കണ്ണൂരിൽ ട്രാൻസ്‌ജെൻഡർ തീകൊളുത്തി മരിച്ചു. തോട്ടട സമാജ്‌വാദി കോളനിയിലെ സ്‌നേഹയാണ് മരണപ്പെട്ടത്. ഇന്നലെ വൈകിട്ടായിരുന്നു സംഭവം. ആത്മഹത്യ ചെയ്തതാവാമെന്നാണ് പൊലീസിന്റെ പ്രാഥമിക നിഗമനം.

വീട്ടിൽ വച്ച് ദേഹത്ത് മണ്ണെണ്ണ ഒഴിച്ച സ്‌നേഹ തീ കൊളുത്തുകയായിരുന്നുവെന്ന് പൊലീസ് അറിയിച്ചു. ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. കുടുംബ പ്രശ്‌നങ്ങളാവാം ആത്മഹത്യയ്ക്ക് കാരണമെന്നാണ് പൊലീസ് പറയുന്നത്.

ലിംഗമാറ്റ ശസ്തക്രിയയിലൂടെ തന്റെ ചിരകാലാഭിലാഷം നേടിയെടുത്താണ് സ്നേഹ ജനങ്ങൾക്ക് സുപരിചതമായി മാറിയത്. കൂടാതെ ഇക്കഴിഞ്ഞ തദ്ദേശ തെരഞ്ഞെടുപ്പിൽ കണ്ണൂർ കോർപ്പനിലെ 36-ാം ഡിവിഷനിൽ നിന്ന് സ്വതന്ത്ര സ്ഥാനാർത്ഥിയായും സ്‌നേഹ മത്സരിച്ചിരുന്നു. 2019 ഏപ്രില്‍ 17-നാണ് എറണാകുളം അമൃത ആശുപത്രിയില്‍ ലിംഗമാറ്റ ശസ്ത്രക്രിയ നടത്തിയത്.

കണ്ണൂര്‍ തോട്ടട സ്വദേശിയായ സ്നേഹ കുടുംബശ്രീ പ്രവര്‍ത്തകയായി സേവനമനുഷ്ടിച്ചിരുന്നു. കണ്ണൂരില്‍ നൈസി എന്ന പേരില്‍ ചിപ്സ് ഉണ്ടാക്കുന്ന സംഘത്തിന്റെ സെക്രട്ടറിയായിരുന്നു. ലിംഗമാറ്റം കഴിഞ്ഞുള്ള കന്നിവോട്ട് ചെയ്യാൻ സ്‌നേഹ ബൂത്തിലെത്തിയത് ഏറെ വാർത്തയായിരുന്നു.

കണ്ണൂർ കോർപ്പറേഷനിൽ 36ാം ഡിവിഷനിലെ കിഴുന്നയിൽ നിന്നാണ് സ്‌നേഹ കഴിഞ്ഞ തദ്ദേശ തെരഞ്ഞെടുപ്പിൽ ജനവിധി തേടി മത്സരിച്ചത്. ട്രാൻസ്‌ജെൻഡർ വിഭാഗത്തിന്റെ പ്രശ്നങ്ങളും ബുദ്ധിമുട്ടുകളും പുറം ലോകത്തിനു മുന്നിൽ ഉയർത്തികാട്ടുക എന്ന ലക്ഷ്യത്തോടെ പ്രവർ‍ത്തിച്ച ഒരു വ്യക്തി കൂടിയായിരുന്നു സ്നേഹ.

തന്റെ തോട്ടട സമാജ്വാദി കോളനി ഉൾപ്പെടുന്ന പ്രദേശത്തിന്റെ മാറ്റത്തിനും വികസനത്തിനും വേണ്ടിയിട്ടു കൂടിയാണ് താൻ തിരഞ്ഞെടുപ്പിൽ ജനവിധി തേടുന്നതെന്നായിരുന്നു സ്‌നേഹയുടെ നിലപാട്.

തന്റെ ജീവിതത്തിലെ ഏറ്റവും സന്തോഷകരമായ മുഹൂര്‍ത്തത്തിലൂടെയാണ് കടന്നു പോയിരുന്നതെന്നും പൂര്‍ണമായി സ്ത്രീയായതിന്റെ സന്തോഷം ശരീരവും ഏറ്റെടുത്തു കഴിഞ്ഞു എന്നും സനേഹ സന്തോഷം പ്രകടിപ്പിച്ചിരുന്നു.

ട്രാൻസ്ജെന്റർ വിഭാഗത്തിൽ വോട്ടവകാശമുള്ളവർ ഒരുപാടു പേർ നമ്മുടെ സമൂഹത്തിലുണ്ടെന്നും എന്നാൽ നാണക്കേട് കരുതിയാണ് മുന്നോട്ട് വരാത്തതെന്നും സ്നേഹ പറയുന്നു. അമ്മയും വീട്ടുകാരും ഒപ്പമുണ്ടെന്നും തന്റെ തുടര്‍ പ്രവര്‍ത്തനങ്ങളില്‍ ഇതൊരു ഊര്‍ജമാണെന്നും സ്‌നേഹ പറഞ്ഞിരുന്നു. സാമൂഹ്യപരമായി ഏറെ മാറ്റങ്ങൾ കൊണ്ടു വരണമെന്ന് ആഗ്രഹിച്ച സ്നേഹയുടെ ആത്മഹത്യ വിശ്വസിക്കാനാകാതെ നടുങ്ങിയിരിക്കുകയാണ് നാട്ടുകാരും സുഹൃത്തുക്കളും.