ്റ്റേജ്ടെലിവിഷന് ഷോകളുടെ സംഘാടകന്, ഡോക്യുമെന്ററി സംവിധായകന് അങ്ങനെ നിരവധി മേഖലകളില് പ്രശസ്തനാണ് എംഎസ് നസീം. വളരെ ചെറുപ്പത്തിലെ തന്നെ അദ്ദേഹം സംഗീതലോകത്ത് എത്തി. സ്കൂള് വിദ്യാര്ഥിയായിരിക്കുമ്പോള് ജൂനിയര് എ.എം രാജയെന്നും കോളജിലെത്തിയപ്പോള് ജൂനിയര് റഫിയെന്നും വിളിപ്പേര് വീണു.
മുവായിരത്തിലേറെ ഗാനമേളകളാണ് ഇന്ത്യയിലും പുറത്തുമായി അദ്ദേഹം നയിച്ചത്. ആകാശവാണിയിലേയും ദൂരദര്ശനിലേയും സജീവ സാന്നിധ്യമായിരുന്നു നസീം. 1990 ല് ഇറങ്ങിയ അനന്തവൃത്താന്തം എന്ന സിനിമയില് ചിത്രയോടൊപ്പം പാടിയ നിറയും താരങ്ങളെ എന്ന ഒരേയൊരു ഗാനം മാത്രമേ എം എസ് നസീം സിനിമയില് ആലപിച്ചിട്ടുള്ളൂ.
കേവലം ഒരു ഗായകനായി മാത്രം ഒതുങ്ങാതെ, മലയാളിയുടെ സിനിമ, നാടക, ലളിത, ഗസല് സംഗീതചരിത്രത്തെ കുറിച്ച് പഠിക്കുവാനും അത് ഭാവി തലമുറയ്ക്കായി രേഖപ്പെടുത്തുവാനും അദ്ദേഹം ശ്രമിച്ചിരുന്നു. അതിന്റെ ഭാഗമായി അദ്ദേഹം കഴക്കൂട്ടത്തെ തന്റെ മേടയില് വീട് ഒരു സംഗീത മ്യൂസിയമാക്കി മാറ്റി.
ദൂരദര്ശന് തുടര്ച്ചയായി സംപ്രേഷണം ചെയ്ത 'ആയിരം ഗാനങ്ങള്തന് ആനന്ദലഹരി' എന്ന ഡോക്യുമെന്ററി, മലയാള ഗാനചരിത്രം രേഖപ്പെടുത്താന് അദ്ദേഹം നടത്തിയ പരിശ്രമങ്ങളുടെ ഭാഗമായി നിര്മ്മിക്കപ്പെട്ടതാണ്. നിരവധി ഡോക്യുമെന്ററികള് സംവിധാനം ചെയ്ത അദ്ദേഹത്തിന്റെ 'മിഴാവ്' എന്ന ചിത്രത്തിന് ദേശീയ പുരസ്കാരം ലഭിച്ചു.
1997ല് മികച്ച ഗായകനുള്ള സംഗീത നാടക അക്കാദമി പുരസ്കാരം, സംസ്ഥാന സര്ക്കാരിന്റെ ടി.വി അവാര്ഡ് നാലുതവണ, 2001ല് കുവൈത്തിലെ സ്മൃതി എ എം രാജ പുരസ്കാരം, 2001ല് സോളാര് ഫിലിം സൊസൈറ്റി പുരസ്കാരം തുടങ്ങി നിരവധി പുരസ്കാരങ്ങളും അംഗീകാരങ്ങളും അദ്ദേഹത്തെ തേടിയെത്തി. എം.എ, ബി.എഡ് കാരനായ അദ്ദേഹം 27 വര്ഷം കെ.എസ്.ഇ.ബിയില് പ്രവര്ത്തിച്ചു.
2003ല് സൂപ്രണ്ടായിരിക്കെ സ്വയം വിരമിച്ച് മുഴുസമയ സംഗീത പ്രവര്ത്തകനായി മാറി. മുഹമ്മദ് റഫിയേയും മലയാളി സംഗീതജ്ഞന് എ ടി ഉമ്മറിനേയും കുറിച്ച് അദ്ദേഹം ഡോക്യുമെന്ററികള് ചെയ്തിരുന്നു. നൗഷാദിനെ കുറിച്ച് ഒരു ഡോക്യുമെന്ററി ചെയ്യുവാനുള്ള തയ്യാറെടുപ്പിനിടയിലാണ്, പക്ഷാഘാതം വന്ന് വലതുവശം തളരുകയും സംസാരശേഷിയും നഷ്ടമാകുകയും ചെയ്തത്. അവിടെ നിന്നാണ് അദ്ദേഹത്തിന്റെ മരണവാര്ത്ത എത്തുന്നത്.
https://www.facebook.com/Malayalivartha
