കാര്‍ട്ടൂണ്‍ രംഗത്തും മാധ്യമ പ്രവര്‍ത്തനത്തിലും നല്‍കിയ സംഭാവനകള്‍ പരിഗണിച്ച്‌ 2019ലെ സ്വദേശാഭിമാനി കേസരി പുരസ്‌കാരം യേശുദാസന് നല്‍കാന്‍ തീരുമാനിച്ചതായി മുഖ്യമന്ത്രി പിണറായി വിജയന്‍ വാര്‍ത്തസമ്മേളനത്തില്‍ പറഞ്ഞു. ഒരു ലക്ഷം രൂപയും പ്രശസ്തിപത്രവും ശില്‍പി കാനായി കുഞ്ഞിരാമന്‍ രൂപകല്‍പന ചെയ്ത ഫലകവുമാണ് പുരസ്‌കാരം.

ആറ് പതിറ്റാണ്ടിലേറെയായി കാര്‍ട്ടൂണ്‍ രംഗത്ത് പ്രവര്‍ത്തിക്കുന്ന യേശുദാസന്‍ മാവേലിക്കര ഭരണിക്കാവില്‍ 1938ല്‍ ജനിച്ചു. 1955ല്‍ കോട്ടയത്തു നിന്ന് പ്രസിദ്ധീകരിച്ചിരുന്ന അശോക മാസികയിലാണ്​​ ആദ്യ കാര്‍ട്ടൂണ്‍ വന്നത്​. 1960ല്‍ ജനയുഗത്തില്‍ രാഷ്​ട്രീയ കാര്‍ട്ടൂണ്‍ പ്രസിദ്ധീകരിച്ചുതുടങ്ങി. തുടര്‍ന്ന്​, ശങ്കേഴ്‌സ് വീക്കിലിയുടെ ഭാഗമായി.

1985ല്‍ മലയാള മനോരമയിലെത്തി. കേരള കാര്‍ട്ടൂണ്‍ അക്കാദമി സ്ഥാപക ചെയര്‍മാനും കേരള ലളിതകലാ അക്കാദമി മുന്‍ ചെയര്‍മാനുമാണ്. കെ.ഇ.എന്‍. കുഞ്ഞഹമ്മദ് ചെയര്‍മാനും തുളസി ഭാസ്‌കരനും ബി. ജയചന്ദ്രനും അംഗങ്ങളും പി.ആര്‍.ഡി ഡയറക്ടര്‍ എസ്. ഹരികിഷോര്‍ കണ്‍വീനറുമായ സമിതിയാണ് ജേതാവിനെ നിശ്ചയിച്ചത്.